హీరో అల్లు అర్జున్‌ మంచి కంటెంట్‌ ఉన్న సినిమాలకు ఎప్పుడూ తన మద్ధతుని తెలియజేస్తుంటారు. అందులో భాగంగా మరోసారి ‘ఆయ్‌’ చిత్రానికి ఆయన తన మద్ధతుని తెలిపారు. సక్సెస్‌ఫుల్‌ చిత్రాలను నిర్మించే ప్రతిష్టాత్మక నిర్మాణ సంస్థ జీఏ 2 పిక్చర్స్‌ బ్యానర్‌పై ‘ఆయ్‌’ సినిమా రూపొందింది. ‘మ్యాడ్‌’ చిత్రంతో ప్రేక్షకులను మెప్పించిన హీరో నార్నే నితిన్‌, నయన్‌ సారిక జంటగా నటించారు. అంజి కె మణిపుత్ర ఈ చిత్రంతో దర్శకుడిగా పరిచయం అవుతున్నారు. నిర్మాత అల్లు అరవింద్‌ సమర్పణలో బన్నీవాస్‌, విద్యా కొప్పినీడి మూవీని నిర్మించారు. ఈ సందర్భంగా, ‘నాకెంతో సన్నిహితుడైన బన్నీ వాస్‌, సోదరి విద్యా కొప్పినీడికి శుభాకాంక్షలు. వీరు మా గీతా ఆర్ట్స్‌ బ్యానర్‌లో భాగమయ్యారు. నా మనసుకెంతో దగ్గరైన వీరికి ‘ఆయ్‌’ సినిమా మంచి సక్సెస్‌ను అందిస్తుందని నమ్ముతున్నాను’ అని అల్లు అర్జున్‌ అన్నారు. ఈ మూవీ ఈనెల 15న రిలీజ్‌ అవుతుంది. గోదావరి బ్యాక్‌డ్రాప్‌లో తెరకెక్కిన ఈ మూవీలోని పాటలు, టీజర్‌, ట్రైలర్‌లకు ప్రేక్షకుల నుంచి తిరుగులేని రెస్పాన్స్‌ వచ్చింది. గోదావరికి చెందిన పల్లెలో ఉండే స్నేహితుల చుట్టూ తిరిగే కథతో ఈ సినిమాను తెరకెక్కించారు.
