పిల్లలకు పాలు తాగించడానికి సాధారణంగా అందరూ ప్లాస్టిక్‌ బాటిళ్లను ఉపయోగిస్తారు. అవి చవుకగా ఉంటాయి కాబట్టి ఎక్కువ మంది వాటినే వాడతారు. చాలా మంది తల్లులు ఈ బాటిళ్లను వేడినీటిలో కడిగి, క్లీన్‌ చేసి మళ్లీ ఉపయోగిస్తున్నారు.. కానీ ఇలా చేయడం వల్ల బిడ్డ శరీరానికి చాలా హాని కలుగుతుందని వైద్యులు అభిప్రాయపడుతున్నారు. ప్లాస్టిక్‌ బాటిళ్లను వేడి నీటితో శుభ్రం చేయడం, వేడి పాలతో నింపడం మానుకోవాలని చెపుతున్నారు.
వైద్యుల అభిప్రాయం ప్రకారం వేడినీరు నిజానికి బాటిల్‌లోని మైక్రోప్లాస్టిక్‌లను పాలు లేదా నీటితో కలిపి శిశువు శరీరంలోకి ప్రవేశిస్తుందని ఒక పరిశోధనలో తేలింది. ఈ మైక్రోప్లాస్టిక్‌లు శిశువు కడుపు, మెదడుకు హాని కలిగిస్తాయి.
పిల్లలు ప్లాస్టిక్‌కు బదులుగా గాజు లేదా స్టెయిన్‌లెస్‌ స్టీల్‌ బాటిళ్లను ఉపయోగించాలి. ప్లాస్టిక్‌ బాటిల్‌ ఉపయోగిస్తుంటే.. దానిని వేడి చేయవద్దు. వైద్యుల అభిప్రాయం ప్రకారం, ప్లాస్టిక్‌ బాటిళ్లను వేడి చేసినప్పుడు వాటి నుండి BPA, Phthalates విడుదలవుతాయి. దీని కారణంగా, పెరుగుతున్న పిల్లల్లో హార్మోన్ల సమతుల్యత దెబ్బతింటుంది. ఆరోగ్య సమస్యలు తలెత్తుతాయి. ప్లాస్టిక్‌ వాడకం పర్యావరణానికి కూడా హానికరం. కాలక్రమేణా, ప్లాస్టిక్‌ సీసాలు గీతలు పడతాయి. అందులో బ్యాక్టీరియా చేరి ఆరోగ్యానికి ప్రమాదకరంగా మారుతుంది. బాటిల్‌ను తరచూ మార్చడం వల్ల పర్యావరణానికి ముప్పు వాటిల్లుతోంది.
ప్లాస్టిక్‌ సీసాలు కొన్నిసార్లు పాల రుచి, వాసనను మారుస్తాయి. దీంతో పిల్లలు పాలు తాగేందుకు నిరాకరిస్తున్నారు. స్టీల్‌, గ్లాస్‌ బాటిళ్లతో ఇలా జరగదు. అందువల్ల, పిల్లల ఆరోగ్యానికి ప్లాస్టిక్‌కు బదులుగా స్టీల్‌ బాటిల్‌ సరైన ఎంపిక.
