– ఆరుగురు మృతి
– మరో 19 మంది ప్రయాణికులకు గాయాలు
ఖాట్మండు : నేపాల్‌లో గురువారం ఉదయం ఘోర ప్రమాదం చోటుచేసుకుంది. మొత్తం 26 మంది యాత్రీకులతో వెళుతున్న బస్సు అదుపుతప్పి లోయలో పడిపోయింది. ఈ ప్రమాదంలో మొత్తం ఏడుగురు మరణించగా.. ఆరుగురు భారతీయులేనని నేపాల్‌ అధికారులు తెలిపారు. ప్రమాదం జరిగిన వెంటనే ఘటనా స్థలానికి చేరుకున్న పోలీసులు.. యాత్రీకులను బస్సులో నుంచి బయటకు తీశారు. గాయపడిన వారిని హెటౌడలోని వివిధ ఆసుపత్రులకు తరలించి చికిత్స అందించే ఏర్పాట్లు చేసినట్లు తెలిపారు. నేపాల్‌లో పర్యటన నిమిత్తం రాజస్థాన్‌కు చెందిన పలువురు గురువారం ఉదయం బస్సులో ఖాట్మాండు నుంచి జానక్‌ పూర్‌ బయలుదేరారు. జీత్‌పూర్‌ సిమారాలోని చురియమై ఆలయం సమీపంలో బస్సు అదుపుతప్పింది. దీంతో రోడ్డు పక్కనే ఉన్న 15 మీటర్ల లోయలో పడిపోయింది. ప్రమాద సమయంలో బస్సులో సుమారు 26 మంది ప్రయాణికులు ఉన్నారు. కాగా, ప్రమాదం తర్వాత ప్రాణాలతో బయటపడ్డ బస్సు డ్రైవర్‌ ను పోలీసులు అదుపులోకి తీసుకుని ప్రశ్నిస్తున్నారు.
