నల్లా పైప్‌లు మరకలు, రస్ట్‌ పట్టి చూడ్డానికి ఇబ్బందిగా మారతాయి. వీటిని క్లీన్‌ చేయడానికి సొల్యూషన్స్‌ని బయట కొనాల్సిన అవసరం లేదు. ఇంట్లో ఉండే పదార్థాలతోనే క్లీన్‌ చేయొచ్చు. ఆ పదార్థాలేంటి? వీటితో పైపులని ఎలా క్లీన్‌ చేయాలో చూద్దాం…
డిష్‌వాష్‌తో..
ఓ చిన్న గిన్నెలో నీరు పోసి గిన్నెలు కడిగేందుకు వాడే డిష్‌ వాష్‌ సోప్‌ లేదా లిక్విడ్‌ని అందులో వేసి కలపండి. తడిసిన పైపులపై దీనిని రాయాలి. కొద్దిసేపటి ఆ తర్వాత బ్రష్‌తో పైపులని క్లీన్‌ చేస్తే అవి కొత్తవాటిలా మెరుస్తాయి.
టూత్‌పేస్ట్‌తో…
మనం రోజూ వాడే టూత్‌పేస్ట్‌ని కూడా ట్యూబ్‌లు, పైపులపై మరకలు ఉండే చోట రాయాలి. కాసేపు అలానే ఉంచాలి. ఆ తర్వాత వాటిని క్లీన్‌ చేయాలి. ఈజీగా మరకలు పోతాయి.
నీటి మరకలు దూరమయ్యేందుకు
ఇక బాత్‌రూమ్‌లో షవర్‌, పైపులపై నీటి మరకలు పడుతుంటాయి. వీటిని క్లీన్‌ చేసేందుకు ఓ గిన్నెలో డిటర్జెంట్‌ పొడిని వేయాలి. అందులో నిమ్మరసం పిండాలి. దీనిని పేస్టులా చేయాలి. పైపులకి దీనిని అప్లై చేసి 5 నిమిషాల పాటు నానబెట్టాలి. తర్వాత స్క్రబ్‌తో రుద్ది మరకల్ని క్లీన్‌ చేయాలి.
బేకింగ్‌ సోడాతో
4 చెంచాలా బేకింగ్‌ సోడా, 2 చెంచాల నిమ్మరసం, డిటర్జెంట్‌ పౌడర్‌ కొద్దిగా, అరకప్పు వెనిగర్‌ తీసుకోవాలి. వీటన్నింటిని ఓ గిన్నెలో పోయాలి. అందులోనే కప్పు నీరు పోయాలి. ఈ మిశ్రమాన్ని ఓ పాలిథిన్‌ కవర్‌లో పోయాలి. దీనిలో షవర్‌ మునిగేలా కట్టండి. రాత్రంతా అలానే ఉంచండి. మరుసటి ఉదయం కవర్‌ తీసేసి పాడైపోయిన టూత్‌బ్రష్‌తో మొత్తం క్లీన్‌ చేయండి. షవర్‌ కొత్తదిగా మెరుస్తుంది.
