హైదరాబాద్‌ ఫిలిం క్లబ్‌ నిర్వహణలో ఈనెల 6 నుంచి 15వ తేదీ వరకు పది రోజులపాటు 29వ యూరోపియన్‌ యూనియన్‌ ఫిల్మ్‌ ఫెస్టివల్‌ హైదరాబాద్‌లోని ప్రసాద్‌ ల్యాబ్స్‌ ప్రివ్యూ థియేటర్‌లో జరగనున్నది.
ఈ సందర్భంగా తెలుగు ఫిలిం డైరెక్టర్స్‌ అసోసియేషన్‌ ప్రెసిడెంట్‌ వీరశంకర్‌ మాట్లాడుతూ, ‘ప్రపంచ వ్యాప్తంగా ఉన్న వివిధ భాషలకు చెందిన ఫిల్మ్‌ ఫెస్టివల్స్‌ రెగ్యులర్‌గా మన దగ్గర జరగాల్సిన అవసరం ఎంతైనా ఉంది. ఇలాంటవాటికి తెలుగు చలనచిత్ర పరిశ్రమ సహకారంతో పాటు ముఖ్యంగా ప్రభుత్వ సహకారం అత్యంత ఆవశ్యకం’ అని తెలిపారు.
‘యూరోపియన్‌ యూనియన్‌లోని వివిధ దేశాలకు చెందిన 29 భాషల్లో అవార్డులు గెలుచుకున్న 24 చిత్రాలను ఈ పది రోజుల పాటు ప్రదర్శిస్తాం. ఐరోపా సినిమాటిక్‌ విండోను అందించడం, ఖండంలోని అత్యుత్తమ చిత్రాలను ప్రదర్శించడం, క్రాస్‌-కల్చర్‌పై అవగాహన పెంపొందించడం కోసం ఈ ఫెస్టివల్‌ ఎంతగానో ఉపయోగపడుతుంది’ అని హైదరాబాద్‌ ఫిల్మ్‌ క్లబ్‌ ప్రెసిడెంట్‌ కె.వి.రావు చెప్పారు.
హైదరాబాద్‌ ఫిల్మ్‌ క్లబ్‌ సెక్రటరీ ప్రకాష్‌ రెడ్డి మాట్లాడుతూ, ‘మా ఫిల్మ్‌ క్లబ్‌ 50 ఏళ్ళు పూర్తి చేసుకుని, ఈ ఏడాది గోల్డెన్‌ జూబ్లీ ఇయర్‌లోకి ప్రవేశించింది. మేం నిర్వహిస్తున్న ఏడవ యూరోపియన్‌ యూనియన్‌ ఫిల్మ్‌ ఫెస్టివల్‌ ఇది. ఫెస్టివల్స్‌ నిర్వహణలో మాకు శ్రీ సారధీ స్టూడియోస్‌ అందిస్తున్న సహకారం మరువలేనిది. ఈ ఫెస్టివల్‌లోని అన్ని చలనచిత్రాలు ఆంగ్ల ఉపశీర్షికలను కలిగి ఉంటాయి. ఎలాంటి డెలిగేట్‌ పాస్‌లు లేకుండా ప్రేక్షకులందరినీ ఆహ్వానిస్తున్నాం. ‘లా చిమెరా, బాన్‌, జిమ్స్‌ స్టోరీ, యానిమల్‌, యాన్‌ ఐరిష్‌ గుడ్‌బై, అఫైర్‌, రిస్టోర్‌ పాయింట్‌’ వంటి మరెన్నో ప్రశంసలు పొందిన చిత్రాలు ఈ ప్రదర్శనలో ఉన్నాయి’ అని అన్నారు.
