విష్ణు మంచు నటిస్తూ నిర్మిస్తున్న ప్రాజెక్ట్‌ ‘కన్నప్ప’. ఈ సినిమాకి సంబంధించి రెండో షెడ్యూల్‌ను ఇటీవలే ప్రారంభించారు. ఈ సినిమా కోసం ఇప్పటికే ఇండియాలోని స్టార్‌ క్యాస్ట్‌, అలాగే టాప్‌ టెక్నీషియన్స్‌ కూడా పని చేస్తున్నారు. తాజాగా ప్రముఖ కొరియోగ్రాఫర్‌ ప్రభు దేవా సైతం రంగంలోకి దిగారు. ఈ సినిమాలోని పాటలకు ఆయన కొరియోగ్రఫీ చేయబోతున్నారు. పాటల కోసం న్యూజిలాండ్‌ వెళ్ళిన ప్రభు దేవాకు ‘కన్నప్ప’ చిత్ర బృందం గ్రాండ్‌ వెల్‌కమ్‌ చెప్పింది. ‘విష్ణు మంచు తెరకెక్కిస్తున్న అత్యంత ప్రతిష్టాత్మకమైన ‘కన్నప్ప’ సెట్స్‌లో భారతదేశపు ప్రఖ్యాత కొరియోగ్రాఫర్‌ ప్రభుదేవా జాయిన్‌ అయ్యారు. అనేక పాటలకు కొరియోగ్రఫీ కంపోజ్‌ చేసే పనిలో ఉన్న ప్రభుదేవా రాకతో కన్నప్ప సినిమా మరో లెవెల్‌కు వెళ్లింది. ప్రభు దేవా కొరియోగ్రఫీ ఎలక్ట్రిఫైయింగ్‌ సినిమాటిక్‌ అనుభవాన్ని ఇస్తుంది. రెండో షెడ్యూల్‌ న్యూజిలాండ్‌లో ప్రారంభమైంది’ అని కన్నప్ప చిత్ర యూనిట్‌ పేర్కొంది. న్యూజిలాండ్‌, థారులాండ్‌, ఇండియాకు చెందిన అత్యంత ప్రతిభావంతులైన ఆర్టిస్టులు, టెక్నిషియన్లతో చిత్రీకరణ చేస్తున్నారు. న్యూజిలాండ్‌లోని అందమైన ప్రదేశాల్లో సినిమాను చిత్రీకరణ చేస్తున్నారు. విష్ణు మంచు టైటిల్‌ రోల్‌ పోషిస్తున్న ఈ చిత్రంలో మోహన్‌ బాబు, మోహన్‌ లాల్‌, ప్రభాస్‌ వంటి హేమాహేమీలెంతో మంది నటిస్తున్నారు. ‘మహా భారతం’ సీరియల్‌ను తీసిన ముఖేష్‌ కుమార్‌ సింగ్‌ ఈ చిత్రాన్ని తెరకెక్కిస్తున్నారు. ఈ మూవీకి హాలీవుడ్‌ సినిమాటోగ్రఫర్‌ షెల్డన్‌ చౌ పని చేస్తున్నారు. పాన్‌ ఇండియా వైడ్‌గా రాబోతోన్న ఈ చిత్రాన్ని 24 ఫ్రేమ్స్‌ ఫ్యాక్టరీ, అవా ఎంటర్టైన్మెంట్స్‌ బ్యానర్ల మీద మోహన్‌ బాబు నిర్మిస్తున్నారు.
