– ఇరాన్‌లో తమ రాయబారిని వెనక్కి పిలిపించిన పాక్‌
ఇస్లామాబాద్‌: ఇరాన్‌లోని తమ రాయబారిని పాకిస్తాన్‌ బుధవారం వెనక్కి పిలిపించింది. పాకిస్తాన్‌లో సున్నీ వేర్పాటువాద గ్రూపు స్థావరాలను లక్ష్యంగా చేసుకుని ఇరాన్‌ దాడులు జరిపిన మరుసటి రోజు పాక్‌ ఈ చర్య తీసుకుంది. పాక్‌ విదేశాంగ శాఖ ప్రతినిధి ముంతాజ్‌ జహ్రా ఈ విషయాన్ని వెల్లడించారు. తమ గగన తలాన్ని ఉల్లంఘించి, ఇద్దరు చిన్నారుల మృతికి కారణమయ్యారంటూ పాకిస్తాన్‌ ఈ దాడిని తీవ్రంగా నిరసించింది. మంగళవారం రాత్రి పొద్దుపోయిన తర్వాత ఇరాన్‌ విదేశాంగ శాఖకు తమ నిరసనను పాక్‌ తెలిపింది. ఇరాన్‌ రాయబారిని పిలిపించి పాక్‌ సార్వభౌమాధికారాన్ని ఉల్లంఘించిన ఈ దాడిని తీవ్రంగా ఖండించినట్లు తెలియజేసింది. ఈ దాడి పర్యవసానాలకు బాధ్యత కచ్చితంగా ఇరాన్‌దేనని స్పష్టం చేసింది. ఇస్లామాబాద్‌లోని ఇరాన్‌ రాయబారి ప్రస్తుతం సొంత దేశంలో పర్యటిస్తున్నారు. ఆయనను తిరిగి పాక్‌కు వచ్చేందుకు అనుమతించేది లేదని పాక్‌ పేర్కొంది. ఈ దాడి నేపథ్యంలో ఇరు దేశాల మధ్య దౌత్య సంబంధాలు దెబ్బతిన్నాయి. ఈ నెల ఆరంభంలో ఆత్మాహుతి బాంబుదాడులకు పాల్పడి 90మంది మరణానికి కారణమయ్యారంటూ ఇరాక్‌, సిరియాల్లోని ఇస్లామిక్‌ స్టేట్‌ లక్ష్యాలపై ఇరాన్‌ దాడులు చేసింది.
Related posts:
ప్రపంచ వ్యాప్తంగా మరింతగా పోగుపడిన సంపన్నుల సంపద
ప్రపంచవ్యాప్తంగా నూతన సంవత్సర వేడుకలు సిడ్నీ, ఆక్లాండ్‌లో ముందుగా.
నోబెల్‌ శాంతి బహుమతి గ్రహీత మొహమ్మద్‌ యూనస్‌కి జైలుశిక్ష
ఇరాన్‌లో జంట పేలుళ్లు మా పనే.. ఉగ్రసంస్థ ఐఎస్ ప్రకటన
జర్మనీలో రైతులు, రైల్వే కార్మికుల నిరసల హోరు
అమెరికా అధ్యక్ష ఎన్నికల బరి నుంచి దూరం