విజయ్ సేతుపతి, వెట్రీమారన్‌ కలయికలో రూపొందిన ‘విడుదల -1’ చిత్రం ఎంతటి ఘన విజయం సాధించిందో ప్రత్యేకంగా చెప్పాల్సిన అవసరం లేదు. ఇప్పుడు ఈ చిత్రానికి సీక్వెల్‌గా ఇదే కాంబినేషన్‌లో రూపొందుతున్న చిత్రం ‘విడుదల-2’. ఈనెల 20న ఈ చిత్రం ప్రపంచవ్యాప్తంగా విడుదల కానుంది.
ఈ చిత్ర తెలుగు హక్కులను దక్కించుకున్న నిర్మాత, శ్రీ వేదాక్షర మూవీస్‌ అధినేత చింతపల్లి రామారావు మాట్లాడుతూ, ‘ఇటీవల విడుదల చేసిన ఈ చిత్రంలోని పాటలకు, ట్రైలర్‌కు మంచి స్పందన వస్తోంది. పరిపాలకుల అహంకారానికి అణచివేయబడిన సామాన్యుల నుంచి ఉధ్భవించిన ఒక అసామాన్యుడి వీర విప్లవ గాథే ఈ సినిమా. ఇది తమిళ చిత్రం కాదు. తెలుగు రాష్ట్రాల్లోని సమస్యలు, ఇక్కడ జరిగిన సంఘటనలు ఆధారంగా తీసిన చిత్రమిది. నక్సలైట్‌ పెరుమాళ్‌ పాత్రలో విజరు సేతుపతి నటన, పాత్రలోని ఎమోషన్‌, ఆయన పండించిన విధానం అద్భుతం. ఏడు సార్లు నేషనల్‌ అవార్డు అందుకున్న వెట్రిమారన్‌ దర్శకత్వ ప్రతిభ గురించి ప్రత్యేకంగా చెప్పాల్సిన పని లేదు. ఇక ఈ చిత్రానికి ఇళయరాజా ప్రళయం లాంటి సంగీతాన్ని అందించారు. ఫైట్‌ మాస్టర్‌ పీటర్‌ హెయిన్స్‌ ఇప్పటి వరకు ఇండియన్‌ స్క్రీన్‌పై చూడని పోరాటాలు సమాకూర్చారు. మంజు వారియర్‌ సహజ నటన ఈ చిత్రానికి ప్లస్‌ అవుతుంది. ఈనెల 20న తెలుగు, తమిళ భాషల్లో ఏకకాలంలో విడుదల కానున్న ఈ చిత్రం బ్లాక్‌బస్టర్‌ విజయాన్ని సాధిస్తుందనే నమ్మకం ఉంది’ అని అన్నారు.
