బాణసంచా కాల్చడం వల్ల కాలుష్యం చాలా ఎక్కువగా ఉంటుంది. దీనిని దృష్టిలో ఉంచుకొని పరిమితి సంఖ్యలో టపాసులు కాల్చాలి. ముఖ్యంగా చిన్న పిల్లలు బాణసంచా కాల్చే సమయంలో తల్లిదండ్రులు తప్పనిసరిగా వారి పక్కనే ఉండాలి. అంతేకాదు, వారికి రక్షణ కవచాలు ధరింపజేయాలి. లేకుంటే టపాసులు కాల్చే సమయంలో నిప్పురవ్వలు మీదపడి పలు ప్రమాదాలు జరగొచ్చు. ఈ జాగ్రత్తలు పాటిద్దాం…
– ఎట్టిపరిస్థితుల్లో చేతిలో పట్టుకొని టపాకాయలను వెలిగించొద్దు.
– వాటిపై వంగి టపాకాయలను వెలిగించొద్దు.. వెలగని టపాకాయల దగ్గరకు వెంటనే వెళ్లకుండా కొంతసేపు ఆగి వెళ్లాలి.
– సీసా, రేకు డబ్బా, బోర్లించిన కుండవంటి పాత్రల్లో పెట్టి టపాకాయలను వెలిగించవద్దు. అలా చేస్తే ప్రమాదం భారినపడే అవకాశం ఎక్కువ.
– క్రాకర్స్‌ కాల్చే సమయంలో సింథటిక్‌, వదులుగా ఉన్న దుస్తులు కాకుండా మందంగా ఉన్న నూలు దుస్తులను మాత్రమే ధరించండి.
– గాలులు ఎక్కువగా ఉంటే బాణసంచా కాల్చవద్దు. అలాచేయడం వల్ల గాలికి నిప్పురవ్వలు మీ మీదపడటం లేదా పక్కవారిమీద పడటం జరిగి గాయాలయ్యే అవకాశాలు ఎక్కువ.
– బాణసంచా కాల్చే సమయంలో కంటికి రక్షణగా కళ్లద్దాలను ధరించాలి.
– అనుకోని పరిస్థితుల్లో బాణసంచా పేల్చే సమయంలో గాయపడితే కాలినచోట క్రీమ్‌, ఆయింట్‌ మెంట్‌ , నూనె పూయకండి.. వెంటనే వైద్య సహాయం తీసుకొనేలా చర్యలు తీసుకోండి.
– దగ్గరలో నీటిని అందుబాటులో ఉంచుకొని టపాసులు పేల్చాలి. ఒకవేళ చర్మంపై నిప్పురవ్వలు పడి కాలినట్లయితే, కాలినచోట ఎక్కువ నీరు పోయాలి. గాయపడిన వారిని వెంటనే ఆస్పత్రికి తీసుకెళ్లాలి. సొంత వైద్యం వద్దు.
– ఒకవేళ తీవ్రమైన కాలిన గాయాలైతే.. ఆ వ్యక్తిని ఒక శుభ్రమైన దుప్పటిలో చుట్టి వెంటనే ఆసుపత్రికి తరలించాలి.
