ప్రీ-మెనోపాజ్‌కు చాలా కారణాలున్నాయి. 45 -55 సంవత్సరాల మధ్య వయస్సులో మహిళల అండాశయ ఉత్పత్తి ఆగిపోతుంది. ఈస్ట్రోజెన్‌ స్థాలు తగ్గుదలే దీనికి కారణం.
పునరుత్పత్తి చక్రాన్ని నియంత్రించడంలో సహాయపడే హార్మోన్‌ ఈస్ట్రోజెన్‌. సాధారణంగా చిన్న వయసులోనే పీరియడ్స్‌ ఆగిపోవడాన్ని ”ప్రీ-మెనోపాజ్‌” అంటారు. ఈ కాలంలో, మహిళలు గర్భవతి అయ్యే అవకాశాలు చాలా తక్కువ. ప్రీ-మెనోపాజ్‌ సమస్య జీవనశైలి లో మార్పులు, ఆహారపు అలవాట్లకు సంబంధించిన సమస్య అని గైనకాలజిస్టులు చెబుతున్నారు.
ప్రీ-మెనోపాజ్‌కి కారణాలు..?
అండాశయంలో శస్త్రచికిత్స, ఏదైనా వ్యాధికి ఇచ్చే రేడియేషన్‌, అతిగా మద్యం సేవించడం, ధూమపానం, కీమోథెరపీ, వంశ పారంపర్యంగా కూడా ప్రీ-మెనోపాజ్‌ తలెత్తడానికి కారణాలని నిపుణులు చెబుతున్నారు. ఇవే కాకుండా, కొన్ని ఆటో ఇమ్యూన్‌ పరిస్థితులు లేదా ఆటో ఇమ్యూన్‌ సిండ్రోమ్‌లు ఆడవారిలో సర్వసాధారణంగా ఉంటాయి. దీని కారణంగా పీరియడ్స్‌ సడెన్‌ గా ఆగిపోతాయి.
లక్షణాలు.. ఎలా ఉంటాయి..?
ప్రీ-మెనోపాజ్‌ సమయంలో మహిళలకు చిరాకు, యోనిలో దురద, రొమ్ముల్లో వాపు, అధిక వేడి, రొమ్ములలో తేలికపాటి నొప్పి, లైంగిక కోరిక కోల్పోవడం, మానసిక సమస్య, ఎక్కువగా చెమటలు పట్టడం వంటి సమస్యలు కనిపిస్తాయి. అంతేకాదు పని చేయకపోయినా అలసిపోయినట్లు అనిపిస్తుంది. ఒత్తిడి కూడా ఎక్కువగా ఉంటుంది. అయితే, ఈ లక్షణాలు మెనోపాజ్‌కు 6-7 నెలల ముందు కనిపిస్తాయి.
ఆరోగ్యకరమైన ఆహారం..
మహిళలు తమ ఆహారంలో పోషకాహారాన్ని చేర్చుకోవడం ద్వారా శారీరకంగా, మానసికంగా ఆరోగ్యంగా ఉంటారు. ముఖ్యంగా క్యాల్షియం, విటమిన్‌ డి అధికంగా ఉండే ఆహారాన్ని తీసుకోవాలి. ఎందుకంటే మెనోపాజ్‌ తర్వాత మహిళల్లో బోలు ఎముకల వ్యాధి ముప్పు పెరుగుతుంది.
వ్యాయామం..
మంచి నిద్ర, క్రమం తప్పకుండా వ్యాయామం చేయడం వంటివి మానసిక ఒత్తిడిని ఎదుర్కోవడానికి సహాయపడతాయి. మెనోపాజ్‌ కారణంగా బరువు కూడా వేగంగా పెరుగుతారు. వ్యాయామం చేస్తే బరువును నియంత్రించవచ్చు.
ఈ ఆహారానికి దూరంగా ఉండండి..
కెఫిన్‌, ఆల్కహాల్‌ , స్పైసీ ఫుడ్‌ తీసుకోవడం తగ్గించుకోవాలి. వీటిని తీసుకోవడం వల్ల మెనోపాజ్‌ సమయంలో అధికంగా వేడి చేస్తుంది. ఎందుకంటే ఈ ఆహారాలు మెనోపాజ్‌ సమయంలో సంభవించే ‘హీట్‌ ఫ్లాషెస్‌’ని ప్రోత్సహిస్తాయి.
పుష్కలంగా నీరు తాగాలి..
మెనోపాజ్‌ కారణంగా మహిళల్లో చర్మం, జుట్టు, గోర్లు పొడిగా మారుతాయి. ఈ సమస్యలను నివారించడానికి తగినంత నీరు తీసుకోవాలని వైద్యనిపుణులు చెబుతున్నారు. ప్రీ-మెనోపాజ్‌ లక్షణాలు కనిపిస్తే కచ్చితంగా వైద్యులను సంప్రదించాలి.
