సితార ఎంటర్‌టైన్‌మెంట్స్‌ పతాకంపై ‘జెర్సీ’ ఫేమ్‌ గౌతమ్‌ తిన్ననూరి దర్శకత్వంలో ‘మ్యాజిక్‌’ అనే సినిమా రూపొందుతోంది. ఈ మ్యూజికల్‌ డ్రామాలో చాలా మంది నూతన నటీనటులు నటిస్తున్నారు. అనిరుధ్‌ రవిచందర్‌ స్వరకర్తగా వ్యవహరిస్తున్నారు. ఆయన పుట్టినరోజు నేపథ్యంలో క్రిస్మస్‌ కానుకగా డిసెంబర్‌ 21న ఈ చిత్రాన్ని విడుదల చేస్తున్నట్లు నిర్మాతలు తెలిపారు. తమ కాలేజీ ఫెస్ట్‌ కోసం సొంతంగా ఒక పాటను స్వరపరచడానికి నలుగురు టీనేజర్లు చేసే ప్రయత్నం చుట్టూ ఈ కథ తిరుగుతుంది. ఈ సినిమాలో యువతను ఆకట్టుకునే అంశాలు ఎన్నో ఉన్నాయి. కల నెరవేరాలంటే మొదట ప్రయత్నించాలి. ఆ ప్రయత్నాన్ని అందమైన ప్రయాణంలా చూపించే ‘మ్యాజిక్‌’ చిత్రం థియేటర్లలో ప్రేక్షకులను మాయ చేయనుంది. సితార ఎంటర్‌టైన్‌మెంట్స్‌, ఫార్చూన్‌ ఫోర్‌ సినిమాస్‌ పతాకాలపై సూర్యదేవర నాగ వంశీ, సాయి సౌజన్య ఈ చిత్రాన్ని నిర్మిస్తున్నారు. శ్రీకర స్టూడియోస్‌ సమర్పిస్తోంది.
