– కలెక్టర్లకు ఆదేశాలు ఇచ్చిన ఆరోగ్యశాఖ మంత్రి హరీష్ రావు.
నవతెలంగాణ – అశ్వారావుపేట
రెండవ దశ కేసీఆర్ న్యూట్రీ కిట్లు పంపిణీకి ఏర్పాట్లు చేయాలని రాష్ట్ర వైద్య ఆరోగ్య శాఖ మంత్రి హరీష్ రావు తెలిపారు. మంగళవారం హైదరాబాద్ నుండి రాష్ట్ర వైద్య,ఆరోగ్య శాఖ మంత్రి హరీష్ రావు రాష్ట్ర స్థాయి వైద్యశాఖ అధికారులతో కలిసి జిల్లా కలెక్టర్లు,వైద్య,ఆరోగ్య శాఖ అధికారులతో కేసీఆర్ న్యూట్రీ కిట్లు పంపిణీ కి ఏర్పాట్లు,కంటి వెలుగు,ఆరోగ్య ఉప కేంద్రాలు నిర్మాణం తదితర అంశాలపై వీడియో కాన్ఫరెన్సు నిర్వహించారు.సమీకృత జిల్లా కలెక్టరేట్ నుండి జిల్లా కలెక్టర్ అనుదీప్ ఈ వీడియో సమావేశంలో పాల్గొన్నారు. ఈ సందర్భంగా మంత్రి మాట్లాడుతూ గర్భిణీ స్త్రీలలో అనీమియా సమస్య పరిష్కరించేందుకు ప్రభుత్వం కెసిఆర్ న్యూట్రిషన్ కిట్ పథకం అమలు చేస్తుందని చెప్పారు.మొదటి దశలో రాష్ట్ర వ్యాప్తంగా 9 జిల్లాలలో అమలు చేసామని ప్రస్తుతం మిగిలిన 24 జిల్లాలకు విస్తరిస్తున్నామని అన్ని ఏర్పాట్లు చేయాలని మంత్రి సూచించారు. పుట్టబోయే బిడ్డ ఆరోగ్యం, తల్లి సంరక్షణ కోసం కేసీఆర్ న్యూట్రిషన్ కిట్ చాలా ఉపయోగపడిందని ప్రతి గర్భిణీ కి 2 సార్లు కెసిఆర్ న్యూట్రిషన్ కిట్ అందిస్తామని చెప్పారు. రాష్ట్ర అవతరణ దశాబ్ది వేడుకల సందర్భంగా కెసిఆర్ న్యూట్రిషన్ కిట్ రెండవ దశ పథకం ప్రారంభించడానికి అన్ని ఏర్పాట్లు చేయాలని మంత్రి తెలిపారు. ప్రతి సంవత్సరం రాష్ట్ర వ్యాప్తంగా దాదాపు 6.84 లక్షల మంది గర్భిణీ స్త్రీలు నమోదవుతున్నారని, 2వ ఏ.ఎన్.సి రిజిస్ట్రేషన్, 3వ ఏ.ఎన్.సి రిజిస్ట్రేషన్ సమయంలో 2 సార్లు గర్భిణీ స్త్రీలకు న్యూట్రి కిట్ పంపిణీ చేయనున్నట్లు చెప్పారు. న్యూట్రీ కిట్లు పంపిణీకి 24 జిల్లాలలో రాష్ట్రవ్యాప్తంగా 111 కేంద్రాలలో న్యూట్రిషన్ కిట్ల పంపిణీకి అవసరమైన ఏర్పాట్లు చేయాలని చెప్పారు. న్యూట్రీ కిట్లు పంపిణీ వల్ల అనీమియా సమస్యకు శాశ్వత పరిష్కారం లభిస్తుందని మంత్రి తెలిపారు. కెసిఆర్ కిట్ పథకం వల్ల రాష్ట్రంలో అద్భుతమైన ఫలితాలు వచ్చాయని మాతా శిశు మరణాలు నియంత్రణలో దేశంలో 3వ స్థానంలో నిలిచామని, వంద శాతం ఇన్సిస్టిట్యూషన్ డెలీవరిలు జరుగుతున్న ఏకైక రాష్ట్రం తెలంగాణ మాత్రమేనని, కెసిఆర్ న్యూట్రిషన్ కిట్ వల్ల కూడా మంచి ఫలితాలు వస్తున్నాయని మంత్రి పేర్కొన్నారు. రాష్ట్ర వ్యాప్తంగా నూతనంగా 2038 ఉప ఆరోగ్య కేంద్రాలను మంజూరు చేశామని, 422 సబ్ సెంటర్ నిర్మాణ పనులు పూర్తి చేశామని, మరో 177 పనులు చివరి దశలో ఉన్నాయని, 610 నిర్మాణ పనులు వివిధ దశలో ఉన్నాయని అధికారులు వివరించారు. రాష్ట్రంలో 63 సబ్ సెంటర్ భవనాలకు భూకేటాయింపులు జరగలేదని, వీటిపై కలెక్టర్లు ప్రత్యేక శ్రద్ధ వహించి గ్రామాలలో ప్రజలకు అందుబాటులో ఉండే భూములను ఎంపిక చేసి సబ్ సెంటర్ల నిర్మాణం చేపట్టాలని చెప్పారు. సబ్ సెంటర్ లలో నిర్మాణం కోసం ముందస్తుగా జిల్లా ప్రజా పరిషత్తులకు, పట్టణ ప్రాంతాల్లో మున్సిపాలిటీలకు నిధులను విడుదల చేశామని చెప్పారు. వారం రోజులలో మరో 400 కోట్ల నిధులు విడుదల చేస్తామని మంత్రి పేర్కొన్నారు. సబ్ సెంటర్ భవన నిర్మాణానికి నిధుల సమస్య లేనందున త్వరితగతిన 766 సబ్ సెంటర్ల టెండర్ల ప్రక్రియ ఫైనల్ చేసి పనులు ప్రారంభించాలని, సబ్ సెంటర్ లను త్వరితగతిన వేగంగా నిర్మించి ప్రజలకు అందుబాటులోకి తీసుకొని రావాలని, సబ్ సెంటర్ల నిర్మాణ పురోగతిపై కలెక్టర్లు తరచుగా రివ్యూ నిర్వహించాలని మంత్రి ఆదేశించారు. జిల్లాలకు నూతనంగా మంజూరు చేసిన ప్రాథమిక ఆరోగ్య కేంద్రం భవనాలు, బస్తీ, పల్లె దవాఖానాలు, డయాగ్నోస్టిక్ హబ్ పనులు త్వరగా పూర్తి చేసి ప్రజలకు అందుబాటులోకి తేవాలని మంత్రి అధికారులను కోరారు. రాష్ట్ర వ్యాప్తంగా 3208 పల్లె దవాఖానాలు ఏర్పాటు చేసి గ్రామీణ ప్రాంతంలో ప్రజలకు వైద్య సేవలు అందించేందుకు ప్రభుత్వం నిర్ణయించిందని, వీటిలో ఇప్పటికే 2995 మైల్డ్ లెవెల్ హెల్త్ ప్రొవైడర్లను నియమించామని, ప్రస్తుతం ఖాళీగా ఉన్న 211 పోస్టులను జిల్లా స్థాయిలో భర్తీ చేయాలని మంత్రి తెలిపారు. ఎం.ఎల్.హెచ్.పి కింద ఎంపిక చేసిన 1141 బి.ఎ.ఎంఎస్ అభ్యర్థులకు 6 నెలల పాటు బ్రిడ్జి కోర్స్ శిక్షణ అందించాలని వీటిలో ఇప్పటివరకు 708 మంది అభ్యర్ధులకు శిక్షణ పూర్తి చేశామని, 201 మంది అభ్యర్థులకు శిక్షణ ప్రక్రియ జరుగుతుందని, కంటి వెలుగు కార్యక్రమం చివరి దశకు వచ్చినందున మిగిలిన అభ్యర్థులకు సైతం బ్రిడ్జి కోర్సు ప్రారంభించాలని మంత్రి పేర్కొన్నారు. 80 పనిదినాలు లో రాష్ట్రవ్యాప్తంగా కోటిన్నర మంది ప్రజలకు ఎలాంటి అవాంఛనీయ సంఘటనలు లేకుండా కంటి పరీక్షలను విజయవంతంగా నిర్వహించినందుకు మంత్రి కలెక్టర్లను,వైద్య సిబ్బందిని, ఏర్పాట్లు చేసిన మున్సిపల్, పంచాయతి సిబ్బందిని అభినందించారు. రాష్ట్రంలో 1.5 కోట్ల మందికి కంటి పరీక్షలు నిర్వహించి 21.4 లక్షల మందికి రీడింగ్ గ్లాసెస్, 17.08 లక్షల మందికి ప్రిస్క్రిప్షన్ గ్లాసెస్ పంపిణీ చేశామని మంత్రి తెలిపారు. కంటి వెలుగులో లక్ష్యాన్ని పూర్తి చేసుకున్న 737 బృందాలలోని స్టాఫ్ నర్స్ లు, ఏఎన్ఎమ్ లు, వైద్యాధికారులను ఆసుపత్రులలో విధులకు పంపాలని, డాటా ఎంట్రీ ఆపరేటర్లు, ఆప్తమాలజిస్టులను మిగిలి ఉన్న కంటి వెలుగు బృందాలకు అటాచ్ చేసి మరింత విస్తృతంగా ప్రజలకు పరీక్షలు నిర్వహించాలని మంత్రి సూచించారు. సిపిఆర్ శిక్షణ పై వైద్యాధికారులు శ్రద్ధ వహించాలని, నిర్దేశించుకున్న లక్ష్యం మేరకు సి పి ఆర్ పై శిక్షణ కార్యక్రమాలు నిర్వహించాలని మంత్రి సూచించారు. రాష్ట్రవ్యాప్తంగా మరో 15 రోజుల పాటు తీవ్రమైన ఎండలు ఉంటాయని, ఎండల కారణంగా వడదెబ్బ బారిన ప్రజలు పడకుండా అవసరమైన సూచనలు సలహాలు అందజేయాలని, ఉపాధి హామీ కార్మికులు పనిచేసే సమయంలో అవసరమైన జాగ్రత్తలు పాటించాలని మంత్రి సూచించారు. అత్యవసర మందులు, ఓఆర్ఎస్ పాకెట్లు అందుబాటులో ఉంచాలని చెప్పారు. ఈ సమావేశంలో జిల్లా వైద్యాధికారి డా శిరీష, ఆసుపత్రుల సమన్వయ అధికారి డా రవిబాబు, ప్రధాన ఆసుపత్రి పర్యవేక్షకులు డా కుమారస్వామి, గురిజన సంక్షేమ శాఖ తానాజి, డిఈ రాములు తదితరులు పాల్గొన్నారు.
