బెంగళూరు : ప్రధానమంత్రిపై దుర్భాషలాడటం రాజద్రోహం కాదని, పాఠశాల యాజమాన్యంపై రాజద్రోహ కేసును రద్దు చేస్తూ కర్నాటక హైకోర్టు పేర్కొంది. బీదర్‌లోని షాహీన్‌ స్కూల్‌ యాజమాన్యంపై బీదర్‌ న్యూ టౌన్‌ పోలీస్‌ స్టేషన్‌ దాఖలు చేసిన ఎఫ్‌ఐఆర్‌ను హైకోర్టు కాల్బుర్గి బెంచ్‌ న్యాయమూర్తి జస్టిస్‌ హేమంత్‌ చందంగౌడ్‌ రద్దు చేశారు.ఐపీసీ సెక్షన్‌ 153(ఎ)లోని అంశాలు ఈ కేసులో కనిపించలేదని కోర్టు పేర్కొంది. ‘ప్రధానిని పాదరక్షలతో కొట్టాలని దుర్భాషలాడటం అవమానకరం. ప్రభుత్వ విధానంపై నిర్మాణాత్మక విమర్శలు అనుమతిం చదగినవే. కానీ విధానపరమైన నిర్ణయం తీసుకున్నందుకు రాజ్యాంగాదికారులను అవమానించలేం. కొన్ని వర్గాలకు అభ్యంతరం ఉండవచ్చు’ అని జస్టిస్‌ చందంగౌడ్‌ తన తీర్పులో పేర్కొన్నారు.పిల్లలు ప్రదర్శించిన నాటకం ప్రభుత్వం వివిధ చట్టాలను విమర్శించిందని.. ‘అలాంటి చట్టాలను అమలు చేస్తే, ముస్లింలు దేశం విడిచి వెళ్లవలసి ఉంటుంది’ అని ఆరోపించబడినప్పటికీ, పాఠశాల ఆవరణలో నాటకం ప్రదర్శించబడిందని కోర్టు పేర్కొంది. హింసను ఆశ్రయించమని లేదా ప్రజా అశాంతిని సృష్టించడానికి ప్రజలను ప్రేరేపించే మాటలు పిల్లలతో చెప్పబడలేదని న్యాయస్థానం తెలిపింది. నిందితుల్లో ఒకరు తన సోషల్‌ మీడియా ఖాతాలో నాటకాన్ని అప్‌లోడ్‌ చేయడంతో నాటకం ప్రజలకు తెలిసిందని హైకోర్టు పేర్కొంది. ప్రజలను ప్రేరేపించే ఉద్దేశంతో లేదా ప్రజా అశాంతిని సృష్టించే ఉద్దేశంతో ఈ నాటకాన్ని ప్రదర్శించారని చెప్పలేమని పేర్కొంది. ఈ విషయంలో సెక్షన్‌ 124-ఎ, సెక్షన్‌ 505 (2) కింద నేరం కోసం ఎఫ్‌ఐఆర్‌ నమోదు చేయడం అనుమతించబడదని కోర్టు పేర్కొంది.
జనవరి 21, 2020న 4, 5, 6 తరగతుల విద్యార్థులు పౌరసత్వ సవరణ చట్టం (సీఏఏ), జాతీయ పౌరసత్వ రిజిస్టర్‌ (ఎన్నార్సీ)కి వ్యతిరేకంగా నాటకాన్ని ప్రదర్శించిన తర్వాత పాఠశాల యాజమాన్యంపై రాజద్రోహం కింద కేసు నమోదైంది. దీనిపై విచారణ జరిపిన న్యాయస్థానం ఎఫ్‌ఐఆర్‌ను కొట్టేస్తూ తీర్పు చెప్పింది.
