యువ హీరోలు ప్రిన్స్‌, నరేష్‌ అగస్త్య నటించిన సినిమా ‘కలి’. ఈ చిత్రాన్ని కథా రచయిత కె.రాఘవేంద్ర రెడ్డి సమర్పణలో రుద్ర క్రియేషన్స్‌ సంస్థ నిర్మించింది. శివ శేషు దర్శకత్వంలో లీలా గౌతమ్‌ వర్మ నిర్మించారు. సైకలాజికల్‌ థ్రిల్లర్‌ కథతో తెరకెక్కిన ఈ సినిమా ఈనెల 4న గ్రాండ్‌ థియేట్రికల్‌ రిలీజ్‌కు రెడీ అవుతోంది. ఈ నేపథ్యంలో దర్శకుడు శివ శేషు మీడియాతో ముచ్చటించారు. లాక్‌డౌన్‌ టైమ్‌లో ‘కలి’ పేరుతో స్క్రిప్ట్‌ రెడీ చేశాను. రుద్ర క్రియేషన్స్‌ బ్యానర్‌ పై గౌతమ్‌ వర్మ ప్రొడ్యూస్‌ చేసేందుకు ముందుకొచ్చారు. ఈ సినిమా అంతా ఒక లొకేషన్‌లో జరుగుతుంది. ఫిలిం సిటీలో సెట్‌ వేశాం. కె.రాఘవేంద్ర రెడ్డి సమర్పకులుగా వ్యవహరిస్తూ మాకు మంచి సపోర్ట్‌ ఇచ్చారు. జీవితంలో ఎదురయ్యే సమస్యలకు ఆత్మహత్యలు పరిష్కారం కాదు అనే అంశాన్ని మా మూవీలో చెబుతున్నాం. ఇందులో ప్రిన్స్‌ చేసిన శివరామ్‌ క్యారెక్టర్‌ చాలా మంచి వ్యక్తి. అతని మంచితనం వల్ల ఎన్నో ఇబ్బందులు ఎదుర్కొంటాడు. మెత్తగా ఉండేవాడిని సొసైటీ ఆడుకుంటుంది. అలా అతి మంచితనంతో ఉన్న శివరామ్‌ సమస్యల వల్ల ఆత్మహత్య చేసుకోవాలని అనుకుంటాడు. ఆ సమయంలో అతని ఇంటికి ఓ అపరిచిత వ్యక్తి వస్తాడు. ఈ క్యారెక్టర్‌ని నరేష్‌ అగస్త్య చేశాడు. అతను వచ్చాక శివరామ్‌ లైఫ్‌లో జరిగిన ఘటనలు ఏంటి అనేది ఈ చిత్ర కథాంశం. మన పురాణాల్లోని కలి పురుషుడి పాత్రను స్ఫూర్తిగా తీసుకుని ఈ మూవీ చేశాను. సమయాన్ని, ఆత్మను ఆధారం చేసుకుని ఈ యుగాన్ని ప్రభావితం చేసే కలిని మా కథలో ఎలా చూపించాం అనేది ఈనెల 4న థియేటర్స్‌లో చూడండి. రెండు పాత్రల మధ్య కథ సాగినా గ్రిప్పింగ్‌ స్క్రీన్‌ప్లేతో సినిమా మొత్తం ఆసక్తికరంగా ఉంటుంది.
