– ఆర్థిక శాఖ మంత్రి హరీశ్ రావు
– గుండెకు, క్యాన్సర్ కు సంబంధించిన వైద్య సేవలు ఇక సిద్దిపేటలోనే మంత్రి
నవతెలంగాణ – సిద్దిపేట
సిద్దిపేట జిల్లా దేవాలయాల , రిజర్వాయర్ల ఖిల్లాగా మారిందని ఆర్థిక శాఖ మంత్రి హరీశ రావు అన్నారు. జిల్లా కేంద్రంలోని గణేష్ నగర్ శ్రీ ప్రసన్నాంజనేయ దేవాలయ ఆవరణంలో నూతనంగా నిర్మించ తలపెట్టిన శ్రీరామ కళ్యాణ మండపం నిర్మాణానికి ఆయన మంగళవారం శంకుస్థాపన చేసి మాట్లాడారు. తెలంగాణ ఏర్పడక ముందు సిద్దిపేట జిల్లాలో ఒక్క రిజర్వాయర్ లేదని సీఎం కేసీఆర్ ప్రత్యేక చొరవతో జిల్లాలో 5 రిజర్వాయర్లను నిర్మించుకున్నామన్నారు. ఇప్పటికే సిద్దిపేట విద్యకు నిలయంగా మారిందన్నారు. అన్ని రకాల చదువుల విద్యాలయాలను ఈ ప్రాంతంలో ఏర్పాటు చేసుకున్నామన్నారు. సిద్దిపేటలో టిటిడి ఆధ్వర్యంలో శ్రీ వెంకటేశ్వర స్వామి ఆలయం నిర్మించాలని టీటిడి బోర్డు చైర్మన్ సుబ్బిరామిరెడ్డిని ఇటీవల కలవడం జరిగిందన్నారు. ఆయన సైతం సానుకూలంగా స్పందించరాన్నారు. త్వరలోనే సిద్దిపేట కోమటి చెరువు వద్ద 6 ఎకరాలలో 25 కోట్లతో నిర్మించనున్న స్వామి ఆలయానికి శంకుస్థాపన చేయబోతున్నామన్నారు. ఇప్పటికే సిద్దిపేటలోని వెంకటేశ్వర స్వామి దేవాలయం తో పాటు శ్రీరాముల వారి దేవాలయాన్ని అభివృద్ధి చేసుకున్నామన్నారు. స్వామివారి ఆశీస్సులతో ప్రజలందరూ ఆరోగ్యంగా సంతోషంగా ఉండాలన్నారు. ప్రతి ఒక్కరు నిత్యం వాకింగ్ తో పాటు యోగ, ప్రాణామయం చేయాలన్నారు. సిద్దిపేటలో వేయి పడకల ఆసుపత్రిని ప్రారంభించకపోతున్నామన్నారు. గుండె, క్యాన్సర్ కు సంబంధించిన వైద్య సేవలను ఉచితంగా ఇకముందు సిద్దిపేటలోనే అందించబోతున్నామన్నారు. చెత్త లేని పరిశుభ్రమైన సిద్దిపేట గా మార్చుకున్నామన్నారు. నాలుగు నెలల లోపే ఈ కళ్యాణ మండపాన్ని పూర్తిస్థాయి సదుపాయాలతో నిర్మించి ఇస్తామన్నారు. ఈ కార్యక్రమంలో ఎంపీ కొత్త ప్రభాకర్ రెడ్డి, ఆలయ అర్చకులు రమణాచార్యులు, ప్రజా ప్రతినిధులు, నాయకులు కడవేర్గు రాజనర్సు, మా రెడ్డి రవీందర్ రెడ్డి, పూజల వెంకటేశ్వరరావు చిన్న, శేషు కుమార్, పెసరు రాజు, బుస శ్రీనివాస్, సత్యనారాయణ, శోభా రఘురాం, సద్ది నాగరాజు రెడ్డి, సాయన్న గారి సుందర్, మాడూరి కిట్టు, లిఖిత్, బాల్ రెడ్డి, శ్రీనివాస్ తదితరులు పాల్గొన్నారు.
