హీరో ఆనంద్‌ దేవరకొండ నటిస్తున్న కొత్త సినిమా ‘డ్యూయెట్‌’. ఈ చిత్రాన్ని స్టూడియో గ్రీన్‌ బ్యానర్‌లో కేఈ జ్ఞానవేల్‌ రాజా నిర్మిస్తున్నారు. మధుర శ్రీధర్‌ రెడ్డి సహ నిర్మాతగా వ్యవహరిస్తున్నారు. ఏఆర్‌ మురుగదాస్‌ దగ్గర పనిచేసిన మిథున్‌ వరదరాజ కష్ణన్‌ ఈ సినిమాతో దర్శకుడిగా పరిచయమవు తున్నారు. ఈ చిత్రంలో రితిక నాయక్‌ హీరోయిన్‌గా నటిస్తోంది. గురువారం హైదరాబాద్‌ అన్నపూర్ణ స్టూడియోస్‌లో ఈ సినిమా ప్రారంభోత్సవం వైభవంగా జరిగింది. ఈ కార్యక్రమంలో హీరో విజరు దేవరకొండ, దర్శకులు హరీశ్‌ శంకర్‌, చందూ మొండేటి, సాయి రాజేశ్‌, హీరో సత్య దేవ్‌, ఆనంద్‌ పేరెంట్స్‌ గోవర్థన్‌ దేవరకొండ, మాధవి అతిథులుగా హాజరయ్యారు. మూహూర్తపు సన్నివేశానికి హీరో, హీరోయిన్లపై దర్శకుడు హరీశ్‌ శంకర్‌ క్లాప్‌ నివ్వగా, దర్శకుడు సాయిరాజేశ్‌, జ్ఞానవేల్‌ రాజా, సహ నిర్మాత మధుర శ్రీధర్‌ స్క్రిప్ట్‌ను దర్శకుడు మిథున్‌కి అంద జేశారు. ఫస్ట్‌ షాట్‌ డైరెక్షన్‌ చందూ మొండేటి చేశారు. ఆనంద్‌ పేరెంట్స్‌ గోవర్ధన్‌ దేవరకొండ, మాధవి దేవరకొండ కెమెరా స్విచ్ఛాన్‌ చేశారు. ఈ సందర్భంగా కో ప్రొడ్యూసర్‌ మధుర శ్రీధర్‌ రెడ్డి మాట్లాడుతూ,’ స్టూడియో గ్రీన్‌ సంస్థ జ్ఞానవేల్‌ రాజాతో కలిసి ఈ సినిమా ప్రొడ్యూస్‌ చేయడం హ్యాపీగా ఉంది. ఆనంద్‌ చేస్తున్న మరో వైవిధ్యమైన ప్రేమ కథా చిత్రమిది’ అని తెలిపారు. ‘ఈ సినిమాతో టాలీవుడ్‌కు దర్శకుడిగా పరిచయం కావడం సంతోషంగా ఉంది. ఇదొక మంచి లవ్‌ స్టోరీ’ అని దర్శకుడు మిథున్‌ వరదరాజ కష్ణన్‌ చెప్పారు.
నిర్మాత కేఈ జ్ఞానవేల్‌ రాజా మాట్లాడుతూ, ‘నాకు లవ్‌ స్టోరీస్‌ కంటే యాక్షన్‌, కమర్షియల్‌ ఎంటర్‌ టైనర్స్‌ ఇష్టం. అయితే మిథున్‌ ఈ కథ చెప్పినప్పుడు చాలా సందర్భాల్లో ఎమోషనల్‌ అయ్యాను. అట్లీ ఫస్ట్‌ మూవీ ‘రాజా రాణి’ చూసినప్పుడు ఎలాంటి భావోద్వేగానికి గురయ్యానో ఈ కథ విన్నప్పుడు కూడా అలాంటి ఫీల్‌ కలిగింది. వారం రోజుల్లో ఫస్ట్‌ షెడ్యూల్‌ స్టార్ట్‌ చేస్తాం. ఈ సినిమా సూపర్‌ హిట్‌ ఖాయం’ అని తెలిపారు.
ఇది నాకొక స్పెషల్‌ మూవీ. ఈ మూవీకి నన్ను సెలెక్ట్‌ చేసుకున్న నిర్మాతలు జ్ఞానవేల్‌ రాజా, మధుర శ్రీధర్‌కి థ్యాంక్స్‌. జ్ఞానవేల్‌ తమిళంలో సూర్య, కార్తితో పెద్ద మూవీస్‌ చేశారు. ఇక్కడ నాతో, మా అన్నయ్యతో అలాగే ప్రొడ్యూస్‌ చేయాలి. మా సినిమాకు జీవీ ప్రకాష్‌ కుమార్‌ మ్యూజిక్‌ డైరెక్టర్‌ అనగానే చాలా హ్యాపీగా ఫీలయ్యా. ‘ఆడుకాలం’ మూవీ నుంచి నేను ఆయనకు అభిమానిని. ‘అశోకవనంలో అర్జున కల్యాణం’ మూవీలో రితిక సూపర్బ్‌గా నటించింది. మిథున్‌ అమేజింగ్‌ స్టోరీ రాశాడు. మా టీమ్‌తో కలిసి ఒక మంచి మూవీ చేయబోతున్నాం.
– హీరో ఆనంద్‌ దేవరకొండ
