దర్శకుడు సుకుమార్‌ తనయురాలు సుకతి వేణి ప్రధాన పాత్రలో నటించిన చిత్రం ‘గాంధీ తాత చెట్టు’. పద్మావతి మల్లాది దర్శకురాలు. మైత్రీ మూవీ మేకర్స్‌, సుకుమార్‌ రైటింగ్స్‌, గోపీ టాకీస్‌ సంస్థలు సంయుక్తంగా నిర్మించిన ఈ చిత్రానికి తబితా సుకుమార్‌ సమర్పకురాలు. నవీన్‌ ఎర్నేని, యలమంచిలి రవిశంకర్‌, శేష సింధురావు నిర్మాతలు.ఇప్పటికే ఈ చిత్రం పలు అంతర్జాతీయ ఫిల్మ్‌ ఫెస్టివల్స్‌లో ప్రదర్శితమై, ఎన్నో అవార్డులు కైవసం చేసుకుంది.ఉత్తమ బాల నటిగా సుకతి వేణి కూడా పురస్కారం పొందారు. ఈ చిత్రాన్ని ఈనెల 24న ప్రపంచవ్యాప్తంగా థియేట్రికల్‌ రిలీజ్‌ చేస్తున్నారు. ఈ సందర్భంగా సుకుమార్‌ మాట్లాడుతూ, ‘సుకతికి చిన్నప్పటి నుంచి సింగింగ్‌ అంటే చాలా ఇష్టం. తనకు నటన మీద పెద్దగా ఆసక్తి లేదు. కానీ దర్శకురాలు పద్మ, నిర్మాతల్లో ఒకరైన సింధు యాక్టింగ్‌కు ఒప్పించారు. ఇందులో సుకతి యాక్టింగ్‌ చూసిన తరువాత షాక్‌ అయ్యాను. అంత బాగా నటించింది. ఈ సినిమా సుకతి లైఫ్‌లో ఒక మంచి జ్ఞాపకంలా మిగిలిపోతుంది. సినిమాలో అందరూ బాగా నటించారు. నవీన్‌, రవి ఈ సినిమాను నిర్మించడం, విడుదల చేయడం ఎంతో ఆనందంగా ఉంది. ఎంటర్‌టైన్‌మెంట్‌తో పాటు మేసేజ్‌ ఇచ్చే సినిమా ఇది’ అని అన్నారు. ‘సినిమా చూసిన తరువాత ఇంటెన్సిటీ..అందరి నటన చూసి ఇది డబ్బులు తెచ్చే సినిమా అనిపించింది. ముఖ్యంగా సుకతి నటన చాలా బాగా చేసింది. అందరికి ‘చిన్నారి చేతన, లిటిల్‌సోల్జర్స్‌’ సినిమాలను గుర్తుచేస్తుంది. ప్రతి ఒక్కరూ చిన్న పిల్లలతో కలిసి చూడాలి. అందరి హదయాలను హత్తుకునే సినిమా ఇది’ అని నిర్మాతలు రవిశంకర్‌, నవీన్‌ ఎర్నేని అన్నారు. సమర్పకురాలు తబితా సుకుమార్‌ మాట్లాడుతూ, ‘సుకతి ఇంత బాగా నటిస్తుందని నాకు తెలియదు. ఈ సినిమా ఫెస్టివల్స్‌కు వెళితే చాలు అనుకున్నాను. అవార్డులు వచ్చిన తరువాత అందరూ అప్రిషియేట్‌ చేస్తుండటం చూసి సినిమాను మైత్రీ మూవీ మేకర్స్‌ నిర్మాతలు నవీన్‌, రవి సపోర్ట్‌తో విడుదల చేస్తున్నాం’ అని తెలిపారు.
‘ఒక చెట్టుకు, మనిషికి మధ్య ఉన్న అనుబంధంతో ఈ సినిమా ఉంటుంది. సుకతి నటన ఈ సినిమాలో ప్రధాన ఆకర్షణ’ అని దర్శకురాలు పద్మావతి చెప్పారు. సుకతి మాట్లాడుతూ, ‘ఈ సినిమాను ఎంతో కంఫర్టబుల్‌గా చేశాను. దర్శకురాలు పద్మ నా మీద ఎంతో నమ్మకం పెట్టుకుంది. ఆమె కోసమే నా హండ్రెడ్‌ పర్సెంట్‌ ఎఫర్ట్‌ పెట్టాను’ అని అన్నారు.
