భారతదేశ చరిత్రతోపాటు సావర్కర్‌ గురించి ప్రచారంలోవున్న కట్టుకథలపై కేంద్ర మాజీ మంత్రి, ఆర్థికవేత్త, జర్నలిస్ట్‌, సుప్రసిద్ద రచయిత అయిన అరుణ్‌శౌరి రచించిన ‘ద న్యూ ఐకాన్‌’ అనే గ్రంథాన్ని ఈ నెల 30 నుంచి మార్కెట్‌లో అందుబాటులోకి రానుంది. హిందూ త్వ సిద్ధాంతకారుడు, సమకాలీన భారత రాజకీయాల్లో అత్యంత వివాదాస్పద వ్యక్తిగా భావించబడుతున్న వినాయక్‌ దామోదర్‌ సావర్కర్‌ జీవితం, భావజాలం, వారసత్వాలను ఈ పుస్తకం ”విమర్శనాత్మకంగా విశ్లేషిస్తుంది”. ఎందుకంటే, పుస్తక రచయిత అటల్‌ బిహారీ వాజ్‌పేయి ప్రభుత్వంలో (1998-2004) అరుణ్‌ శౌరిమంత్రిగా పనిచేశారు. ఆ కాలంలో ఆయన ప్రముఖ హిందూ జాతీయవాద మేధావిగా పేరొందారు. సావర్కర్‌ వారసత్వాన్ని, ఆయన వాదనలను, ఆదేశాలను చారిత్రక ఆధారాలతో సరిపోల్చడం ద్వారా ”ద న్యూ ఐకాన్‌”లో పద్మభూషణ్‌ అవార్డు గ్రహీత అయిన అరుణ్‌శౌరి విశ్లేషిస్తారు. సావర్కర్‌ ఒక వివాదాస్పద వ్యక్తిగా మిగిలిపోయాడు. తన”హిందూ-మెజారిటీ దేశం” దృక్పథాన్ని హిందూత్వను సమర్థించే మితవాదులు చాలామంది గౌరవిస్తారు. అయితే ‘మినహాయింపు లేక ఎక్స్‌ క్లూషనరీ’ రాజకీయాలను సమర్థించినందుకు ఆయన తీవ్ర విమర్శకు గురయ్యారు. శౌరి తన గ్రంథంలో పొందుపరిచిన విమర్శలు తీవ్రమైన చర్చలకు దారితీసే అవకాశం ఉంది. ఎందుకంటే వ్యవస్థీకృత మతం, హిందూ మితవాద భావజాలంతో సహా రాజకీయ సిద్ధాంతాలను సవాలు చేయడంలో పేరుగాంచిన వ్యక్తి నుండి వచ్చిన విమర్శలవి. సమకాలిన రికార్డులు, నిఘా నివేదికలు, జీవిత చరిత్రలు, ప్రాచీనపత్ర భాండాగారాల తో(ఆర్కైవ్స్‌) సహా ”550కి పైగా వనరుల” ఆధారంగా, భారతీయ చరిత్ర, హిందూ అస్తిత్వాల గురించే కాకుండా సావర్కర్‌ ప్రవచించిన తన స్వీయ కట్టుకథలను కూడా ఒక క్రమపద్ధతిలో ఈ పుస్తకం కూల్చివేస్తుందని శౌరీ చెప్పిన విషయం.”ఈ వక్కాణింపులు, వాదనలు అస్సలు పరిశీలనకు నిలవజాలవు. సావర్కర్‌ మన గురించి, మన చరిత్ర గురించి లేదా నిజానికి తన గురించి తాను సృష్టించిన కట్టుకథలు కచ్చితంగా పరీక్షకు నిలువవు. సావర్కర్‌ ఆదేశాలను మనం స్వీకరించినట్టయితే హిందూత్వ రాజ్యం తాను నిందించే ‘ఇస్లామిక్‌’ రాజ్యంగా మారుతుందని అరుణ్‌ శౌరి ఈ గ్రంథంలో వివరించాడు. మన సమాజం ద్వేషంతో నిండిపోతుంది. ప్రతీకారం, ఆయన మాటల్లో చెప్పాలంటే ”అతి క్రూరత్వం”, దానితో పాటు వచ్చేవన్నీ నియమాలు అవుతాయి” అని శౌరి ఒక పత్రికా ప్రకటనలో తెలిపారు. ”అటువంటి పరిస్థితి నుంచి బయటపడటానికి సంభాషణ లేక ప్రవచనం ఒక సాధనంగా ఉంటుంది. ‘మహాకారణం’ పేరుతో ఉద్దేశపూర్వకంగా వ్యాపింప జేసే అసత్యాల తాకిడికి అది ముక్కలయి ఉండేదే. ఒక్కమాటలో చెప్పాలంటే, హిందూమతం విపరీత పోకడలకు నెలవయ్యేది. భారతదేశం పాకిస్థాన్‌గా మారే మార్గంలో పయనించి ఉండేది”.
(ది వైర్‌ తెలుగు.ఇన్‌ సౌజన్యంతో)
అనువాదం: నెల్లూరు నరసింహారావు
