హైదరాబాద్‌: తెలంగాణ గ్రూప్‌ 1 ప్రిలిమినరీ పరీక్ష ఆదివారం ప్రశాంతంగా ముగిసింది. ఈ సందర్భంగా పరీక్ష రాసిన అభ్యర్థులు మాట్లాడుతూ.. గత గ్రూప్‌ 1 పరీక్ష కంటే ఈసారి పేపర్‌ సులభంగా ఉందని చెప్పారు. ఔటాఫ్‌ సబ్జెక్ట్‌ ప్రశ్నలు రాలేదన్నారు. పరీక్ష హాల్లో కూడా పకడ్బందీగా ఏర్పాట్లు చేశారని తెలిపారు. ఇన్విజిలేటర్‌ ఫోన్లను కూడా లోపలికి అనిమతించ లేదని అభ్యర్థులు తెలిపారు. ఈ సారి గ్రూప్‌ 1 లో ఎక్కువ మంది మంచి మార్కులు సాధించే అవకాశం ఉందని అభ్యర్థులు వెల్లడించారు. పేపర్‌ లీకేజీ నేపథ్యంలో గత ఏడాది జరిగిన గ్రూప్‌ 1 ప్రిలిమ్స్‌ను టీఎస్‌పీఎస్సీ రద్దు చేసింది. ఈసారి ఆఫ్‌లైన్‌ పద్ధతిలో, ఓఎంఆర్‌ విధానంలో పరీక్ష నిర్వహించాలని కమిషన్‌ నిర్ణయించింది. 503 గ్రూప్‌-1 పోస్టుల భర్తీకి గత ఏడాది ఏప్రిల్‌ 26న నోటిఫికేషన్‌ జారీ చేశారు. అక్టోబర్‌ 16న గ్రూప్‌ 1 పరీక్ష జరిగింది. 3,80,081 మంది అభ్యర్థులు దరఖాస్తు చేయగా 2,85,916 మంది అభ్యర్థులు హాజరయ్యారు. మెయిన్స్‌ పరీక్షలకు 25,050 మంది అభ్యర్థులను కమిషన్‌ ఎంపిక చేసింది. ఆదివారం జరిగిన పరీక్షకు అభ్యర్థులు షూలు ధరించి రావొద్దని.. చెప్పులను ధరించే ఎగ్జామ్‌ సెంటర్లకు రావాలని కమిషన్‌ ముందుగానే సూచించింది. గోరింటాకు, టాటూలతో రావొవద్దని, వాచీలు కూడా అనుమతించమని కమిషన్‌ స్పష్టం చేసింది.
