– లోక్‌సభ ఎన్నికల చరిత్రలోనే భారీగా నగదు పట్టివేత
– తొలి విడతలోనే రికార్డు స్థాయిలో స్వాధీనం
– బీజేపీ పాలిత రాష్ట్రాలైన రాజస్థాన్‌, గుజరాత్‌లలో అత్యధికం..
నవతెలంగాణ-న్యూఢిల్లీ బ్యూరో
దేశంలో ఎన్నికల సమయంలో కట్టల కొద్దీ నగదు, మద్యం, మాదక ద్రవ్యాలు పట్టుబడుతున్నాయి. రికార్డు స్థాయిలో రికవరీ జరిగింది. గత 75 ఏండ్ల లోక్‌సభ ఎన్నికల చరిత్రలోనే తొలిసారిగా భారీ నగదు ఈ ఎన్నికల సమయంలో పట్టుబడినట్లు కేంద్ర ఎన్నికల సంఘం వెల్లడించింది. సోమవారం ఈసీ వెల్లడించిన వివరాల ప్రకారం మార్చి 1 నుంచి ఏప్రిల్‌ 13 వరకు తొలి విడతలో డబ్బు, మద్యం, బంగారం, ఇతర వస్తువుల రూపంలో మొత్తం రూ. 4,658.16 కోట్లు రికవరీ అయ్యింది. అంటే సగటున రోజుకు రూ.100 కోట్ల మేర రికవరీ జరిగింది. ఇందులో నగదు రూ.395.39 కోట్లు కాగా, బంగారం, వెండి వంటి విలువైన లోహాల రూపంలో రూ.562.10 కోట్లు రికవరీ
43 రోజులు..రూ.4 వేలకోట్లకు పైనే.. చేసినట్లు ఈసీ తెలిపింది. అలాగే రూ.489.31 కోట్ల విలువ చేసే 3.58 కోట్ల లీటర్ల మద్యం పట్టుబడినట్లు పేర్కొంది. ఈసారి మొత్తం రికవరీలో సింహభాగం మాదకద్రవ్యాలే ఉన్నాయి. రూ.4,658.16 కోట్ల రికవరీలో 45 శాతం మేర ఇవే ఉన్నట్లు ఈసీ తెలిపింది. మొత్తంగా రూ.2,068.85 కోట్ల విలువ చేసే డ్రగ్స్‌ స్వాధీనం చేసుకున్నట్లు వెల్లడించింది. 2019 ఎన్నికల సమయంలో రూ.1,279.9 కోట్ల విలువైన డ్రగ్స్‌ పట్టుబడ్డాయి. ఇక టీవీలు, ఫ్రిడ్జిలు, మొబైల్‌ ఫోన్లు, ఇతర ఎలక్ట్రానిక్‌, గృహోపకరణాలు, బహుమతుల రూపంలో రూ.1,142.49 కోట్ల మేర స్వాధీనం చేసుకున్నట్లు ఈసీ వివరించింది.
34 శాతం పెరుగుదల
గత లోక్‌సభ ఎన్నికల సమయంలో రూ. 3,475 కోట్లకు పైగా నగదు పట్టుబడింది. అప్పటితో పోలిస్తే ఇది 34 శాతం అధికమని తెలిపింది. సమగ్ర ప్రణాళిక, సంయుక్త కార్యాచరణ, దర్యాప్తు సంస్థలు, భద్రతా బలగాల మధ్య సమన్వయంతో పాటు పౌరుల సహకారంతోనే ఇంత పెద్ద మొత్తంలో స్వాధీనం చేసుకోగల్గుతున్నామని ఈసీ ఒక ప్రకటనలో పేర్కొంది.
నగదు: రూ.395.39 కోట్లు
బంగారం ఇతర లోహాలు: రూ.562.10 కోట్లు
3.58 కోట్ల లీటర్ల మద్యం: రూ.489.31 కోట్లు
మాదకద్రవ్యాలు: రూ.2,068.85 కోట్లు
బహుమతులు : రూ.1,142.49 కోట్లు
మొత్తం : రూ. 4,658.16 కోట్లు
మొదటి రెండు స్థానాల్లో రాజస్థాన్‌, గుజరాత్‌
ఇక దేశవ్యాప్తంగా ఇప్పటి వరకు వివిధ రూపాల్లో ఈసీ స్వాధీనం చేసుకున్న మొత్తం రూ. 4,658.16 కోట్లలో రాజస్థాన్‌ తొలి స్థానంలో నిలిచింది. ఆ రాష్ట్రంలో మార్చి 1 నుంచి ఏప్రిల్‌ 13 వరకూ మొత్తం రూ. 778.52 కోట్లు స్వాధీనం చేసుకుంది. ఆ తరువాత రూ. 605 కోట్లతో గుజరాత్‌ రెండో స్థానంలో నిలిచింది. ఇక తమిళనాడులో రూ.460.8 కోట్లు, మహారాష్ట్రలో రూ.431.3 కోట్లు, పంజాబ్‌లో రూ. 311.8 కోట్లు పట్టుబడింది. ఎన్నికల అక్రమాలు, అవకతవకల్లో అత్యల్పంగా లఢక్‌, లక్షద్వీప్‌ ప్రాంతాలు నిలిచాయి.
ఏపీలో 125.97 కోట్లు, తెలంగాణలో 121.84 కోట్లు పట్టివేత
తెలుగు రాష్ట్రాల్లో ఆంధ్రప్రదేశ్‌ నుంచి రూ. 125.97 కోట్ల మేర రికవరీ చేసుకోగా, తెలంగాణ నుంచి రూ. 121.84 కోట్లు స్వాధీనం చేసుకున్నట్లు ఈసీ తెలిపింది. ఏపీలో నగదు రూ.32.15 కోట్లు, రూ.19.71 కోట్లు విలువైన 10.22 లక్షల లీటర్ల మద్యం, రూ.4.06 కోట్లు మాదకద్రవ్యాలు, రూ.57.14 కోట్ల విలువైన బంగారం, వెండి ఇతర లోహాలు, రూ. 12.89 కోట్ల విలువైన టీవీలు, ఫ్రిడ్జిలు, మొబైల్‌ ఫోన్లు, ఇతర ఎలక్ట్రానిక్‌ గృహోపకరణాలు, బహుమతులు స్వాధీనం చేసుకున్నట్లు ఈసీ తెలిపింది. తెలంగాణలో నగదు రూ.49.18 కోట్లు, రూ.19.21 కోట్లు విలువైన 68.58 లక్షల లీటర్ల మద్యం, రూ.22.71 కోట్లు మాదకద్రవ్యాలు, రూ.12.38 కోట్ల విలువైన బంగారం, వెండి ఇతర లోహాలు, రూ. 18.45 కోట్ల విలువైన టీవీలు, ఫ్రిడ్జిలు, మొబైల్‌ ఫోన్లు, ఇతర ఎలక్ట్రానిక్‌ గృహోపకరణాలు, బహుమతులు స్వాధీనం చేసుకున్నట్లు ఈసి తెలిపింది.
2024 లోక్‌సభ ఎన్నికలు మొత్తం ఏడు విడతల్లో జరగనున్న విషయం తెలిసిందే. తొలి విడత ఎన్నికలు ఏప్రిల్‌ 19న ప్రారంభం కానున్నాయి. ఏప్రిల్‌ 26న రెండో విడత, మే 7న మూడో విడత, మే 13న నాలుగో విడత, మే 20న ఐదో విడత, మే 25న ఆరో విడత, జూన్‌ 1న ఏడో విడత ఎన్నికలు జరగనున్నాయి. ఇక తొలి విడతలోనే ఇంత మొత్తంలో నగదు రికవరీ కావడం గమనార్హం. ఎన్నికలు ముగిసే సరికి ఇంకా పెద్ద మొత్తంలో నగదు పట్టుబడే అవకాశం లేకపోలేదు. ఇప్పుడు ఈ అంశం దేశవ్యాప్తంగా తీవ్ర చర్చనీయాంశమవుతోంది.
