రాకేష్‌ వర్రే టైటిల్‌ రోల్‌ పోషిస్తున్న చిత్రం ‘జితేందర్‌ రెడ్డి’. ‘ఉయ్యాలా జంపాల, మజ్ను’ సినిమాలు తీసిన విరించి వర్మ దర్శకత్వం వహిస్తున్న ఈ చిత్రం ఈనెల 8న ప్రేక్షకుల ముందుకు రానుంది. ఇటీవల విడుదలైన ట్రైలర్‌ అందరినీ ఆకట్టుకుంటూ సినిమాపై మంచి అంచనాలు ఏర్పడేలా చేసింది. ట్రైలర్‌ ఆద్యంతం ఆకట్టుకునే అంశాలతో ఉండగా, ప్రధాన పాత్ర పోషించిన రాకేష్‌ నటన హైలైట్‌గా నిలిచింది. నిజ జీవిత ఘటనలు ఆధారంగా తెరకెక్కిన ఈ చిత్రంలో అన్ని సన్నివేశాలను చక్కగా చిత్రీకరించారు. కాలేజీ రోజుల నుంచే ప్రజా సమస్యల కోసం పోరాడుతూ దేశం కోసం, ధర్మం కోసం నక్సలైట్లతో జితేందర్‌ రెడ్డి చేసిన పోరాటాన్ని ఈ సినిమాలో చూపించారు. అంతే కాకుండా ఆ తర్వాత అతను రాజకీయాల్లోకి రావడం, అప్పట్లో ముఖ్యమంత్రిగా ఉన్న సీనియర్‌తో మాట్లాడటం ట్రైలర్‌లో చూపించారు. యాక్షన్‌ డ్రామాగా రాబోతున్న ఈ చిత్రంలో డైలాగ్స్‌ ప్రధాన ఆకర్షణగా ఉన్నాయి. చక్కని కెమెరా వర్క్‌కి నేపథ్య సంగీతం కూడా తోడవడం కలిసొచ్చే అంశం. టెక్నికల్‌గా ఈ సినిమా అన్ని విభాగాల్లో టాప్‌గా నిలిచింది. రాకేష్‌ ఇప్పటి వరకు పోషించిన అన్ని పాత్రల్లోకి ఇది చాలా డిఫరెంట్‌ అని తెలుస్తుంది. 1980 కాలంలో జగిత్యాల చుట్టు పక్కల జరిగిన యదార్థ సంఘటనల ఆధారంగా తెరకెక్కిన సినిమా ఇది అని చిత్ర బృందం తెలిపింది. ముదుగంటి క్రియేషన్స్‌ పై ముదుగంటి రవీందర్‌ రెడ్డి ఈ చిత్రాన్ని నిర్మించారు.
