‘బడ్జెట్‌ కాదు కథలే ఇంపార్టెంట్‌. మేము కూడా కథల్ని నమ్ముకుని సినిమాలను నిర్మించాం. అయితే మేము కూడా కాంబినేషన్స్‌ అని గత నాలుగు ఐదు ఏళ్ళుగా తడబడు తున్నాం. దర్శకుడు అనిల్‌ మళ్ళీ మాకు రూటు చూపించారు. ‘సంక్రాంతికి వస్తున్నాం’ సినిమా సెన్సేషనల్‌ హిట్‌. ఈ సక్సెస్‌తో తను మాకొక రహదారి వేసి ఇచ్చాడు. మా సంస్థ నుంచి అద్భుతమైన సినిమాలు రావడానికి ఇది మాకు ఒక బిగ్‌ ఎనర్జీ. ఈ సక్సెస్‌ కూడా మాకొక గుణపాఠం నేర్పించింది’ అని నిర్మాత దిల్‌రాజు అన్నారు.
వెంకటేష్‌, అనిల్‌ రావిపూడి, శ్రీవెంకటేశ్వర క్రియేషన్స్‌ కాంబినేషన్‌లో రూపొందిన చిత్రం ‘సంక్రాంతికి వస్తున్నాం’.
దిల్‌ రాజు సమర్పణలో శిరీష్‌ ఈ చిత్రాన్ని నిర్మించారు. మీనాక్షి చౌదరి, ఐశ్వర్య రాజేష్‌ హీరోయిన్స్‌గా నటించారు. జనవరి 14న ప్రపంచవ్యాప్తంగా ప్రేక్షకుల ముందుకు వచ్చిన ఈ చిత్రం అందరినీ అద్భుతంగా అలరించి, రికార్డ్‌ బ్రేకింగ్‌ హౌస్‌ ఫుల్‌ కలెక్షన్స్‌తో పొంగల్‌కి బ్లాక్‌బస్టర్‌ విజయాన్ని అందుకుంది. అంతేకాకుండా ఇంకా సక్సెస్‌ఫుల్‌గా రన్‌ అవుతోంది. ఈ నేపథ్యంలో మేకర్స్‌ డిస్ట్రిబ్యూటర్స్‌ గ్రాటిట్యూడ్‌ మీట్‌ నిర్వహించారు.
ఊహించనివి రెండు జరిగాయి : అనిల్‌ రావిపూడి
‘ప్రేక్షకులు లేకపోతే ఈ విజయాన్ని మేం ఊహించలేం. ఎర్లీ మార్నింగ్‌ షోస్‌కి ఫ్యామిలీస్‌తో కలిసి సినిమా చూశారంటే మామూలు విషయం కాదు. ఇలాంటి అద్భుతాలు చూస్తూ ఎంజారు చేయడమే. నా కెరీర్‌లో ఇదొక మిరాకిల్‌. ఈ విజయాన్ని ఆస్వాదిస్తున్నాను. ఈ సినిమా సక్సెస్‌లో మేజర్‌ క్రెడిట్‌ వెంకటేష్‌కి దక్కుతుంది. మీనాక్షి చౌదరి, ఐశ్వర్య చాలా అద్భుతంగా పెర్ఫామ్‌ చేయడంతో పాటు ప్రమోషన్స్‌లో కూడా చాలా హెల్ప్‌ చేశారు. నిర్మాత హ్యాపీగా ఉండాలనే టార్గెట్‌ పెట్టుకుని సినిమాను తీస్తుంటాను. ఇప్పటివరకు ఎనిమిది సినిమాలు చేస్తే ఆరు సినిమాలు దిల్‌రాజుతో చేశాను. ఎస్‌విసీ బ్యానర్‌ ఎన్నో గొప్ప సినిమాలు తీసిన బ్యానర్‌. ఆ బ్యానర్‌ కొన్ని జనరేషన్స్‌ వరకు ఉండాలి, ఉంటుంది. డిస్ట్రిబ్యూటర్స్‌ ఈవెంట్ చేయడం చాలా ఆనందంగా ఉంది. డిస్ట్రిబ్యూటర్స్‌కి వచ్చిన నెంబర్స్‌ అన్ని చాలా అద్భుతంగా ఉన్నాయి. ఈ సంవత్సరం సంక్రాంతి డిస్ట్రిబ్యూటర్స్‌కి మెమరబుల్‌ అయింది. ఈ సినిమా ద్వారా నేనెప్పుడూ వినలేను, చూడలేనేమో అనుకునేవి రెండు జరిగాయి. ఆరు రోజుల్లో 100 కోట్లు షేర్‌ కొట్టింది. రీజనల్‌ ఫిలింకి చూడలేనేమో అనుకున్న 300 కోట్ల గ్రాస్‌ నెంబర్‌ చూడబోతున్నాను. చాలా హ్యాపీగా ఉంది. నెక్స్ట్‌ చేయబోయే సినిమాలకు చాలా బాధ్యత పెరిగింది. నెక్స్ట్‌ ఎగ్జిబిటర్స్‌తో కూడా ఒక ఈవెంట్ చాలా గ్రాండ్‌గా నిర్వహించి, ఈ సినిమా సక్సెస్‌ షీల్డ్స్‌ని ఇవ్వాలని భావిస్తున్నాం’.
డిస్ట్రిబ్యూటర్లని తలెత్తుకునేలా చేసిన సినిమా : నిర్మాత శిరీష్‌
‘ఇంత పెద్ద సక్సెస్‌ ఇచ్చిన అనిల్‌ రావిపూడికి థ్యాంక్స్. ఎప్పుడూ మాతోనే ఇలానే ఉండాలి. డిస్ట్రిబ్యూటర్స్‌ని హ్యాపీగా చేస్తూ సినిమాలు తీస్తూనే ఉండాలి. మా సంస్థ డిస్ట్రిబ్యూషన్‌ నుంచే మొదలైంది. ఒక 20 ఏళ్ల క్రితం డిస్ట్రిబ్యూటర్‌కి ఉన్న విలువ ఈరోజు లేదు ఇలాంటి సమయంలో డిస్ట్రిబ్యూటర్‌ తలెత్తుకునేలా చేసిన సినిమా ‘సంక్రాంతికి వస్తున్నాం’. నిజాయితీగా ఈ సినిమా ఇంత చేసింది అని తలెత్తుకుని చెప్తున్న సభ ఇది. మాతోపాటు జర్నీ చేస్తున్న మా డిస్ట్రిబ్యూటర్స్‌ అందరికీ కృతజ్ఞతలు’.
పాన్‌ ఇండియా రికార్డులను బ్రేక్‌ చేసిన లోకల్‌ సినిమా
‘పాన్‌ ఇండియా సినిమాలే కాదు.. లోకల్‌ సినిమాలూ రికార్డులను బ్రేక్‌ చేస్తాయని ఈ సినిమా నిరూపించింది. ఒక్కమాటలో చెప్పాలంటే పాన్‌ ఇండియా రికార్డులను బ్రేక్‌ చేసిన లోకల్‌ సినిమా ‘సంక్రాంతికి వస్తున్నాం’ అని పంపిణీదారులు సాయి కష్ణ, రాజేష్‌ దండా, హరి, శోభన్‌, ఎల్విఆర్‌ అన్నారు.
