ఎన్టీఆర్‌ నటిస్తున్న తాజా చిత్రం ‘దేవర’. బాలీవుడ్‌ నటి జాన్వీ కపూర్‌ హీరోయిన్‌గా నటిస్తోంది. మరో బాలీవుడ్‌ నటుడు సైఫ్‌ అలీఖాన్‌ కీలక పాత్రలో అలరించబోతున్నారు. డైరెక్టర్‌ కొరటాల శివ ఈ చిత్రాన్ని రెండు భాగాలుగా తెరకెక్కిస్తున్నారు. అందులో తొలి భాగం ‘దేవర పార్ట్‌ 1’ ప్రపంచ వ్యాప్తంగా అక్టోబర్‌ 10న విడుదల కాబోతోంది. దసరా సందర్భంగా దేవర పార్ట్‌ 1 తెలుగు, హిందీ, తమిళ, కన్నడ, మలయాళ భాషల్లో గ్రాండ్‌ రిలీజ్‌ కాబోతోన్నట్టుగా మేకర్లు ప్రకటించారు. ఈ నేపథ్యంలో రిలీజ్‌ చేసిన పోస్టర్‌ ఒకటి నెట్టింట్లో అభిమానులను తెగ ఆకట్టుకుంటోంది. ఎన్టీఆర్‌ పోస్టర్‌ను చూసి ఫ్యాన్స్‌ సంబరపడుతున్నారు. ఈ పోస్టర్‌ చూస్తుంటే యాక్షన్‌ సీక్వెన్స్‌ హై లెవెల్లో ఉండబోతున్నాయని, ఎన్టీఆర్‌ను మరింత మాస్‌ కారెక్టర్‌లో చూపించబోతున్నారని అర్థమైంది. ఇది వరకే రిలీజ్‌ చేసిన దేవర గ్లింప్స్‌ ఏ రేంజ్‌లో ట్రెండ్‌ అయిందో.. సోషల్‌ మీడియాలో ఎలాంటి రికార్డులను క్రియేట్‌ చేసిందో అందరికీ తెలిసిందే. ఈ చిత్రంలో ఇంకా ప్రకాష్‌రాజ్‌, శ్రీకాంత్‌, టామ్‌ షైన్‌ చాకో, నరైన్‌ తదితరులు కీలక పాత్రల్లో నటిస్తున్నారు. నందమూరి కళ్యాణ్‌ రామ్‌ సమర్పణలో ఎన్టీఆర్‌ ఆర్ట్స్‌, యువసుధ ఆర్ట్స్‌ బ్యానర్స్‌పై మిక్కిలినేని సుధాకర్‌, హరికష్ణ.కె ఈ చిత్రాన్ని నిర్మిస్తున్నారు. అనిరుద్‌ సంగీత సారథ్యం వహిస్తుండగా శ్రీకర్‌ ప్రసాద్‌ ఎడిటర్‌గా, రత్నవేలు సినిమాటోగ్రాఫర్‌గా, సాబు సిరిల్‌ ప్రొడక్షన్‌ డిజైనర్‌గా వర్క్‌ చేస్తున్నారు.
