హీరో సందీప్‌ కిషన్‌ నటిస్తున్న తన 30వ చిత్రం ‘మజాకా’. త్రినాధరావు నక్కిన దర్శకత్వంలో రాబోతున్న ఈ చిత్రానికి బెజవాడ ప్రసన్నకుమార్‌ కథ, కథనం, మాటలు అందించారు. ఏకే ఎంటర్‌టైన్‌మెంట్స్‌, హాస్య మూవీస్‌, జీ స్టూడియోస్‌ బ్యానర్స్‌పై రాజేష్‌ దండ, ఉమేష్‌ కేఆర్‌ బన్సల్‌ సంయుక్తంగా నిర్మిస్తున్న ఈ చిత్రంలో రీతూవర్మ హీరోయిన్‌గా నటిస్తోంది. ఇందులో రావురమేష్‌కు జోడీగా ‘మన్మధుడు’ ఫేం అన్షు నటిస్తున్నారు. ఫిబ్రవరి 21న ఈ సినిమా రిలీజ్‌ అవుతున్న నేపథ్యంలో తాజాగా ఈ సినిమా నుంచి మొదటి పాట ‘బ్యాచ్‌లర్‌ యాంథమ్‌’ను విడుదల చేశారు మేకర్స్‌. బ్యాచ్‌లర్స్‌ జీవితంలో ఉండే స్ట్రగుల్స్‌, జార్సును హైలైట్‌ చేసేలా ఉన్న ఈ సాంగ్‌ కుర్రాళ్లకు చార్ట్‌బస్టర్‌ కానుంది. రామజోగయ్య శాస్త్రి రాసిన ఈ పాట కుర్రాళ్లకు ఎవర్‌గ్రీన్‌ ఫేవరెట్‌ కానుంది. ఈ పాటలో బ్యాచ్‌లర్స్‌ తమ జీవితంలో పడే వంట కష్టాలు, సింగిల్‌ షాపింగ్‌ ట్రిప్స్‌ వంటి వాటిని చాలా బాగా ఎలివేట్‌ చేశారు. రామజోగయ్య శాస్త్రి రాసిన ఈ పాటను ధనుంజరు సీపాన ఎంతో హుషారుగా ఆలపించారు. కుర్రాళ్లందరికీ కనెక్ట్‌ అయ్యేలా తన గాత్రంతో కట్టిపడేశారు. లియోన్‌ జేమ్స్‌ అందించిన సంగీతం పాటకు మరింత ప్లస్‌ అయింది. రఘు మాస్టర్‌ అందించిన స్టెప్పులతో ఈ పాట సినిమాలో హైలైట్‌గా నిలవనుంది. ఈ పాటను సందీప్‌ కిషన్‌-రావు రమేష్‌లపై వైజాగ్‌ బీచ్‌లో చిత్రీకరించారు. తండ్రీకొడుకుల బ్యాచ్‌లర్‌ జీవితంలో ఎత్తుపల్లాలను కళ్లకు కట్టినట్లు చూపించేలా తీశారు. వారిద్దరి ఆన్‌ స్క్రీన్‌ కెమిస్ట్రీ ప్రేక్షకులను పడిపడినవ్వేలా చేస్తుందనడంలో ఎలాంటి సందేహం లేదు అని చిత్ర యూనిట్‌ తెలిపింది.
