12 బంతుల్లో 40 పరుగులు అవసరం. క్రీజులో ధోని, జడేజా. సూపర్‌కింగ్స్‌ వైపు మొగ్గు. 19వ ఓవర్లో హౌల్డర్‌ 19 పరుగులు సమర్పించుకోగా.. చివరి ఓవర్లో 21 పరుగులు కావాలి. తొలి మూడు బంతులకు ధోని 14 పరుగులు పిండుకున్నాడు. మూడు బంతుల్లో 7 పరుగులే కావాలి. ఒత్తిడి సందీప్‌ శర్మపైనే ఉంది. కండ్లుచెదిరే యార్కర్లు సంధించిన చివరి మూడు బంతులకు ఒక్క బౌండరీ ఇవ్వలేదు. ధోని (32 నాటౌట్‌, 17 బంతుల్లో 1 ఫోర్‌, 3 సిక్స్‌లు), జడేజా (25 నాటౌట్‌, 15 బంతుల్లో 1 ఫోర్‌, 2 సిక్స్‌లు) మెరిసినా సూపర్‌కింగ్స్‌ 3 పరుగుల తేడాతో పరాజయం పాలైంది. డెవాన్‌ కాన్వే (50), రహానె (31) రాణించినా.. ఆరంభం నుంచీ చెన్నై ఇన్నింగ్స్‌ నెమ్మదిగా సాగింది. చివరి ఓవర్లలో సాధించాల్సిన రన్‌రేట్‌ భారీగా ఉండటం సూపర్‌కింగ్స్‌పై ప్రభావం చూపింది. రాయల్స్‌ స్పిన్నర్లు అశ్విన్‌ (2/25), చాహల్‌ (2/27) చెన్నైని గట్టి దెబ్బకొట్టారు. ఈ మ్యాచ్‌తో చెన్నైకి సారథిగా ధోని 200వ మ్యాచ్‌ ఆడాడు. అంతకముందు తొలుత బ్యాటింగ్‌ చేసిన రాజస్థాన్‌ రాయల్స్‌ 20 ఓవర్లలో 8 వికెట్లకు 175 పరుగులు చేసింది. జోశ్‌ బట్లర్‌ (52, 36 బంతుల్లో 1 ఫోర్‌, 3 సిక్స్‌లు) అర్థ సెంచరీతో మెరువగా.. దేవదత్‌ పడిక్కల్‌ (38) తొలి పది ఓవర్లలో రాయల్స్‌ స్కోరును నడిపించారు. జడేజా (2/21) మాయజాలంతో రాయల్స్‌ జోరు తగ్గినా.. అశ్విన్‌ (30), హెట్‌మయర్‌ (30 నాటౌట్‌) మెరుపులతో రాజస్థాన్‌ మంచి స్కోరు నమోదు చేసింది.
