లోలోపల..
వివేకినన్న భ్రమలున్నప్పుడు
కండ్లు నెత్తిలకెక్కుతయి!
నాల్కె తిమతిమ..
అతి నోటి దురద..
మాటలు కోటలు దాటుతరు !
తోపు,సిపాయి పదాలు
పల్లవులై మారుమోగుతరు !!
దృష్టి సరిగా లేనప్పుడు
గ్రహణ సంక్లిష్టత సహజం !
నువ్వెంత ఏకాగ్రత పెట్టి
కట్టెల మంట పెట్టినా..
గాలివాటం ఎటుంటదో సెప్పలేం!?
ఒక ఇంటికి
రెండు ప్రవేశద్వారాలున్నప్పుడు
ఒకవైపు తలుపులు మూసేస్తే
రెండోవైపో గొళ్ళెం వుండే ఉంటది!
మీతిమీరిన..
మాటకారితనం వెకిలిప్రక్రియ !
సింప్లిసిటీ..
అగ్ర శిఖరాగ్ర సమానం !!
నిప్పులు..
ఎగదోసుకోవడం ఎంతసేపు!
కలుపుకుపోవడమే
జీవనది అంతిమ పరమార్థం!!
కనీస సహ,ఎరుకలేని
ప్రగల్భ సందర్భాలు
శవాలమీద పేలాల లెక్క !
మనిషిని పురుగులెక్క సూత్తరు !!
పరిణతి,పరిగణన పూరకాలు!
తపన,తండ్లాట మంచిదే
పొయ్యి,పొగ,దర్ప శపథాలు..
మాటైనా,సేతైనా..
నవ్వైనా,నడకైనా
నలుగురు నొచ్చుకోవద్దు కదా!
సామం..
సర్వమోద మాధుకరం !
భేదం ఎదలకు ఖేదం !!
– అశోక్‌ అవారి,
సెల్‌ : 9000576581
