టైటిల్‌తోనే అందరినీ ఆకర్షిస్తోన్న సెటైరికల్‌ ఫన్నీ ఎంటర్టైనర్‌ ‘పైలం పిలగా’. వ్యవసాయం చేస్తే కడుపు నిండుతుంది కానీ కోట్లు కూడబెట్టలేమని బలంగా నమ్మిన ఓ యువకుడికి అనుకోకుండా సొంతూళ్లోనే కోట్ల రూపాయల బిజినెస్‌ చేసుకునే అవకాశం దొరుకుతుంది. కానీ పద్మవ్యూహం లాంటి బ్యూరోక్రసీ వలలో చిక్కుకుని ఎలాంటి అవస్థలు పడ్డాడు?, చివరకు ఏం చేసాడు? తెలంగాణ నేపథ్యంలో సాగే హాస్యభరిత వ్యంగ్య చిత్రమిది. ‘పిల్లా పిలగాడు’ వెబ్‌ సిరీస్‌ ఫేమ్‌ సాయి తేజ కల్వకోట, పుష్పా సినిమా ఫేమ్‌ పావని కరణం జంటగా నటించారు. అగ్రతారలతో 100కి పైగా యాడ్‌ ఫిల్మ్‌ చేసిన ఆనంద్‌ గుర్రం దర్శకత్వంలో ఈ చిత్రం విడుదలకు సిద్ధమవుతోంది. ఈ సినిమాలోని ‘సోడు సోడు నొక్కమే నీ సోకు’ అనే పాటను డైరెక్టర్‌ శేఖర్‌ కమ్ముల రిలీజ్‌ చేశారు. ఎన్నో సెన్సేషనల్‌ సాంగ్స్‌ అందించిన యశ్వంత్‌ నాగ్‌, రామ్‌ మిర్యాల, ఆనంద్‌ గుర్రం కాంబినేషన్‌లో వస్తోన్న ఈ పాట గురించి డెరైక్టర్‌ శేఖర్‌ కమ్ముల మాట్లాడుతూ,’మంచి సాహిత్యానికి మంచి ట్యూన్‌ తోడైతే ఆ పాటలు ఎవర్‌ గ్రీన్‌గా నిలిచిపోతాయి. అలాంటి మంచి పాటల్లో ఈ పాట కచ్చితంగా ఉంటుందని ఆశిస్తున్నాను. పాటతో పాటు సినిమా కూడా విజయవంతం కావాలని కోరుకుకుంటున్నా’ అని అన్నారు. ‘కంటెంట్‌ ఓరియెంటెడ్‌ కాన్సెప్ట్‌తో వస్తున్న మమ్మల్ని ప్రోత్సహిస్తున్న శేఖర్‌ కమ్ములకి ధన్యవాదాలు’ అని ప్రొడ్యూసర్‌ రామకష్ణ బొదుల చెప్పారు. హ్యాపీ హార్స్‌ ఫిలిమ్స్‌ బ్యానర్‌ పై రామకృష్ణబొద్దుల, ఎస్‌.కే.శ్రీనివాస్‌ ఈచిత్రాన్ని నిర్మించారు.
