విక్రాంత్‌, చాందిని చౌదరి హీరో,హీరోయిన్లుగా నటిస్తున్న సినిమా ‘సంతాన ప్రాప్తిరస్తు’. ఈ చిత్రాన్ని మధుర ఎంటర్టైన్మెంట్‌, నిర్వి ఆర్ట్స్‌ బ్యానర్‌ పై మధుర శ్రీధర్‌ రెడ్డి, నిర్వి హరిప్రసాద్‌ రెడ్డి సంయుక్తంగా నిర్మిస్తున్నారు. ‘ఏబీసీడీ’, ‘అహ నా పెళ్లంట’ వెబ్‌ సిరీస్‌లను తెరకెక్కించిన సంజీవ్‌ రెడ్డి డైరెక్ట్‌ చేస్తున్నారు. మ్యూజికల్‌ ఫ్యామిలీ ఎంటర్‌టైనర్‌గా ఈ సినిమా రూపొందుతోంది. బుధవారం హీరోయిన్‌ చాందిని చౌదరి పుట్టిన రోజు సందర్భంగా ఆమె క్యారెక్టర్‌ ఫస్ట్‌ లుక్‌ పోస్టర్‌ను రిలీజ్‌ చేశారు. ఈ సినిమాలో కల్యాణి ఓరుగంటి అనే పాత్రలో చాందినీ చౌదరి నటిస్తోంది. ప్రభుత్వ ఉద్యోగి తన జీవిత భాగస్వామిగా కావాలని, సాఫ్ట్‌వేర్‌ ప్రొఫెషనల్స్‌ వద్దని ఆమె కోరుకుంటున్నట్లు పోస్టర్‌ ద్వారా రివీల్‌ చేశారు. ప్రస్తుతం చాలామంది ఎదుర్కొంటున్న సమస్య సంతానలేమి. ఆ సమస్యను ఈ సినిమాలో వినోదాత్మకంగా చూపించబోతున్నారు. ప్రస్తుతం ఈ సినిమా రెగ్యులర్‌ షూటింగ్‌ జరుపుకుంటోంది.
