ఎన్టీఆర్‌ నటిస్తున్న భారీ పాన్‌ ఇండియా చిత్రం ‘దేవర’. కొరటాల శివ డైరెక్షన్‌లో ఈ మూవీ శరవేగంగా చిత్రీకరణను జరుపుకుంటోంది. బాలీవుడ్‌ నటి జాన్వీ కపూర్‌ హీరోయిన్‌గా నటిస్తోన్న ఈ సినిమాలో మరో బాలీవుడ్‌ నటుడు సైఫ్‌ అలీఖాన్‌ కీలక పాత్రను పోషిస్తున్నారు. బాలీవుడ్‌ కొరియో గ్రాఫర్‌ బోస్కో మార్టిస్‌ కొరియోగ్రఫీ చేయనున్న కొత్త పాట చిత్రీకరణ కోసం టీమ్‌ థాయిలాండ్‌ వెళ్లింది. ‘పఠాన్‌, వార్‌, ఫైటర్‌’ వంటి చిత్రాల్లో అద్భుతమైన స్టెప్స్‌ను కంపోజ్‌ చేసిన కొరియోగ్రాఫర్‌గా బోస్కో మార్టిస్‌కు మంచి క్రేజ్‌ ఉంది. ఆయన ఈ చిత్రానికి పని చేస్తుండటంపై బాగా ఎగ్జైట్‌ అయ్యారు. తన ఆనందాన్ని వ్యక్తం చేస్తూ ఇన్‌స్టాగ్రామ్‌లో ఎన్టీఆర్‌తో ఉన్న ఫొటోను షేర్‌ చేశారు. ఇటీవల ‘ఫియర్‌ సాంగ్‌’ను రిలీజ్‌ చేయటంతో మేకర్స్‌ ‘దేవర’ మ్యూజికల్‌ ప్రమోషన్స్‌ను స్టార్ట్‌ చేశారు. ఈ హై యాక్షన్‌ థ్రిల్లర్‌ను రెండు భాగాలుగా తెరకెక్కిస్తున్నారు. మొదటి భాగం ‘దేవర: పార్ట్‌ 1’ను తెలుగు, తమిళ, హిందీ, మలయాళ, కన్నడ భాషల్లో సెప్టెంబర్‌ 27న విడుదల చేస్తున్నారు. ప్రకాష్‌ రాజ్‌, శ్రీకాంత్‌, షైన్‌ టామ్‌ చాకో, నరైన్‌ కీలక పాత్రలను పోషించారు. నందమూరి కళ్యాణ్‌ రామ్‌ సమర్పణలో ఎన్టీఆర్‌ ఆర్ట్స్‌, యువ సుధ ఆర్ట్స్‌ పతాకాలపై మిక్కిలినేని సుధాకర్‌, హరికష్ణ.కె ఈ సినిమాను అత్యంత భారీగా నిర్మిస్తున్నారు.
