వరుణ్‌ సందేశ్‌ హీరోగా ‘నింద’ అనే చిత్రాన్ని ది ఫెర్వెంట్‌ ఇండీ ప్రొడక్షన్స్‌ బ్యానర్‌పై రాజేష్‌ జగన్నాథం స్వీయ దర్శకత్వంలో నిర్మిస్తున్నారు. కాండ్రకోట మిస్టరీ అనే క్యాప్షన్‌తో యదార్థ సంఘటనల ఆధారంగా ఈ మూవీని నిర్మించారు. ఈ చిత్రం ఈనెల 21న రాబోతోంది. మైత్రీ మూవీస్‌ ఈ సినిమాను నైజాంలో రిలీజ్‌ చేస్తోంది. ఈ మూవీ విశేషాలను హీరో వరుణ్‌ సందేశ్‌ మంగళవారం మీడియాతో షేర్‌ చేసుకున్నారు. ఈ కథ విన్నప్పుడు ఈ మూవీని ఎవరు నిర్మిస్తారు?, ఎవరు తీస్తారు అనే ఆలోచనలు రాలేదు. కథతోపాటు రాజేష్‌ నెరేట్‌ చేసిన విధానం మరింతగా నచ్చింది. ఇక ఆయనే సినిమాను నిర్మిస్తున్నాడని తెలిసి మరింత సంతోషం కలిగింది. తన కథ మీద తనకు ఉన్న నమ్మకంతోనే నిర్మించేందుకు ముందుకు వచ్చారు. ఆయనకు చాలా గట్స్‌, ధైర్యం ఉండటం వల్లే దర్శకుడిగా, నిర్మాతగా ఈ సినిమాను చేశారు. సస్పెన్స్‌, క్రైమ్‌, థ్రిల్లర్‌ జోనర్‌లలో ఎన్నో సినిమాలు వచ్చాయి. ఈ సినిమా విషయంలో మాత్రం స్క్రీన్‌ ప్లే చాలా కొత్తగా ఉండబోతోంది. నెక్ట్స్‌ ఏం జరుగుతుందో ఎవ్వరూ చెప్పలేరు, ఊహించలేరు. అసలు పూర్తి కథను, స్క్రిప్ట్‌ని ఆర్టిస్టులెవ్వరికీ నెరేట్‌ చేయలేదు. దీంతో నటించే ఆర్టిస్టుల్లోనూ ఓ క్యూరియాసిటీ పెరిగింది. అసలు నేరస్థుడు ఎవరు? అనే విషయం తెలియకపోవడంతో సహజంగా నటించారు. కథ చెప్పినప్పుడు నేను గెస్‌ చేసేందుకు ప్రయత్నించాను. కానీ నేను కూడా చెప్పలేకపోయాను. ఇలాంటి చిత్రాలకు ఆర్‌ఆర్‌, కెమెరా వర్క్‌ చాలా ఇంపార్టెంట్‌. సాంతు ఓంకార్‌ తన ఆర్‌ఆర్‌, మ్యూజిక్‌తో నెక్ట్స్‌ లెవెల్‌కు తీసుకెళ్లారు. రమీజ్‌ కెమెరా వర్క్‌ కూడా అద్భుతంగా ఉంటుంది. నేను బయట జాలీగా, చిల్‌గా ఉంటాను. ఎప్పుడూ కూడా సీరియస్‌గా ఉండను. కానీ ఈ చిత్రంలో నా వ్యక్తిత్వానికి, మనస్తత్వానికి పూర్తిగా భిన్నమైన పాత్రను పోషించాను. ఈ చిత్రంలో ఎంతో సెటిల్డ్‌గా, మెచ్యూర్డ్‌గా కనిపిస్తాను. ‘నింద’ తరువాత ఓ క్రేజీ ప్రాజెక్ట్‌తో ఆగస్ట్‌లో ఆడియెన్స్‌ ముందుకు రాబోతున్నాను. అలాగే ‘కానిస్టేబుల్‌’ అనే మరో సినిమాను కూడా చేస్తున్నాను.
