– హైదరాబాద్‌లో మరో ఐదుగురు డీఎంహెచ్‌వోలు
– క్యాబినెట్‌ నిర్ణయం మేరకు మంజూరు
నవతెలంగాణ బ్యూరో – హైదరాబాద్‌
రాష్ట్ర ప్రజారోగ్య సంచాలకులు (డైరెక్టర్‌ ఆఫ్‌ పబ్లిక్‌ హెల్త్‌ – డీపీహెచ్‌) పరిధిలో కొత్తగా 33 పోస్టులను ప్రభుత్వం మంజూరు చేసింది. ఇందులో ఐదు డీఎంహెచ్‌వోలతో పాటు డీపీహెచ్‌ రాష్ట్ర కార్యాలయంలో 28 పోస్టులు ఉన్నాయి. ఈ మేరకు ఆర్థిక శాఖ గురువారం ఉత్తర్వులు జారీ చేసింది. కొత్తగా మంజూరు చేసిన డీఎంహెచ్‌వోలన్నీ హైదరాబాద్‌ జిల్లా పరిధిలోనివే. సుమారు కోటి జనాభా ఉన్న హైదరాబాద్‌లో ఒక్క డీఎంహెచ్‌వో పోస్టుతో పర్యవేక్షణ కష్టంగా మారిందనీ, జీహెచ్‌ఎంసీ తరహాలో ఆరు జోన్లకు ఒక్కో డీఎంహెచ్‌వోను నియమించాలని మే 19న జరిగిన క్యాబినెట్‌ సమావేశంలో సీఎం కేసీఆర్‌ నిర్ణయించిన సంగతి తెలిసిందే. ఆ నిర్ణయంతో రాష్ట్రంలోని మొత్తం డీఎంహెచ్‌వోల సంఖ్య 38కి పెరగనున్నది. కొత్తగా మంజూరు చేసిన పోస్టులతో రాష్ట్రంలో వైద్య సేవలు మరింత మెరుగుపడనున్నాయని మంత్రి హరీశ్‌రావు పేర్కొన్నారు. ప్రజల ఆరోగ్యంపై పర్యవేక్షణ పెరుగుతుందనీ, వ్యాధుల నివారణ, నియంత్రణ, చికిత్స ప్రక్రియలు మెరుగుపడి, అన్ని స్థాయిల్లో మెరుగైన వైద్యం అందుతుందని ట్వీట్‌ చేశారు.
మంజూరైన పోస్టులివే…
అడిషనల్‌ డైరెక్టర్‌ (అడ్మిన్‌) -1,జాయింట్‌ డైరెక్టర్‌ (అడ్మిన్‌) – 1, డిప్యూటీ డైరెక్టర్‌ (అడ్మిన్‌) -1,అసిస్టెంట్‌ డైరెక్టర్‌ (అడ్మిన్‌- స్టేట్‌ క్యాడర్‌) – 3,అడ్మినిస్ట్రేటివ్‌ ఆఫీసర్‌ (స్టేట్‌ క్యాడర్‌) – 4,ఆఫీస్‌ సూపరింటెండెంట్‌ – 6, సీనియర్‌ అసిస్టెంట్‌ – 12, డీఎంహెచ్‌వో – 5
