విక్రమ్‌ నటిస్తున్న భారీ పీరియాడిక్‌ యాక్షన్‌ మూవీ ‘తంగలాన్‌’. ఈ చిత్రాన్ని దర్శకుడు పా రంజిత్‌ రూపొందిస్తున్నారు. నీలమ్‌ ప్రొడక్షన్స్‌తో కలిసి స్టూడియో గ్రీన్‌ ఫిలింస్‌ బ్యానర్‌ పై నిర్మాత కేఈ జ్ఞానవేల్‌ రాజా నిర్మిస్తున్నారు. ఈ సినిమాలో పార్వతీ తిరువోతు, మాళవిక మోహనన్‌ హీరోయిన్లుగా నటిస్తున్నారు. కోలార్‌ గోల్డ్‌ ఫీల్డ్స్‌ నేపథ్యంలో యదార్థ ఘటనల ఆధారంగా ఈ సినిమా తెరకెక్కింది. ఈ సినిమా త్వరలోనే వరల్డ్‌ వైడ్‌గా గ్రాండ్‌ థియేట్రికల్‌ రిలీజ్‌కు రెడీ అవుతోంది. తాజాగా ఈ సినిమా నుంచి ‘మనకి మనకి..’ లిరికల్‌ సాంగ్‌ని మేకర్స్‌ రిలీజ్‌ చేశారు. ‘ఈ లిరికల్‌ సాంగ్‌ను జీవీ ప్రకాష్‌ కుమార్‌ మంచి బీట్‌తో కంపోజ్‌ చేశారు. ఈ పాటకు భాస్కరభట్ల సాహిత్యాన్ని అందించగా, సింధూరి విశాల్‌ ఎనర్జిటిక్‌గా పాడారు. ‘మనకి మనకి మనలో మనకి పండగ వచ్చిందే చాన్నాళ్లకి ..అలికీ అలికీ ఊరే అలికీ.. ముగ్గులు ఏసేద్దాం ముంగిళ్లకీ..’ అంటూ సాగుతుందీ పాట. ఓ శుభవార్త విన్న గూడెం ప్రజలంతా సంతోషంలో తేలిపోతున్న సందర్భంలో ఈ పాటను చిత్రీకరించారు. రీసెంట్‌గా రిలీజ్‌ చేసిన ఈ సినిమా ట్రైలర్‌కు హ్యూజ్‌ రెస్పాన్స్‌ వచ్చింది. ఈ ట్రైలర్‌ సోషల్‌ మీడియాలో టాప్‌ ప్లేస్‌లో ట్రెండ్‌ అయ్యింది. ఈ మూవీ మీద ఉన్న క్రేజ్‌ను ట్రైలర్‌కు వచ్చిన రెస్పాన్స్‌ చెప్పకనే చెప్పింది. ప్రేక్షకులకు సరికొత్త అనుభూతిని అందించేందుకు త్వరలోనే ఈ సినిమా విడుదలకు సిద్ధమవుతోంది. ‘ఈ సినిమా కోసం హీరో విక్రమ్‌ మేకోవర్‌ అయిన తీరు అందర్నీ సర్‌ప్రైజ్‌ చేస్తుంది. వినూత్న కథలతోపాటు వైవిధ్యమైన పాత్రలతో ప్రేక్షకులను అలరించడంలో విక్రమ్‌ ఎప్పుడూ ముందుంటారు. ఈ సినిమాలో ఆయన పోషించిన పాత్ర, గెటప్‌, ఆయన హావభావాలు.. ఇలా ప్రతీ ఒక్కటీ థ్రిల్‌ చేసేలా ఉంటుంది. ఆయన కెరీర్‌లోనే ది బెస్ట్‌ సినిమాగా ఈ సినిమా నిలుస్తుంది. త్వరలోనే మరిన్ని అప్‌డేట్స్‌తో విక్రమ్‌ అభిమానులతోపాటు ప్రేక్షకులను కూడా ఆశ్చర్యపరిచేందుకు మేకర్స్‌ సన్నాహాలు చేస్తున్నారు’ అని చిత్ర యూనిట్‌ తెలిపింది. పశుపతి, హరికష్ణన్‌, అన్భు దురై తదితరులు నటిస్తున్న ఈ చిత్రానికి సంగీతం – జీవీ ప్రకాష్‌ కుమార్‌, ఆర్ట్‌ – ఎస్‌ఎస్‌మూర్తి, ఎడిటింగ్‌ – ఆర్కే సెల్వ, స్టంట్స్‌ – స్టన్నర్‌ సామ్‌, నిర్మాత – కేఈ జ్ఞానవేల్‌ రాజా, దర్శకత్వం – పా రంజిత్‌.
