టాలీవుడ్‌లో ఉన్న క్రేజీ కాంబినేషన్లలో గోపీచంద్‌, డైరెక్టర్‌ శ్రీవాస్‌ కాంబినేషన్‌ ఒకటి. వారి కలయికలో గతంలో ‘లక్ష్యం’, ‘లౌక్యం’ వంటి సూపర్‌ హిట్లు వచ్చాయి. ఇప్పుడు ‘రామబాణం’ కోసం ఈ కాంబినేషన్‌ ముచ్చటగా మూడోసారి హ్యాట్రిక్‌ కోసం ప్రయత్నిస్తోంది. పీపుల్‌ మీడియా ఫ్యాక్టరీ బ్యానర్‌ పై టీజీ విశ్వప్రసాద్‌, వివేక్‌ కూచిభొట్ల సంయుక్తంగా భారీస్థాయిలో ఈ చిత్రాన్ని నిర్మిస్తున్నారు. ఇందులో గోపీచంద్‌ సరసన నాయికగా డింపుల్‌ హయతి నటిస్తుండగా, జగపతి బాబు, కుష్భూ ప్రధాన పాత్రల్లో నటిస్తున్నారు. లేటెస్ట్‌గా ఈ చిత్రం నుంచి మరో కొత్త పోస్టర్‌ విడుదలైంది. ఇది పరీక్షల సమయం కావడంతో విద్యార్థులను ఆల్‌ ది బెస్ట్‌ చెబుతూ మేకర్స్‌ రామబాణం నుంచి కొత్త పోస్టర్‌ను రిలీజ్‌ చేశారు. గోపీచంద్‌ పవర్‌ ఫుల్‌ లుక్‌తో ఉన్న పోస్టర్‌ ఎంతగానో ఆకట్టుకుంటోంది. అలాగే ఈ చిత్రాన్ని మే 5న విడుదల చేయబోతున్నట్లు పోస్టర్‌లో పేర్కొన్నారు. ‘విద్యార్థులందరికీ పరీక్షలు ముగిశాక వేసవిలో మిమ్మల్ని అలరించటానికి, అసలుసిసలు వినోదాన్ని పంచడానికి ‘రామబాణం’ దూసుకొస్తోంది. ఇందులో విక్కీ అనే పవర్‌ ఫుల్‌ పాత్రలో గోపీచంద్‌ సరికొత్తగా కనిపించనున్నారు. ఈ సినిమాలో గోపీచంద్‌ మేకోవర్‌ ప్రత్యేక ఆకర్షణగా నిలవనుంది. ‘లక్ష్యం, లౌక్యం’ సినిమాలను మించేలా ఉండాలని శ్రీవాస్‌ ప్రత్యేక శ్రద్ధతో ఈ చిత్రాన్ని తీర్చి దిద్దుతున్నారు. ఫ్యామిలీ ఎమోషన్స్‌తో పాటు సామాజిక సందేశం కూడా మిళితమైన బలమైన కథాంశం ఉన్న చిత్రమిది. గోపీచంద్‌ 30వ చిత్రంగా వస్తున్న ఈ సినిమాని పీపుల్‌ మీడియా ఫ్యాక్టరీ అధినేతలు టి.జి. విశ్వప్రసాద్‌, వివేక్‌ కూచిభొట్ల ఖర్చుకి వెనకాడకుండా ప్రముఖ నటీనటులు, ఉత్తమ సాంకేతిక నిపుణులతో భారీగా నిర్మిస్తున్నారు’ అని చిత్ర బృందం తెలిపింది.
