– కండ్లతో చూసిందే నమ్మండి.. జూటా మాటలు కాదు
– అసైన్డ్‌ భూములకు హక్కులు కల్పిస్తాం
– రోడ్‌ షోలో మంత్రి హరీశ్‌రావు
నవతెలంగాణ-వర్గల్‌
కాంగ్రెస్‌ అధికారంలోకి వస్తే కరువుతో పాటు కరెంట్‌ కష్టాలు వస్తాయని ఆర్థిక, వైద్య ఆరోగ్యశాఖ మంత్రి హరీశ్‌రావు అన్నారు. సోమవారం సిద్దిపేట జిల్లా వర్గల్‌ మండల కేంద్రంలో నిర్వహించిన రోడ్‌ షోలో ఎమ్మెల్సీ యాదవ రెడ్డి, ఎఫ్‌ డీసీ చైర్మెన్‌ వంటేరు ప్రతాప్‌రెడ్డితో కలిసి మంత్రి హరీశ్‌రావు పాల్గొన్నారు. రైతులకు ఇచ్చిన అసైన్డ్‌ భూములకు వచ్చే ప్రభుత్వంలో సర్వ హక్కులు కల్పిస్తామన్నారు. బీఆర్‌ఎస్‌ ప్రభుత్వం అధికారంలోకి వస్తే పేదల భూములను గుంజుకుంటుందని ప్రతిపక్ష నాయకులు జూటా మాటలు చెబుతున్నారన్నారు. నీళ్లు, 24 గంటల కరెంటు, పేదల కోసం వైద్యం అందుబాటులోకి తీసుకొచ్చింది సీఎం కేసీఆర్‌యేనని చెప్పారు. కాంగ్రెస్‌, బీజేపీ ప్రభుత్వాలు అధికారంలోకి వస్తే గ్రామాలలో కేసీఆర్‌ వేసిన రోడ్లకు గతుకులు వస్తే డాంబర్‌తో కూడా నింపరన్నారు. తెలంగాణలో సీఎం కేసీఆర్‌ బాధ్యతలు చేపట్టిన తర్వాత భూములకు విలువ పెరిగిందన్నారు. బీజేపీ, కాంగ్రెస్‌ అధికారంలో ఉన్న రాష్ట్రాల్లో రూ. 600 పెన్షన్‌ మాత్రమే ఇస్తున్నారన్నారు. తెలంగాణ రాష్ట్రంలో సీఎం కేసీఆర్‌ 2వేల పెన్షన్‌ ఇస్తున్నారని, బీజేపీ పాలిత రాష్ట్రాల్లో 2వేల పెన్షన్‌ ఎక్కడైనా ఇస్తున్నారా ఈటల రాజేందర్‌ ప్రజలకు సమాధానం చెప్పాల్సిన అవసరం ఉందన్నారు. కేసీఆర్‌ రాక ముందు గజ్వేల్‌ ప్రాంతం ఎలా ఉందో, కేసీఆర్‌ గజ్వేల్‌ వచ్చిన తర్వాత ఎలా ఉందో ప్రజలు గుండె మీద చేయి వేసుకొని ఒకసారి ఆలోచించాలన్నారు. ఎక్కడో ఉన్న గోదావరి జలాలను తీసుకొచ్చి కాళ్ళు కాడిగింది వాస్తవం కాదా అన్నారు. సీఎం కేసీఆర్‌ ముచ్చటగా మూడవసారి సీఎంగా రికార్డు సృష్టిచబోతున్నట్టు చెప్పారు. ఈ కార్యక్రమంలో బీఆర్‌ఎస్‌ మండల అధ్యక్షులు వెంకట్‌ రెడ్డి, జడ్పీటీసీ బాలమల్లు యాదవ్‌, ఎంపీపీ లతరమేష్‌, ప్యాక్స్‌ చైర్మెన్‌ రామకృష్ణారెడ్డి పాల్గొన్నారు.
