చైతన్య రావ్‌, హెబ్బా పటేల్‌ జంటగా నటిస్తున్న సినిమా ‘హనీమూన్‌ ఎక్స్‌ ప్రెస్‌’. ఈ చిత్రాన్ని న్యూ రీల్‌ ఇండియా బ్యానర్‌ పై కేకేఆర్‌, బాలరాజ్‌ నిర్మిస్తున్నారు. ఈ సినిమాని ప్రయోగాత్మకంగా ఫ్యూచరిస్టిక్‌ రొమాంటిక్‌ కామెడీగా దర్శకుడు బాల రాజశేఖరుని రూపొందించారు. ఈ సినిమా ఈ నెల21న వరల్డ్‌ వైడ్‌గా థియేటర్లలో రిలీజ్‌ కానుంది. ఈ నేపథ్యంలో చిత్ర టీజర్‌ను అమల అక్కినేని విడుదల చేశారు.
ఈ సందర్భంగా ఆమె మాట్లాడుతూ, ‘యాక్టింగ్‌, స్క్రీన్‌ ప్లే రైటింగ్‌లో ప్రొఫెసర్‌గా బాల అమెరికాలో చాలా కాలం పనిచేశారు. తెలుగు సినిమాకు దర్శకత్వం వహించాలనే ఆయన కల ఈ సినిమాతో నెరవేరినందుకు సంతోషంగా ఉంది. మా అన్నపూర్ణ కాలేజ్‌ ఫ్యాకల్టీలు, స్టాఫ్‌, స్టూడెంట్స్‌ను బాల ఈ మూవీ టీమ్‌లోకి తీసుకున్నారు. టీజర్‌ ఫన్నీగా, రొమాంటిక్‌గా ఉంది. ఈ రోజు సమాజంలోని రొమాంటిక్‌, వివాహ బంధాలను గురించి ఒక బలమైన కథను చూపించబోతున్నట్లు టీజర్‌ ద్వారా తెలుస్తోంది. నేటి పరిస్థితులకు అద్దం పట్టేలా ఉండే సబ్జెక్ట్‌ ఇది. ప్రేక్షకులు ఈ సినిమాని ఆదరించి, విజయాన్ని అందిస్తారని కోరుకుంటున్నాను’ అని తెలిపారు.
‘మా మూవీ నుంచి టీ సిరీస్‌ మ్యూజిక్‌ ద్వారా రిలీజ్‌ చేసిన నాలుగు సాంగ్స్‌కు మంచి రెస్పాన్స్‌ వస్తోంది. కల్యాణి మాలిక్‌ వీటిని కంపోజ్‌ చేశారు. స్ఫూర్తి జితేందర్‌ టైటిల్‌ సాంగ్‌కు మ్యూజిక్‌ చేశారు. మంచి రొమాంటిక్‌ కామెడీ మూవీగా అన్ని వర్గాల ప్రేక్షకులను అలరించే చిత్రమిది’ అని దర్శకుడు బాల రాజశేఖరుని చెప్పారు.
