ఎరుకల జాతి అభివృద్ధికి కృషి

– గిరిజన సంక్షేమ శాఖ మంత్రి సత్యవతి రాథోడ్
నవతెలంగాణ – హైదరాబాద్
రాబోవు కాలంలో ఎరుకల జాతి అభివృద్ధి కోసం రూ. 60 కోట్లు ఖర్చు చేస్తామని గిరిజన సంక్షేమ శాఖ మంత్రి సత్యవతి రాథోడ్ అన్నారు. గిరిజన సంక్షేమ శాఖ ఆధ్వర్యంలో దశాబ్ది ఉత్సవాల భాగంగా గిరిజన దినోత్సవ వేడుకలు రవీంద్ర భారతిలో ఘనంగా నిర్వహించారు. కార్యక్రమానికి ముఖ్య అతిథిగా మంత్రి సత్యవతి రాథోడ్ పాల్గొని జ్యోతి ప్రజ్వలన చేసి కార్యక్రమాన్ని ప్రారంభించారు. ఈ సందర్భంగా ఆమె మాట్లాడుతూ.. గత ప్రభుత్వాలు గిరిజన సంక్షేమాన్ని పట్టించుకునే పావన పోలేదని, తెలంగాణ రాష్ట్రం ఏర్పడిన తర్వాత గిరిజన అభివృద్ధి కోసం రాష్ట్ర ముఖ్యమంత్రి కేసీఆర్ అనేక పథకాలకు రూపకల్పన చేశారని వివరించారు. గతంలో 10 సంవత్సరాలు పరిపాలించిన పార్టీలు గిరిజనుల కోసం కేవలం రూ 6వేల కోట్లను ఖర్చు చేశారని, తెలంగాణ రాష్ట్రం ఏర్పడిన తర్వాత తొమ్మిది సంవత్సరాల కాలంలో రూ.53 వేల కోట్లు గిరిజన అభివృద్ధి కోసం రాష్ట్ర ముఖ్యమంత్రి కేసీఆర్ ఖర్చు చేయడం జరిగిందని పేర్కొన్నారు. గిరిజన విద్యార్థులకు గురుకుల పాఠశాలల తో పాటు ప్రత్యేకంగా డిగ్రీ కళాశాలలను ఏర్పాటు చేశారని తెలిపారు. రెండు లక్షల మంది గిరిజన విద్యార్థులు నాణ్యమైన విద్యను అభ్యసిస్తున్నారని చెప్పారు. 6శాతం ఉన్న గిరిజన రిజర్వేషన్లను రాష్ట్ర ముఖ్యమంత్రి కేసీఆర్ 10 శాతానికి పెంచడం వల్ల గిరిజన విద్యార్థులు ఉన్నత విద్యను అభ్యసిస్తున్నారని తెలిపారు. గిరిజన తండాలను గ్రామ పంచాయతీలో గుర్తించిన ఘనత కేసిఆర్ కే దక్కుతుందన్నారు. గిరిజన సంక్షేమ శాఖ కార్యదర్శి ఐఏఎస్ అధికారి డాక్టర్ క్రిస్టినా జెడ్ చొంగ్తు మాట్లాడుతూ.. తెలంగాణ రాష్ట్ర ప్రభుత్వం గిరిజన సంక్షేమం కోసం అనేక సంక్షేమ పథకాలు ప్రవేశపెట్టారని తెలిపారు. సంక్షేమ పథకాలను ప్రతి ఒక్కరూ సద్వినియోగం చేసుకోవాలని సూచించారు. కార్యక్రమంలో గిరిజన సంక్షేమ శాఖ స్పెషల్ సెక్రటరీ ఐఏఎస్ శ్రీధర్, డైరెక్టర్ సర్వేశ్వర్ రెడ్డి , గిరిజన సంక్షేమ శాఖ చీఫ్ ఇంజనీర్ ఎం. శంకర్, రామచంద్ర నాయక్ పాల్గొన్నారు.

Related posts: