ప్రస్తుత కాలంలో చాలా మందిని వేధించే సమస్య గురక, గురక కారణంగా పక్కన ఉన్నవారికి నిద్ర అసలు పట్టదు. పక్కన ఉన్నవారు కూడా ఇబ్బంది పడాల్సి ఉంటుంది. గురక రావడం ఆరోగ్యానికి మంచిది కాదు. గురక ఎక్కువగా వస్తూ ఉంటే.. నిద్రలేమి సమస్య ఏర్పడుతుంది. నోరు లేదా ముక్కు ద్వారా గాలి తీసుకునేటప్పుడు అడ్డంకులు ఏర్పడినప్పుడు.. నోటి ద్వారా గాలి తీసుకునే క్రమంలో గురక వస్తుంది. గురక ఎక్కువగా వస్తుంటే… ఇతర అనారోగ్య సమస్యలు కూడా వస్తాయి. కాబట్టి ఇలాంటి గురకను ముందుగానే నియంత్రించుకోవాలి. మరి ఇంటి చిట్కాలతోనే గురకను ఎలా తగ్గించుకోవచ్చో ఇప్పుడు తెలుసుకుందాం.
అధిక బరువు: అధిక బరువుతో బాధ పడేవారిలో గురక అనేది కచ్చితంగా వస్తుంది. ఎందుకంటే మెడ చుట్టూ కొవ్వు అనేది పేరుకుపోతుంది. దీని వల్ల వాయు మార్గాల్లో అడ్డంకులు ఏర్పడి గురక వస్తుంది. కాబట్టి బరువును అదుపులో ఉంచుకోవాలి. అదే విధంగా కొలెస్ట్రాల్‌ లేకుండా చేసుకోవాలి.
సరైన దిశలో పడుకోవాలి: పడుకునే పొజిషన్‌ బట్టి కూడా గురక వచ్చేందుకు అవకాశాలు ఉన్నాయి. కాబట్టి నిటారుగా కాకుండా పక్కకు తిరిగి పడుకోవడం మంచిది. ఎక్కువగా ఎడమ వైపు తిరిగి పడుకుంటే మంచిది. దీని వల్ల వాయు మార్గాలు ఫ్రీగా ఉండి.. గాలి ప్రవాహం సులువగా జరుగుతుంది. గుండె మీద కూడా ఒత్తిడి పడదు.
తల ఎత్తుగా ఉండాలి: నిద్రించే సమయంలో తల పైకి ఎత్తుగా ఉండేలా తలగడ ఏర్పాటు చేసుకోవాలి. తల కిందుకు ఉంటే శ్వాస తీసుకునే క్రమంలో ఇబ్బంది ఏర్పడుతుంది. కాబట్టి తల ఎత్తుగా ఉంటే వాయు మార్గం తెరచుకోవడానికి అవకాశం ఉంటుంది. దీని వల్ల గురక ఆగుతుంది.
నీటిని తీసుకోవాలి: శరీరం డీహైడ్రేషన్‌కు గురైనప్పుడు కూడా గురక సమస్య వస్తుంది. నీళ్లు ఎక్కువగా తీసుకోకపోతే.. గొంతు భాగంలో శ్లేష్మం ఉండి.. గాలి తీసుకోవడం కష్టంగా ఉంటుంది. కాబట్టి పగలు నీటిని ఎక్కువగా తీసుకోవాలి.
మద్యం సేవించడం మానేయండి: మద్యం సేవించిన వారిలో కూడా గురక సమస్య అధికంగా ఉంటుంది. ఆల్కహాల్‌ గొంతులోని కండరాలను సంకోచించేలా చేస్తుంది. దీని వల్ల గాలి అనేది సరిగా ఆడదు. కాబట్టి నోటితో తీసుకోవాల్సి వస్తుంది. అందుకే ఈ వ్యసనాన్ని మానుకోవాలి.
