– సీపీఐ(ఎం) జిల్లా కార్యదర్శి మిల్కూరి వాసుదేవరెడ్డినవతెలంగాణ – శంకరపట్నం
కేంద్రంలోని బిజెపి ప్రభుత్వం, రాష్ట్రంలోని కాంగ్రెస్ ప్రభుత్వం ఎన్నికలకు ముందు ఇచ్చిన హామీలు, వాగ్దానాలన్ని అమలు చేయాలని సీపీఐ(ఎం) పార్టీ జిల్లా కార్యదర్శి మిలుకూరి వాసుదేవరెడ్డి, అన్నారు. ఈ సందర్భంగా బుధవారం స్థానిక పార్టీ కార్యాలయంలో విలేకరుల సమావేశంలో జిల్లా కార్యదర్శి వాసుదేవరెడ్డి మాట్లాడుతూ.. కేంద్ర రాష్ట్ర ప్రభుత్వాలు ఎన్నికల్లో ఇచ్చిన హామీలు అమలు చేయడంలో నిర్లక్ష్యం వహిస్తున్నాయని ఆయన అన్నారు. నేషనల్ మానిటేషన్ పైప్ లైన్ పేరుతో దేశవ్యాప్తంగా ఆరు లక్షల కోట్ల విలువైన ప్రభుత్వ ఆస్తులను ప్రైవేటు సంస్థలకు కేంద్రంలోని బిజెపి ప్రభుత్వం ధారాదత్తం చేసిందని, 200 బొగ్గు బ్లాక్ లను ప్రైవేటుపరం చేసిందన్నారు. దేశంలో నిరుద్యోగం తారస్థాయికి పెరిగిందన్నారు. దేశభక్తి ముసుగులో దేశ సంపదను ప్రైవేట్ పరం చేస్తూ మతోన్మాద రాజకీయాలు చేస్తుందన్నారు. దేశవ్యాప్తంగా నిరుద్యోగం బాగా పెరిగిపోయింది అన్నారు. ప్రభుత్వ రంగ సంస్థల్లో 40 లక్షల పైగా ఉద్యోగాలు ఖాళీగా ఉన్నాయని గుర్తు చేశారు. రైతుల ఆదాయం రెట్టింపు చేస్తామన్న బిజెపి ప్రభుత్వం అందుకు విరుద్ధంగా కార్పొరేట్ వ్యవసాయానికి అనుకూలంగా చట్టాలు చేస్తుందన్నారు. రాష్ట్ర ప్రభుత్వం అధికారంలోకి వచ్చి పది నెలలు అవుతున్న,మహాలక్ష్మి పథకంలో భాగంగా 18 సంవత్సరాల నుండి ప్రతి మహిళకు నెలకు 2500 రూపాయలు పంపిణీ చేయడంలో విఫలమైందన్నారు.
ఖరీఫ్ సీజన్ ప్రారంభమై మూడు నెలలు గడుస్తున్నప్పటికీ పెట్టుబడి సాయం కింద రైతు భరోసా పథకం ద్వారా ఎకరానికి 7500 రైతుల అకౌంట్లో వెంటనే వేయాలని, వ్యవసాయ కూలీలకు 12వేలు, కౌలు రైతులకు 15వేలు నేరుగా అకౌంట్లో వేయాలన్నారు. ఎలాంటి కొర్రీలు లేకుండా ప్రతి రైతుకు రెండు లక్షల రూపాయల రుణమాఫీ చేయాలని, జిల్లాలో ఎవరికి కేటాయించకుండా నిరుపయోగంగా ఉన్న ఉన్న డబల్ బెడ్ రూమ్ ఇండ్లను అర్హులైన పేదలకు పంపిణీ చేయాలని రిమాండ్ చేశారు. ఎవరికి కేటాయించకపోవడం మూలంగా అసాంఘిక కార్యకలాపాలకు అడ్డాగా మారాయని, శిథిలావస్థకు చేరుకుంటున్నాయన్నారు. ఇంటి స్థలం లేని వారికి 200 గజాల స్థలాన్ని కేటాయించి ఇంటి నిర్మాణానికి రాష్ట్ర ప్రభుత్వం ఐదు లక్షలు కేంద్ర ప్రభుత్వం 10 లక్షలు ఇవ్వాలన్నారు. నిరుద్యోగ భృతి 3116 ప్రతి నిరుద్యోగి అకౌంట్లో వేయాలన్నారు. అధికారంలోకి వచ్చిన వెంటనే రెండు లక్షల ఉద్యోగాలు భర్తీ చేస్తామన్న హామీని నిలబెట్టుకోవాలన్నారు. తెలంగాణ ఏర్పడ్డ నాటినుండి నేటి వరకు కొత్తగా ఒక్క రేషన్ కార్డు కూడా ఈ రాష్ట్రంలో ఇవ్వలేదని, లక్షలాది కుటుంబాలు ప్రభుత్వం ప్రవేశపెట్టిన అనేక పథకాలకు దూరమవుతున్నారన్నారు. వెంటనే రేషన్ కార్డులు మంజూరు చేయాలని డిమాండ్ చేశారు. పెండింగ్ లో ఉన్న విద్యార్థుల ఫీజు రియంబర్స్మెంట్, ఉపకార వేతనాలు వెంటనే విడుదల చేయాలని, రైతు పండించిన అన్ని రకాల పంటలకు బోనస్ 500 ప్రకటించి అమలు చేయాలన్నారు. ధరణి భూ సమస్యలు వెంటనే పరిష్కరించాలని, పెండింగ్ లో ఉన్న దరఖాస్తులన్నీ పరిష్కరించాలన్నారు. గ్రామీణ ఉపాధి హామీ కూలీల పెండింగ్ వేతనాలు వెంటనే చెల్లించాలని, సీజనల్ వ్యాధుల పట్ల అప్రమత్తంగా ఉండి, ప్రభుత్వ ఆసుపత్రుల్లో కనీస సౌకర్యాలు కల్పించాలని,ప్రైవేట్ హాస్పిటల్లో దోపిడీని అరికట్టాలని, ప్రతి ఇంటికి వెళ్లి ఫీవర్ సర్వే నిర్వహించాలన్నారు. జిల్లాలో పెద్ద ఎత్తున డెంగ్యూ జ్వరాలు ప్రబలుతున్నాయని, వెంటనే జిల్లాలో హెల్త్ ఎమర్జెన్సీ ప్రకటించాలని డిమాండ్ చేశారు. ఈ సమావేశంలో పార్టీ జిల్లా కమిటీ సభ్యులు వెల్మారెడ్డి రాజిరెడ్డి, సుంకరి సంపత్, నాయకులు కనకం దుర్గాప్రసాద్, చక్రపాణి, తదితరులు పాల్గొన్నారు.
