బెంగళూరు : భారత అంతరిక్ష పరిశోధనా సంస్థ (ఇస్రో) చంద్రయాన్‌ 3 జాబిల్లికి మరింత చేరువైంది. బెంగళూరులోని ఇస్రో టెలిమెట్రీ, ట్రాకింగ్‌, కమాండింగ్‌ నెట్‌వర్క్‌ (ఇస్ట్రాక్‌) చంద్రయాన్‌ 3 కక్ష్యను బుధవారం ఉదయం 8.30 గంటలకు కుదించి చివరిదైన 5వ కక్ష్యలోకి ప్రవేశపెట్టిందని ఇస్రో తెలిపింది. ‘జాబిల్లి దిశగా ఇక ఒక అడుగే దూరం..చంద్రుని చుట్టూ చక్కర్లు కొట్టేందుకు ఇదే చివరి కక్ష్య. 153 కిమీ × 163 కిమీ క్షక్ష్యలోకి వ్యోమనౌక ప్రవేశించింది. దీంతో చంద్రుని చేరేందుకు అవసరమైన విన్యాసాలు పూర్తయ్యాయి. ఇక ల్యాండ్‌ అవ్వడమే మిగిలింది’ అని ఇస్రో బుధవారం తెలిపింది. చంద్రయాన్‌ 3 వ్యోమనౌకలో ల్యాండర్‌ మాడ్యూల్‌ (ఎల్‌ఎం), ప్రొపల్షన్‌ మాడ్యూల్‌ (పిఎం), రోవర్‌ వున్నాయి. ఈ నెల 17న పిఎం నుంచి ఎల్‌ఎం విడిపడి ప్రయాణాన్ని సాగిస్తాయని ఇస్రో పేర్కొంది. అన్ని సజావుగా సాగితే చంద్రుని దక్షిణ ధ్రువ ప్రాంతంలో ఈ నెల 23న సాయంత్రం 5.47 గంటలకు చంద్రయాన్‌ మోసుకెళ్లిన రోవర్‌ పరుగులు తీయనుందని తెలిపింది. గత జులై నెల 14వ తేదీన శ్రీహరికోటలోని సతీష్‌ ధావన్‌ అంతరిక్ష కేంద్రం నుంచి చంద్రయాన్‌ 3ని నింగిలోకి పంపిన సంగతి తెలిసిందే.
