– వర్షాకాలానికి రైతు భరోసా పోయినట్లేనని తుమ్మల చేసిన ప్రకటనపై బిఆర్ఎస్ నాయకుల ఆగ్రహం– వెంటనే రైతుల ఖాతాలో రైతు భరోసా వేయాల్సిందేనని డిమాండ్
– మండల కేంద్రంలో మంత్రి దిష్టిబొమ్మ దహనం
నవతెలంగాణ – కమ్మర్ పల్లి
వానాకాలం రైతు భరోసాను ఎగగొట్టటం రాష్ట్ర రైతాంగాన్ని మోసం చేయటమేనని స్థానిక బిఆర్ఎస్ నాయకులు అన్నారు.వర్షాకాలానికి రైతు భరోసా పోయినట్లేనని రాష్ట్ర వ్యవసాయ శాఖ మంత్రి తుమ్మల నాగేశ్వరరావు చేసిన ప్రకటనపై బిఆర్ఎస్ నాయకులు ఆగ్రహం వ్యక్తం చేశారు. రాష్ట్ర ప్రభుత్వం ఎన్నికల్లో ఇచ్చిన హామీ మేరకు వెంటనే రైతుల ఖాతాలో ఎకరానికి రూ.7వేల 5 వందల చొప్పున రైతు భరోసా వేయాల్సిందేనని డిమాండ్ చేశారు.శనివారం మండల కేంద్రంలోని ఆచార్య కొండ లక్ష్మణ్ బాపూజీ చౌరస్తా(హాస కొత్తూర్ ) వద్ద రైతు భరోసా పై మంత్రి తుమ్మల వ్యాఖ్యలను నిరసిస్తూ రాష్ట్ర ప్రభుత్వం, మంత్రి తుమ్మల నాగేశ్వర రావు దిష్టిబొమ్మను దహనం చేశారు. ఈ సందర్భంగా పలువురు బిఆర్ఎస్ పార్టీ నాయకులు మాట్లాడుతూ.. కాంగ్రెస్ గెలిస్తే రైతు బంధుకు రాం రాం చెబుతున్నారన్న కేసీఆర్ మాటలను రేవంత్ రెడ్డి సర్కార్ అక్షరాల నిజం చేసిందన్నారు.వానాకాలం పంట సీజన్‌ కు రైతుబంధును పూర్తిగా ఎగ్గొట్టేసి కాంగ్రెస్ ప్రభుత్వం లక్షలాది మంది రైతుల నోట్లో మట్టి కొట్టిందన్నారు. రేపు, మాపు అంటూ నెట్టుకొస్తున్నప్పుడే ఈ ప్రభుత్వం మీద అనుమానం కలిగిందని, ఇప్పుడు స్వయంగా వ్యవసాయ శాఖ మంత్రి తుమ్మల నాగేశ్వర్‌ రావు చేతులేస్తున్నట్లు ప్రకటించారన్నారు. ప్రభుత్వం చేతగానీ తనంతో రైతన్నలను మోసం చేస్తామంటే ఊరుకునేలేదని బిఆర్ఎస్ నాయకులు హెచ్చరించారు.
సబ్ కమిటీ, గైడ్ లైన్స్ అంటూ పెట్టుబడి సాయాన్ని ఎగ్గొడతామంటే రైతులు వీపు చింతపండు చేస్తారన్నారు.ఎద్దు ఏడ్చినా ఏవుసం, రైతు ఏడ్చినా రాజ్యం బాగుపడదంటారు. అధికారంలోకి వచ్చిన తర్వాత అన్ని విధాలుగా రైతును ఏడిపిస్తున్న కాంగ్రెస్ కు రైతుల ఉసురు తప్పదన్నారు.రైతు భరోసాకు డబ్బులు లేకపోవటంతోనే సబ్ కమిటీ అంటూ డ్రామాలు స్టార్ట్ చేశారని, కేసీఆర్ పదివేలు ముష్టి వేస్తున్నాడు. మేము రూ.15 వేలు ఇస్తామన్న సిఫాయి ఎక్కడ? అని ప్రశ్నించారు.పేదల కడపు కొట్టి రూ.లక్షా 50 వేల కోట్లతో మూసీ సుందరీకరణకు డబ్బులుంటాయా? ఇచ్చిన హామీ మేరకు రైతులకు ఎకరానికి రూ.7500 ఇచ్చేందుకు పైసలు లేవా? అని ప్రభుత్వాన్ని నిలదీశారు.పచ్చి అబద్దాలు, మోసాలతో అధికారంలోకి వచ్చేందుకు రేవంత్ రెడ్డి రైతులను దగా చేశాడన్నారు.నీ దగాకోరు మాటలు నమ్మి గెలిపించిన రైతులను అరిగోస పెడుతున్నావని, రైతులతో చెలగాటమాడితే మాడి మసి అవక తప్పదని హెచ్చరించారు.రుణమాఫీ మోసం చాలదన్నట్లు… ఇప్పుడు రైతు భరోసాలోనూ దగానే అన్నారు. ఎట్టి పరిస్థితుల్లో రైతులకు పెట్టుబడి సాయం ఇవ్వాల్సిందేనని, లేదంటే ఎక్కడికక్కడ కాంగ్రెస్ పార్టీ ప్రజాప్రతినిధులను ముట్టడిస్తామని హెచ్చరించారు. రైతులకు బీఆర్ఎస్ అండగా ఉంటుందని, రుణమాఫీ, రైతు భరోసా ఇచ్చే వరకు కాంగ్రెస్ ప్రభుత్వాన్ని వదిలేది లేదన్నారు. కార్యక్రమంలో బిఆర్ఎస్ పార్టీ నాయకులు మాజీ ఎంపీటీసీ సభ్యుడు మైలారం సుధాకర్, రైతు విభాగం మండల అధ్యక్షుడు బద్దం రాజశేఖర్, యూత్ మండల అధ్యక్షుడు కొత్తపల్లి రఘు, టిఆర్ఎస్ పార్టీ గ్రామ శాఖ అధ్యక్షులు కొంటి కంటి నరేందర్, నాయకులు సుంకర మురళి, సంత రాజేశ్వర్, మాజీ సింగిల్ విండో చైర్మన్ గడ్డం నర్సారెడ్డి, నోముల నరేందర్, నాయకులు, కార్యకర్తలు, తదితరులు పాల్గొన్నారు.
