మమత ఆర్ట్‌ ప్రొడక్షన్‌ బ్యానర్‌ పై బన్నీ రాజు హీరోగా ఒగ్గు కళాకారుల జీవన నేపథ్యంలో నిర్మించిన చిత్రం ‘బ్రహ్మండ’. సోమవారం ఈ చిత్ర టీజర్‌ను మంత్రి కోమటిరెడ్డి వెంకట్‌ రెడ్డి రిలీజ్‌ చేశారు. ఈ సందర్భంగా ఆయన మాట్లాడుతూ, ‘ఆధ్యాత్మిక, గ్రామీణ కళాకారుల జీవితాల నేపథ్యంలో అరుదుగా సినిమాలు వస్తుంటాయి. తెలంగాణ సాంస్కతిక నేపథ్యం, జానపదాలపై సినిమాలు రావాల్సిన అవసరం ఎంతైనా ఉంది. అప్పటికి, ఇప్పటికీ ఒగ్గు కళ గ్రామీణ ప్రజలను అలరిస్తోంది. గ్రామీణ కళారూపాలు అంతరించిపోతున్నాయని ఆందోళన పడుతున్న ఇలాంటి తరుణంలో ఒగ్గు కళాకారుల కథాంశంగా ‘బ్రహ్మండ’ సినిమాని తీయడం గొప్ప విషయం. ఈ సినిమా మంచి విజయం సాధించాలి. గ్రామీణ కళల్ని ఈ తరానికి తెలియజేయాలని మనస్పూర్తిగా ఆశిస్తున్నా. ఇప్పుడు మంచి కథ ఉన్న ప్రతి సినిమా పెద్ద సినిమానే. తెలుగు చిత్ర పరిశ్రమ అభివృద్ధికి తెలంగాణ ప్రభుత్వం ఎప్పుడూ అండగా ఉంటుంది’ అని తెలిపారు. ఈ కార్యక్రమంలో నిర్మాత దాసరి సురేష్‌, దర్శకుడు రాంబాబు, హీరో బన్నీ రాజుతో పాటు ఇతర తారాగణం పాల్గొన్నారు.
