ఏ ప్రాణికైనా హాని చేస్తే..?

ఏలూరు సురేంద్ర రెడ్డి సమర్పణలో బుద్ధ భగవాన్‌ ప్రైవేట్‌ లిమిటెడ్‌ పతాకంపై వస్తున్న సినిమా ‘బిగ్‌ స్నేక్‌ కింగ్‌’ ఇటీవల రిలీజైన ట్రైలర్‌కు మంచి స్పందన లభించింది. మార్చి 3న ఈ సినిమా అన్ని భాషల్లో ప్రపంచ వ్యాప్తంగా గ్రాండ్‌గా విడుదలకు సిద్ధమైంది. ఈ సందర్బంగా ఏలూరు సురేంద్ర రెడ్డి, ‘తెలుగులో నేను రిలీజ్‌ చేస్తున్నాను. కథ విషయానికి వస్తే, చైనాలోని ఒక గ్రామానికి చెందిన లీ, కొంతమంది గ్రామస్థులను అక్రమ తవ్వకాల కోసం ఒక గుహ దగ్గరకు తీసుకెళ్తాడు. అయితే వారి కారణంగా వందేళ్లుగా నిద్రపోతున్న అతి పెద్ద పాము నిద్ర లేస్తుంది. దీని నుంచి తప్పించుకునే సమయంలో లీ మాత్రమే బతికి బయటపడతాడు. కొన్ని రోజుల తర్వాత దానిని తరిమి కొట్టడానికి గ్రామస్థులు యాగాలు చేయడం ప్రారంభిస్తారు. మహారాజు కుమారుడు చింగ్‌ చాంగ్‌ వచ్చి ఆ గ్రామానికి సాయం చేస్తాడు. లీ కుమార్తె మింగ్‌ యు అతనితో కలిసి గ్రామస్థులను దూరంగా పంపి ఆ పెద్ద పామును డైనమైట్‌ బాంబ్‌తో పేల్చి చంపేస్తారు. చివరిగా భూమి పై ఏ ప్రాణికి హాని చేయకూడదని గ్రామస్థులు ప్రతిజ్ఞ చేస్తారు. ఈ సిరీస్‌లో వాళ్ళు దాదాపు 10 సినిమాలు చేశారు. వాటిని కూడా నేనే నెలకి ఒకటి చొప్పున రిలీజ్‌ చేస్తున్నాను.ఫైట్‌ మాస్టర్‌ యువన్‌ హిందీలో దాదాపు 5 సినిమాలు, తెలుగులో ఒక సినిమా చేశారు. హీరోలు లికస్‌ దాదాపు 100 సినిమాలు పైనే చేశారు. మార్చి3న తెలుగు ప్రేక్షకులు ఈ చిత్రాన్ని చూసి ఆదరించడం’ అని తెలిపారు.