ఎన్టీఆర్‌, కొరటాల శివ కాంబినేషన్‌లో రూపొందుతున్న భారీ బడ్జెట్‌ పాన్‌ ఇండియా మూవీ ‘దేవర’ పార్ట్‌ 1. బాలీవుడ్‌ బ్యూటీ జాన్వీ కపూర్‌ హీరోయిన్‌గా నటిస్తోంది. బాలీవుడ్‌ నటుడు సైఫ్‌ అలీఖాన్‌ కీలక పాత్రలో నటిస్తున్నారు. రెండు భాగాలుగా రూపొందుతున్న ఈ చిత్రం మొదటి భాగాన్ని తెలుగు, తమిళ, హిందీ, కన్నడ, మలయాళ భాషల్లో దసరా సందర్భంగా అక్టోబర్‌ 10న ప్రపంచ వ్యాప్తంగా భారీ ఎత్తున రిలీజ్‌ చేస్తున్నారు. రీసెంట్‌గా ఈ మూవీ కొత్త షెడ్యూల్‌ గోవాలో ప్రారంభమైంది. ఇప్పటికే అక్కడ చిత్రీకరణను చేసిన సంగతి తెలిసిందే. ఈ సినిమా నుంచి వస్తోన్న అప్‌డేట్స్‌తో రోజు రోజుకీ అంచనాలు పెరుగుతున్నాయి. ఈ నేపథ్యంలో మేకర్స్‌ మరో ఆసక్తికరమైన అప్‌ డేట్‌తో అందర్నీ సర్‌ప్రైజ్‌ చేయడంతోపాటు ఈ సినిమా నుంచి వర్కింగ్‌ స్టిల్స్‌ విడుదల చేశారు. ఇందులో ఎన్టీఆర్‌తో పాటు దర్శకుడు కొరటాల శివ, రాజు సుందరం మాస్టర్‌ సరికొత్త లుక్‌తో కనిపిస్తున్నారు. రాజు సుందరం కొరియోగ్రఫీలో ఈ చిత్రానికి సంబంధించిన మాంటేజ్‌ సాంగ్‌ చిత్రీకరణ గోవాలో జరుగుతుంది. ఎన్టీఆర్‌ను సరికొత్త పాత్రలో చూడటానికి ఆయన అభిమానులు, ప్రేక్షకులు ఆసక్తిగా ఎదురు చూస్తున్నారు. నందమూరి కళ్యాణ్‌ రామ్‌ సమర్పణలో ఎన్టీఆర్‌ ఆర్ట్స్‌, యువసుధ ఆర్ట్స్‌ బ్యానర్స్‌పై మిక్కిలినేని సుధాకర్‌, హరికష్ణ.కె ఈ చిత్రాన్ని నిర్మిస్తున్నారు.
