పడకేసిన ప్రత్యేక పాలన..

– సమస్యల వలయంలో పల్లెలు
– వేదిస్తున్న నిధుల సమస్య
– మురికి కూపాలుగా తండాలు
– నిధులు రాక ఇబ్బందులు పడుతున్న కార్యదర్శులు
నవతెలంగాణ – పెద్దవూర
పల్లెల్లో నిధులు రాక ప్రత్యేక అధికారుల పాలన పడకేసింది. పాలక వర్గాల గడువు ముగియడంతో .. జిల్లా స్థాయి అధికారులకు ప్రత్యేక అధికారుల బాధ్యతలను అప్పగించారు. పంచాయితీల్లో, ప్రత్యేక అధికారుల పాలనతో కొత్త చిక్కులు తప్పడం లేదు. అసలే ఉన్న సమస్యలతో కొట్టుమిట్టాడుతున్న గ్రామాల్లో .ఒక్కో మండల అధికారికి రెండు, మూడు పంచాయితీల నిర్వహణ బాధ్యతలు అప్పగించడంతో వారు చుట్టపు చూపుగానే పల్లెల్లో పర్యటనలు చేస్తున్నారు. దీంతో పల్లెల్లో సమస్యల చిట్టా అంతకంతకూ పేరుకుపోతుంది. ప్రజలు ఇబ్బందులు పడుతు తుంటే ప్రత్యేక పాలనలో నిధులు రాకున్నా నెట్టుకొస్తున్నారు.
ఇబ్బందిండీగా.. కష్టంగా
మండలం లో26  గ్రామ పంచాయతీలలో 56 అవాస గ్రామాలున్నాయి.ఈ గ్రామాల్లో ప్రత్యేక అధికారుల పాలన కొనసాగుతోంది. ఈ ఏడాది జనవరి నెలాఖరున గ్రామాల్లో పాలక వర్గాల గడువు ముగియడంతో ప్రభుత్వం ప్రత్యేక అధికారుల పాలన కు శ్రీకారం చుట్టింది. పంచాయితీలకు జిల్లా, మండల స్థాయి అధికారులకు ప్రత్యేక అధికారుల బాధ్యతలను అప్పగించి పాలన సాగిస్తున్నారు. దీనికి తోడు జూలై 4వ తేదీన జిల్లా , మండల పరిషత్ పాలక వర్గాల పదవి కాలాలు సైతం ముగిశాయి. మండలాలకు కూడా జిల్లా స్థాయి అధికారులను ప్రత్యేక అధికారులుగా నియమించారు.ఇకపోతే కొందరు కీలక బాధ్యతలు నిర్వర్తిస్తున్న మండలస్థాయి అధికారులకు సైతం రెండు,మూడు గ్రామాలకు ప్రత్యేక అధికార బాధ్యతలు అప్పగించడంతో అధిక భారంతో సతమతమవుతున్నారు. తమ శాఖలోనే తీరిక లేకుండా పనులు ఉండడంతో కొందరు  అధికారులు రెండు, మూడు వారాలకు ఒకసారి కూడా గ్రామాలను సందర్శించడంలేదని తెలుస్తోంది.
పర్యవేక్షణ
ప్రత్యేక అధికారుల పర్యవేక్షణ చేస్తున్నా గ్రామాల్లో ఎక్కడిక్కడ సమస్యలు పేరుకుపోతున్నాయి. ఎక్కువ గ్రామాల్లో మురికికాలువలు,పారిశుధ్య సమస్యలు తలెత్తుతున్నాయి. మిషన్ భగీరథ పైపులైన్లు చాలా చోట్ల లీకై సక్రమంగా సరఫరా జరగడం లేదు. గ్రామాల్లో స్ట్రీట్ లైట్లు పాడై పోయినా పట్టించుకోవడం లేదని,కనీసం వాటిని బాగు చేయించే నాధుడే లేకుండా పోయారని ఏనే మీది  తండా వాసులు వాపోతున్నారు.కార్యదర్శి బాలరాజు మాత్రం నిధులు రావడం లేదు ఇప్పటికే అప్పులు చేశామని చెపుతున్నారు. కురుస్తున్న వర్షాలతో మురుగు కాల్వలు లేక వీదుల్లో బురద పేరుకుపోయి నీరంతా రోడ్లపైకి వస్తోందని కార్యదర్శి ఎప్పుడు వస్తుండో, ఎప్పుఫు పోతున్నారో తెలవడం లేదని కొత్త జయరాం తండావాసులు చెపుతున్నారు.కుంకుడు చెట్టు తండా పడమటి పూల గూడెం లో వీధులు బురద మాయంగా మారాయని గూడెంకు చెందిన నార్ల శ్రీనివాస్ పేర్కొంటున్నారు.నాయినవానికుంట తండా లో 25 ఏండ్లు గా ఇంతవరకు ఒక్క చేతిపంపుకూడా లేదు. ఎన్నో ఏండ్లుగా పాతబావినుంచే 25 మోటార్లు పెట్టుకొని నీటిని వాడుకుంటున్నారు. ఏళ్ళు గడుస్తున్నా మురుగు కాలువలు లేక మురుగు ఇండ్ల ముందే నీళ్లుచేరి దుర్వాసన వస్తుందని తండా వాసులు చెపుతున్నారు.నిధులు లేక కానీ కార్యదర్శి లు నానా ఇబ్బందులు పడుతున్న ఫలితం దక్కడం లేదు.ఇకపోతే గ్రామాల్లో చెత్త సేకరణకు గతంలో కొనుగోలు చేసిన ట్రాక్టర్లకు నెలవారీ ఈఎంఐలు భారంగా మారాయని గ్రామ కార్యదర్శలు వాపోతున్నారు. ట్రాక్టర్ల మరమ్మతులు వస్తే వారాల తరబడి సమయం పడుతుందని చలకుర్తి కార్యదర్శి రవీందర్ రెడ్డి తెలిపారు.
నిధుల సమస్య..
కేంద్ర ప్రభుత్వ నిధులు రెండు నెలలకోసారి మంజూరవుతున్న అవి సరిపోక పంచాయితీలకు ఇక్కట్లు తప్పడం లేదు. పాలక వర్గం ఉన్న సమయంలో అప్పో సప్పో తెచ్చి గ్రామాల అభివృద్దికి సర్పంచులు పూనుకునే వారని పలువురు గ్రామస్తులు పేర్కొంటున్నారు. బిల్లులు మంజూరైనప్పుడు తీసుకునేవారని, కానీ ఇప్పుడు పంచాయితీల్లో నిధుల లేమితో అధికారులు పట్టించుకోవడంలేదు.అయితే రాష్ట్రంలో కాంగ్రెస్ ప్రభుత్వం ఏర్పడిన తర్వాత కాంగ్రెస్ పార్టీ నేతలు పెత్తనం చలాయిస్తున్నారనీ దీంతో ప్రత్యేక అధికారుల పాలనలో స్థానిక కాంగ్రెస్, బీజేపీ, బీఆర్ఎస్ పార్టీల నేతల రాజకీయ జోక్యం మితిమీరిపోతున్న, గ్రామాలకు మంజూరైన పనుల్లో రాజకీయ పార్టీల నాయకుల జోక్యం పెరిగిపోయిందనీ ఆయా పనులకు సంబంధించి ఒత్తిళ్లు తప్పకపోవడం వల్ల ప్రత్యేక అధికారులు మిన్నకుండి పోతున్నారనీ మండలం లో చర్చ జరుగుతుంది.ప్రత్యేక అధికారులు పాలనా ప్రారంభమై  ఆరు నెల్లుపూర్తయింది.నేపథ్యంలో గ్రామాల్లో పడకేసిన ప్రత్యేక పాలనను గాడిన పెడుతుందా..? లేదా..? వేచి చూడాలి మరీ..