ప్రశాంత్‌ కష్ణ, అనీషా ధామ, శ్రీనివాస్‌ రామిరెడ్డి, ఐశ్వర్య హోలక్కల్‌ తదితరులు కీలక పాత్రల్లో నటిస్తున్న సినిమా ‘డ్రీమ్‌ క్యాచర్‌’. ఈ చిత్రాన్ని సీయెల్‌ మోషన్‌ పిక్చర్స్‌ బ్యానర్‌ పై దర్శకుడు సందీప్‌ కాకుల రూపొందిస్తున్నారు. అన్ని కార్యక్రమాలు పూర్తి చేసుకున్న ఈ సినిమా జనవరి 3న గ్రాండ్‌ థియేట్రికల్‌ రిలీజ్‌కు రెడీ అవుతోంది. ఈ నేపథ్యంలో శుక్రవారం ఈ సినిమా ప్రీ రిలీజ్‌ ఈవెంట్‌ను ఘనంగా నిర్వహించారు. హీరో ప్రశాంత్‌ కష్ణ మాట్లాడుతూ, ‘సైకలాజికల్‌ థ్రిల్లర్‌గా సరికొత్త ఎక్స్‌పీరియన్స్‌ను ఈ సినిమా మీ అందరికీ ఇస్తుంది. ట్రైలర్‌ చూశాక అడివిశేష్‌, రానాలా నేను ఉన్నానంటూ కామెంట్స్‌ వస్తున్నాయి. వాళ్లు గొప్ప యాక్టర్స్‌, సెల్ఫ్‌ మేడ్‌ స్టార్స్‌. అలాంటి టాలెంటెడ్‌ ప్యాషనేట్‌ యాక్టర్స్‌తో నన్ను పోల్చడం సంతోషంగా ఉంది’ అని తెలిపారు. ‘సినిమా చేయాలనేది నా డ్రీమ్‌. కలల మీద సినిమా చేస్తే ఎలా ఉంటుందనే ఆలోచనతో ఈ ‘డ్రీమ్‌ క్యాచర్‌’ మూవీ మొదలైంది. ఇన్‌సెప్షన్‌ లాంటి హాలీవుడ్‌ మూవీస్‌ నాకు స్ఫూర్తిగా నిలిచాయి. ఒక హాలీవుడ్‌ స్థాయి అటెంప్ట్‌ చేయాలని అనుకున్నాను. మనకున్న రిసోర్సెస్‌లో మొత్తం హైదరాబాద్‌లోనే సినిమా రూపొందించాను. ట్రైలర్‌, పోస్టర్స్‌ చూసి ఈ మూవీ ఎక్కడ షూటింగ్‌ చేశారని అడుగుతున్నారు. మేము ఎక్కడికీ వెళ్లలేదు. హైదరాబాద్‌లోనే షూట్‌ చేశాం. కలల నేపథ్యంగా ఇలాంటి సినిమా ఇప్పటిదాకా తెలుగులో రాలేదని చెప్పగలను. గంటన్నర నిడివితో సినిమా ఉంటుంది. పాటలు, ఫైట్స్‌ ఉండవు. అవి లేకుండా కేవలం కథ మీదనే మూవీ వెళ్తుంది’ అని డైరెక్టర్‌ సందీప్‌ కాకుల చెప్పారు.
