ఆధునిక భారతదేశ నిర్మాణం: డాక్టర్.బీ.ఆర్.అంబేద్కర్ ఆర్థిక విధానాలు

ఉన్నత విద్య అభ్యశించడానికి అంబేద్కర్ 1913 లో బరోడా మహారాజు ఇచ్చిన ఉపకార వేతనంతో అమెరికా వెళ్లినాడు.అక్కడి కొలంబియా యూనివర్సిటీ లో ఆర్థిక శాస్త్రంలో ఎం.ఏ. చదువుతూ 1915 లో “ఏన్సీయoట్ ఇండియన్ కామర్స్”అనే వ్యాసాన్ని రాసి సమర్పించారు. అటు తర్వాత అంబేద్కర్ రాసిన “నేషనల్ డివిడెండ్ ఆఫ్ ఇండియా-ఏ హిస్టారికల్ అండ్ అనలిటికల్ స్టడీ” అనే పరిశోధనా వ్యాసానికి ఆయనకు కొలంబియా యూనివర్సిటీ పిహెచ్డి డిగ్రీ ప్రదానం చేసింది. దీనినే తరువాత విపులీకరించి “ఎవాల్యూషన్ ఆఫ్ ప్రొవిన్సియల్ ఫైనాన్స్ ఇన్ బ్రిటిష్ ఇండియా” పేరున పుస్తకంగా ప్రచురించారు. ఇందులోని బడ్జెట్ ను గురించిన అధ్యాయాలను అనేకమంది చదివేవారు. ఉన్నత విద్యను కొనసాగించాలనే కోరికతో అంబేద్కర్ కొల్హాపూర్ మొహారాజు సమకూర్చిన ఆర్థిక సాయంతో 1920 లో లండన్ వెళ్లినాడు.1921 లో లండన్ స్కూల్ ఆఫ్ ఎకనామిక్స్ పొలిటికల్ సైన్స్ లో “ప్రొవిన్సియల్ డిసెంట్రలైజేషన్ ఆఫ్ యిమ్ పీరియల్ ఫైనాన్స్ ఇన్ బ్రిటిష్ ఇండియా” అనే పరిశోధన పత్రాన్ని సమర్పించి ఆర్థిక శాస్త్రంలో యం,ఎస్సీ డిగ్రీ పొందినారు.

1922-23 లో సమర్పించిన ” “ప్రాబ్లెమ్ ఆఫ్ ది రూపి”  అనే పరిశోధనా పత్రానికి  లండన్ యూనివర్సిటీ అంబేడ్కర్ కు ఆర్థిక శాస్త్రంలో డి.యస్సి డిగ్రీని ప్రధానం చేసింది.ఇందులో అంబేద్కర్ బ్రిటీష్ సామ్రాజ్యవాద ఆర్థిక విధానాలను విమర్శిస్తూ రాశారు.లాండన్ లోని”గ్రేస్ యిన్”లో న్యాయ శాస్త్రాన్ని అభ్యసించి “బార్ ఎట్ లా” డిగ్రీ ని పొందినారు.అంబేద్కర్ తన పరిశోధనలో బ్రిటీష్ పాలకుల ఆర్థిక  విధానాలలోని లోపాలను ఎత్తి చూపినారు.వాటివల్ల ఇండియా లో ఆర్థిక అసమానతలు పెరుగుతున్నాయని, భూమిషిస్తూ అధికంగా ఉండి రైతులమీద పెనుభారాన్ని మోపుతుందని,వారిలో పేదరికాన్ని పెంచి సామాజిక అస్థిరతకు దారితీస్తుందని అన్నాడు.మొత్తం ప్రభుత్వ రాబడులతో భూమిషిస్తు ఒక్కటే యాభై శాతానికి మించి వుండి వ్యవసాయం మరియు ఇతర పరిశ్రమల అభివృద్ధిని నిరోధిస్తుందని అన్నాడు.ప్రభుత్వ పన్నుల విధానం అన్యాయంతో కూడి వుంది లోపభూయిష్టంగా ఉందన్నాడు. వాణిజ్య పన్ను వాణిజ్య అభివృద్ధికి నిరోధకంగా ఉందని,భూస్వాములు పేద కౌలుదార్ల ఆదయాలతో విలాస జీవితం గడుపుతూ ఉంటే బ్రిటిష్ అధికారులు అధిక వేతనాలు,సౌకర్యాలూ కలిగి ఉన్నారని,ప్రభుత్వం వారి నుండి ఏ పన్నునూ వసూలు చేయడంలేదని అన్నారు.ప్రభుత్వ రాబడులలో ఎనభై శాతాన్ని మిలిటరీ,పోలీసు,న్యాయ పాలన మీదనే వ్యయం చేశారని,రోడ్లు,నీటిపారుదల వంటి పబ్లిక్ వర్క్స్ ను పూర్తిగా నిర్లక్ష్యం చేశారని అంబేద్కర్ తీవ్రంగా విమర్శించారు

మన దేశ వ్యవసాయరంగంలో చిన్న కమతాలు అధిక సంఖ్యలో వుండి,వాటిలో ఉత్పాదకత తక్కవగా ఉండేది .ఇందుకు ముఖ్య కారణం కమతాల విభజనేనని,చిన్న కమతాలను   సమీకృతం చేసి పెద్దవిగా మార్చితే ఉత్పాదకత పెరుగుతుందని చాలామంది విశ్లేషించి వాటి సమీకరణకు వివిధ పద్దతులను సూచించారు. అంబేద్కర్ “ఇండియా లో చిన్న కమతాలు-పరిష్కారాలు 1928″అనే తన రచనలో ఈ పెద్ద కమతాల సూచనను సరియైన పరిష్కారం కాదని తిరస్కరించారు. ఉత్పత్తి  కారకాలను సరియైన పాళ్ళల్లో ఉపయోగిస్తే గరిష్ట ప్రతిఫలం,రాబడి ఉంటాయన్నారు.లాభ  సాటి కమతం లేక కుటుంబ కమతం అంటే కుటుంబానికి సరిపడేటాయాన్నిచ్చే కమతం అనే నిర్వచనం సరియైనది కాదని, పెట్టుబడులకు మించిన రాబడి వస్తే అది లాభసాటి కమతం  అవుతుందని చెప్పారు,వ్యవసాయంలో ఉత్పాదకత తక్కువ వుండటానికి అధిక శ్రమికుల వత్తిడే కారణమని,పారిశ్రామికీకరణ ద్వారా వ్యవసాయ రంగం నుండి శ్రామికులను తరలించడమే సరైన పరిష్కరమని చెప్పినారు .ఇందుకోసం “స్టేట్ సోషలిజం” అవశ్యకమని,అందులో భూమిని ప్రభుత్వ యజమాన్యాలో ఉంచి,రష్యా,చైనాలలో లాగా సమిష్టి వ్యవసాయ పద్దతిని అనుసరించాలని,వ్యవసాయానికి,పరిశ్రమ లకు కావలసిన మూలాధానాన్ని ప్రభుత్వమే సమకూర్చలని చెప్పారు, సమిష్టి వ్యవసాయంవల్ల శ్రామికులకు ఉపాధి భద్రత,కనీస ఆదాయాలు లభించి,గ్రామీణ పేదరికం, సంపద మరియు ఆదాయాల పంపిణీలో  అసమానతల సమస్య కూడా పరిష్కరించబడుతుందన్నారు. అంబేద్కర్ మన సమాజంలో సమూలమైన మార్పులను సాధించడానికి నిరంతరం ఆలోచనలు, కృషిచేసిన గొప్ప మేధావి,నవ భారత నిర్మాత,.మనదేశంలో బ్రిటిష్ వలస పాలకులు చేసిన ఆర్థిక దోపిడీని వ్యతిరేకించారు. అంబేద్కర్ మన సామాజిక ఆర్థిక వ్యవస్థ మార్పునూ, దానికి ప్రత్యామ్నాయంగా సోషలిస్టు సమ సమాజ వ్యవస్థ నిర్మాణాన్నే కోరుకున్నారు.