రుణమాఫీ కార్యక్రమాన్ని బ్యాంకర్లు పకడ్బందీగా అమలు చేయాలి…

రైతు ఆర్థికాభివృద్ధికి, వ్యవసాయ రంగం బలోపేతానికి రాష్ట్ర ప్రభుత్వం ప్రతిష్టాత్మకంగా చేపట్టిన రుణమాఫీ కార్యక్రమాన్ని బ్యాంకర్లు పకడ్బందీగా అమలు చేసి ప్రభుత్వ లక్ష్యాన్ని నెరవేర్చాలని జిల్లా కలెక్టరు హనుమంత్ కే.జెండగే బ్యాంకర్ల ప్రతినిధులకు సూచించారు. గురువారం నాడు కలెక్టరేటు కాన్ఫరెన్స్ హాలులో వ్యవసాయ శాఖ అధికారులు, వివిధ బ్యాంకుల ప్రతినిధులు, కో-ఆపరేటివ్ రిజిస్ట్రార్లు, అసిస్టెంట్ రిజిస్ట్రార్లకు జరిగిన రుణమాఫీ అమలు అవగాహన కార్యక్రమానికి ఆయన హాజరై మాట్లాడుతూ  ప్రభుత్వం వ్యవసాయ రంగం బలోపేతానికి, రైతుల ఆర్దిక వికాసానికి వెన్నుదన్నుగా 2 లక్షల రూపాయల రుణ మాఫీ ప్రకటించిందని, అందులో భాగంగా ఈరోజు సాయంత్రం 4.00 గంటలకు మొదటి విడుతగా ఒక లక్ష రూపాయాల వరకు నేరుగా రైతుల ఖాతాలలో జమ చేసే కార్యక్రమాన్ని రాష్ట్ర ముఖ్యమంత్రి ప్ర్రారంభిస్తారని తెలిపారు. తేది.12-12- 2018 తేదీన లేదా ఆ తరువాత మంజూరైన లేక రెన్యువల్ అయిన రుణాలకు మరియు తేది. 09-12-2023 నాటికి బకాయి ఉన్న పంట రుణాలకు ఈ పథకం వర్తిస్తుందని తెలిపారు. రైతులకు రుణం భారం కాకూదని, ప్రభుత్వం వ్యవసాయ రంగానికి ఇచ్చే అధిక ప్రాధాన్యతే రుణ మాఫీ కార్యక్రమమని, ప్రభుత్వం నిర్దేశించిన మార్గదర్శకాలను పాటించాలని, ఇతర రుణాలకు రుణమాఫీ వర్తించదని, అర్పులైన రైతులందరికీ రుణ మాఫీ వర్తింపచేయాలని సూచించారు. ప్రతి బ్యాంకు ఒక నోడల్ అధికారిని నియమించి రైతులకు ఎలాంటి అనుమానాలు ఉన్నా నివృత్తి చేయాలని, రుణమాఫీ కార్యక్రమాన్ని పకడ్బందీగా అమలుచేయాలని సూచించారు. వ్యవసాయ అధికారులు క్షేత్రస్థాయిలో రైతులకు అండగా ఉండి సలహాలు అందించి రుణమాఫీ పథకంలో అర్హత కలిగిన ప్రతి రైతు లబ్ది పొందేలా చర్యలు తీసుకోవాలని ఆదేశించారు. రైతులు రుణమాఫీకి సంబంధించి  ఎలాంటి సందేహాలు ఉన్నా టోల్ ఫ్రీ నెంబర్ 08685293312 ఫోన్ చేయాలని కోరారు. ఈ కార్యక్రమంలో జిల్లా వ్యవసాయ అధికారి కే అనురాధ, జిల్లా లీడ్ బ్యాంకు మేనేజర్ శివరామకృష్ణ, జిల్లా కో-ఆపరేటివ్ అధికారి ప్రవీణ్, వ్యవసాయ అధికారులు పాల్గొన్నారు.