నవతెలంగాణ బ్యూరో – హైదరాబాద్‌
వివక్షకు వ్యతిరేకంగా తన జీవితకాలం పోరాడిన అంబేద్కర్‌ అజరామర కీర్తిని ప్రపంచానికి చాటేందుకు నాటి బీఆర్‌ఎస్‌ ప్రభుత్వం ఎంతో కృషి చేసిందనీ, ఆనేక విప్లవాత్మక కార్యక్రమాలను అమలు చేసిందని ఆ పార్టీ అధినేత, మాజీ సీఎం కేసీఆర్‌ తెలిపారు. బడుగు బలహీన వర్గాల ఆశాజ్యోతి, రాజ్యాంగ నిర్మాత, భారతరత్న డాక్టర్‌ బాబాసాహెబ్‌ అంబేద్కర్‌ వర్ధంతి సందర్భంగా దేశానికి వారందించిన సేవలను, అనితర సాధ్యమైన కృషిని కేసీఆర్‌ స్మరించుకున్నారు. ఆయనకు నివాళులర్పించారు. దేశ స్వాతంత్య్ర అనంతర కాలంలో ప్రపంచానికే ఆదర్శవంతమైన స్వయం పాలన కోసం రాజ్యాంగాన్ని అందించారని తెలిపారు. ఆర్థిక, సామాజిక, రాజకీయ, సాంస్కృతిక తదితర రంగాల్లో అణగారిన వర్గాలకు సమాన వాటా సమన్యాయం దక్కేలా రాజ్యాంగాన్ని పొందుపరచడంలో బాబాసాహెబ్‌ కనబరిచిన దార్శనికత మహౌన్నతమైనదని కేసీఆర్‌ కొనియాడారు. దేశంలో రాష్ట్రాల ఏర్పాటులో భాగంగా డాక్టర్‌ బీ.ఆర్‌.అంబేద్కర్‌ పొందుపరిచిన ఆర్టికల్‌ 3, ఈ దిశగా ఆయన దార్శనికత, తెలంగాణ రాష్ట్ర ఏర్పాటుకు మార్గం చూపిందని గుర్తు చేశారు. అంబేద్కర్‌ విశేష కృషిని, ఆయన అందించిన స్ఫూర్తిని చాటేందుకు ప్రపంచంలోనే అత్యంత మహౌన్నతమైన రీతిలో వారి స్ఫురద్రూపాన్ని తెలంగాణాలో అత్యంత ఎత్తయిన విగ్రహంగా నిలుపుకున్నామన్నారు. దేశ పాలనకు తన రాజ్యాంగం ద్వారా బాటలు వేసిన డాక్టర్‌ బాబాసాహెబ్‌ అంబేద్కర్‌ ఘనమైన కీర్తిని చాటేందుకు దేశ చరిత్రలోనే మునుపెన్నడూ లేనివిధంగా తెలంగాణ పాలనా భవనానికి ”డాక్టర్‌ బీ.ఆర్‌.అంబేద్కర్‌ తెలంగాణ స్టేట్‌ సెక్రటేరియట్‌” అని పేరు పెట్టుకున్నామని తెలిపారు.అంటరాని వర్గాలుగా తర తరాలుగా వివక్షకు గురవుతున్న దళిత సమాజాన్ని ఆర్థికంగా బలోపేతం చేసి వారి సామాజిక గౌరవం ఇనుమడింప చేసే దిశగా, అంబేడ్కర్‌ స్ఫూర్తితోనే నాటి బీఆర్‌ఎస్‌ ప్రభుత్వం దళిత బంధు పథకం అమలు చేసిందన్నారు. దళితుల జీవితాల్లో వెలుగులు నింపే దిశగా ఆ పథకం సత్ఫలితాలు సాధించిందని తెలిపారు. అదే స్ఫూర్తిని కొనసాగిస్తూ అన్ని రంగాల్లో వివక్ష లేని సమ సమాజ నిర్మాణానికి అవసరమైన కృషి చేయడం ద్వారానే, అంబేద్కర్‌ మహనీయునికి మనం ఘన నివాళి అర్పించగలమని కేసీఆర్‌ పేర్కొన్నారు.
Related posts:
వదంతులతో భయాందోళనలు సృష్టిస్తే ఊరుకోం: రేవంత్ రెడ్డి
మహాత్మా జ్యోతిరావుపూలేకు నివాళులు అర్పించిన సీఎం రేవంత్
కేఏ పాల్ పిటిషన్ ను కొట్టివేసిన తెలంగాణ హైకోర్టు
వేనక్కి తగ్గిన రేవంత్ రెడ్డి ప్రభుత్వం.. లగచర్ల భూ సేకరణ రద్దు
నేటి వామపక్ష విద్యార్థి సంఘాల బడుల బంద్‌కు డీవైఎఫ్‌ఐ మద్దతు
తెలంగాణ వ్యతిరేకులతో కేటీఆర్‌ సంబురాలా?