మనం ఏ రంగంలో ఉన్నా అందులో ఉన్నత స్థానానికి చేరుకోవాలని కోరుకుంటాం. మనకంటూ ఓ ప్రత్యేక గుర్తింపు సొంతం చేసుకోవాలని తపిస్తుంటాం. అయితే ఇవి సాధ్యం కావాలంటే ఆత్మవిశ్వాసం తప్పనిసరి. గుండెల నిండా ఆత్మ విశ్వాసం ఉన్నవారు దేన్నైనా సాధింగలరు. ఎలాంటి సమస్యలనైనా ఎదర్కోగలరు. అయితే కొందరు చిన్న చిన్న విషయాలకే బోల్డంత ఆత్మన్యూనతకు లోనై మధ్యలోనే కాడిపడేస్తుంటారు. ఇది మన వల్ల ఏమవుతుంది? అని నిరుత్సాహానికి గురవతుంటారు. వారిలో ఆత్మవిశ్వాసం లేకపోవడమే దీనికి కారణం. ఆత్మవిశ్వాసం ఉండాలే గానీ.. ఏదైనా సాధించగలమనే నమ్మకం వస్తుంది.
వ్యక్తిగత విషయాల్లో అయినా.. వృత్తిలో అయినా ఆత్మవిశ్వాసంతో తీసుకునే నిర్ణయాలు, చేసే పనుల్లో మంచి ఫలితాలు వస్తాయి. ఇతరులతో సత్సంబంధాలు కొనసాగించగలరు. కొత్త విషయాలను నేర్చుకోవడానికి, సవాళ్లను ఎదుర్కొవడానికి సిద్ధంగా ఉంటారు. కానీ కొంతమందిలో ఇదే లోపించి.. ఏ పనీ చేయలేకపోతుంటారు. ఏ పని చేయాలన్నా ఇతరులపై ఆధారపడాల్సి వస్తోందని బాధపడుతుంటారు. అలాంటి వారికి తొలుత వారి శక్తి సామర్థ్యాలపై వారికి బలమైన నమ్మకం ఉండాలి. మనం బాగా చేయగలిగే పనులను గుర్తించాలి.
అలాగే మంచి స్నేహితులతో గడపాలి. అంటే మనల్ని గుర్తించి ప్రోత్సహించే మిత్రుల వెన్నటి నడవాలి. కొంతమంది కావాలని మిమ్మల్ని తక్కువ చేసి మాట్లాడుతుంటారు. ఇటువంటి వారి వల్ల మీ ఆత్మవిశ్వాసం దెబ్బతింటుంది. కాబట్టి అటువంటి వారిని దూరం పెట్టడమే మంచిది. అలాగే మీరు ఎంచుకున్న లక్ష్యాలు సాధించగలిగనవై ఉండాలి. ఆచరణ సాధ్యం కాని గోల్స్‌ ఎట్టి పరిస్థితుల్లోనూ పెట్టుకోవద్దు. వాటి వల్ల ఇతర పనులు కూడా చేయలేరు. దీంతో ఏం చేయలేమన్న స్థితికి చేరుకుంటారు.
జీవితం పోటీ కాదు. ఎవరి జీవితాలు వారివి. ఒకరి స్థితిగతులు ఎలా ఉంటాయనేది వారి చేతుల్లోనే ఉంటుంది. కాబట్టి.. ఇతరులతో పోల్చి చూసుకోవడం మానేయాలి. ఎవరితోనూ ఎప్పుడూ మిమ్మల్ని పోల్చుకోవద్దు. ఇతరులతో పోల్చుకోవడం వల్ల అసూయ ఏర్పడుతుంది. దాని వల్ల వ్యక్తులు తమకు తాము తక్కువ చేసుకోవడంతో ఆత్మవిశ్వాసం సన్నగిల్లుతుందని ఎన్నో పరిశోధనల్లో తేలింది. ప్రతి మనిషికి భయాలు ఉంటాయి. కానీ ఆ భయాలను జయిస్తేనే విజయాలు దక్కుతాయి. సవాలు ఎదురైతే భయపడి తప్పుకునే ప్రయత్నం చేయొద్దు. సవాళ్లను ధైర్యంగా ఎదుర్కోవాలి. తొలి ప్రయత్నంలో ఓడినా భయం తొలగి.. ఆత్మవిశ్వాసం పెరుగుతుంది. ఓటమి నుంచి పాఠాలు నేర్చుకునే అవకాశం లభిస్తోంది. దీంతో భవిష్యత్తులో విజయాలను అందుకునే ఆస్కారముంది.
మరీ ముఖ్యంగా నా వల్ల కాదు.. అసలు చేయగలనా?.. ఇది అసాధ్యం.. వంటి మాటలు మీ నోటి వెంట రాకుండా చూసుకోండి. అలాంటి మాటలు మిమ్మల్ని మరింత కుంగదీస్తాయి. దేన్నైనా నేను సాధించగలను అనే భావనతో ఉండాలి. నేను చేయగలను.. సాధించగలను అని మీకు మీరే తరచూ చెప్పుకుంటూ ఉండటం వల్ల మీలో ఆత్మవిశ్వాసం రెట్టింపవుతుంది. అలాగే ఒంటరితనం మీ ఆత్మవిశ్వాసాన్ని దెబ్బతీస్తుంది. ఏం చేయలేమన్న స్థితికి చేరుస్తుంది. అందువల్ల ఒంటరిగా ఉండటానికి ఇష్టపడకుండా.. నలుగురితో కలిసి వెళ్లే ప్రయత్నం చేయండి. తద్వారా మీరు విజయానికి చేరువవుతారని గమనించండి. అలాగే మీరు ధరించే దుస్తులు కూడా మీ ఆత్మవిశ్వాసాన్ని తెలుపుతాయి. అందువల్ల మీకు నచ్చిన దుస్తులు ధరించేందుకు వెనుకాడకండి.
