కొన్ని విషయాలకు ఉపోద్ఘాతం అక్కరలేదు – నేరుగా విషయంలోకి వెళ్ళొచ్చు…
16 మే 2014న బీజేపీ పూర్తి మెజారిటీతో ఎన్నికల్లో గెలిచింది. అది ఊహించని ఆ పార్టీ కార్యకర్త, మోడీ వీరాభిమాని సంతోషంతో ఉక్కిరి బిక్కిరి అయిపోయాడు. తట్టుకోలేక మూర్ఛపోయాడు. కుటుంబ సభ్యులు ఆసుపత్రిలో చేర్చారు. తర్వాత అతను కోమాలోకి వెళ్ళాడు. కొంత కాలం తర్వాత కోమాలోంచి బయటపడి, బాహ్య పరిస్థితుల్ని అర్థం చేసుకున్నాడు. అందరినీ గుర్తుపట్టసాగాడు. ఇంతలో రౌండ్స్‌లో ఉన్న డాక్టరుగారు అక్కడికి వచ్చారు.
భారతదేశంలో పరిస్థితులన్నీ మారిపోయి ఉంటాయని, తమ ప్రియతమ నాయకుడు మోడీజీ అన్నీ చక్కదిద్ది ఉంటాడు – అని అనుకుని, ఆ పేషంట్‌ కొన్ని ప్రశ్నలడిగాడు. అవి ఈ విధంగా ఉన్నాయి…
డాక్టర్‌ గారూ! అవినీతి లేని ఈ స్వేచ్ఛా భారతం మీకు ఎలా అనిపిస్తోందీ?
రాహుల్‌ గాంధీ, సోనియా గాంధీ అందరూ జైల్లో పడ్డారా? లేక ఇటలీ పారిపోయారా? గాలి సోదరులు, రాబర్ట్‌ వాద్రాలంతా ఏ జైల్లో ఉన్నారూ?
సరే డాక్టర్‌ సాబ్‌, నేను లక్నోకు బుల్లెట్‌ ట్రెయిన్‌లో వెళ్ళొచ్చా?
మోడీజీ ప్రారంభించి ఉంటారుకదా?
పెద్దనోట్ల రద్దుతో దేశంలోని నల్లడబ్బంతా ప్రభుత్వం స్వాధీనం చేసుకుని ఉంటుంది. స్విస్‌ బ్యాంక్‌ నుండి బోలెడంత డబ్బు మోడీజీ వెనక్కి తెప్పించి ఉంటారు కదా? ఈ దేశానికి పట్టిన దరిద్రం అంతా వదిలిపోయి ఉంటుంది!
మాట్లాడే అవకాశం ఇవ్వకుండా పేషంట్‌ ప్రశ్నలు అడుగుతూ ఉంటే, డాక్టరు గుడ్లు మిటకరించి చూడటం తప్ప ఏమీ చేయలేకపోయాడు. అసలు దేశానికి పట్టిన దరిద్రమే ఆ పార్టీ అనీ, ఆ నాయకుడూ అనీ – ఆ కుర్ర డాక్టరు పేషంట్‌కు చెప్పలేకపోయాడు.
నాకు గొప్ప సంతోషంగా ఉంది డాక్టర్‌ గారూ! మోడీజీ ఒక్కొక్క భారతీయుడి ఖాతాల్లో పదిహేను లక్షలు వేసేసి ఉంటారు. నా అక్కౌంట్‌లో కూడా పడే ఉంటాయి. ఆ డబ్బు మా ఆవిడ ఏం చేసిందో – ఇంటికి వెళ్ళాక అడగాలి!
ఈ దెబ్బతో అమెరికన్‌ డాలర్‌ విలువ కిందపడి, గిలగిల కొట్టుకుని, 30కి చేరుకుంది కదా? నాకు తెలుసు – అంత పనీ జరిగే ఉంటుంది. ఇక నేం? ప్రతి భారతీయుడు మోడీజీయే తమకు జీవితకాలం ప్రధానిగా ఉండాలని కోరుకుని ఉంటాడు.
వంట గ్యాసు ఉచితం. కూరగాయలు, ఉల్లిగడ్డలు, ఆలుగడ్డలు అన్నీ ఉచితం… జీవితం ఎంత ఆనందకరంగా మారిందోకదా?
మోడీజీ దెబ్బకు పాకిస్థాన్‌వాడు హడలెత్తి పోయి ఉంటాడు. డాన్‌ దావూద్‌ ఇబ్రహీంను అప్పగించి ‘జీ హుజూర్‌’ అని ఉంటాడు – కదా? కాంగ్రెస్‌ హయాంలో లాక్కున్న భూములన్నీ మోడీజీ ప్రభుత్వం మళ్ళీ రైతులకు తిరిగి అప్పగించి ఉంటుంది. ఎంతైనా నడుస్తున్నది మన ప్రభుత్వం కదా? ప్రతి భారతీయ పౌరుడికీ మేలు జరిగే ఉంటుంది!
ఇక నా గురించి నాకు ఏమాత్రం బెంగలేదు డాక్టర్‌ సాబ్‌! అన్నీ మా మోడీజీ చూసుకుంటాడు. ఇంత పెద్ద దేశాన్ని చూసుకునేవాడు నన్ను చూస్కోలేడా?
గుక్క తిప్పకోకుండా, పట్టలేని ఆనందంతో మాట్లాడుతున్న పేషంట్‌ మాటలు నిలబడి వింటున్న ఆ అమాయక డాక్టరు మీద బాగా పనిచేశాయి. ఆయన సున్నిత మనస్కుడు. అందుకే తలదిమ్మెక్కి, కళ్ళు తిరిగి కింద పడిపోయాడు. దేశంలోని సగటు మనిషి పరిస్థితి లాగా, ఈ కుర్ర డాక్టరు పని అయిపోయింది – నర్సులు పరిగెత్తుకుంటూ వచ్చి లేపారు, స్పృహ తప్పాడని అనిపించి తీసుకెళ్ళి మరో బెడ్‌ మీద పడుకోబెట్టారు. విషయం తెలుసుకుని సీనియర్‌ డాక్టర్‌ పరుగు పరుగున అక్కడికి వచ్చాడు. పడిపోయిన కుర్ర డాక్టరుకు ట్రీట్‌మెంట్‌ ప్రారంభించాడు.
పేషంట్‌ ఏం మాట్లాడాడు? డాక్టరు ఎందుకు పడిపోయాడూ? అన్న విషయం ఆసుపత్రి సూపరింటెండెంట్‌ క్షుణ్ణంగా తెలుసుకున్నాడు. మోడీజీ వీరాభిమాని అయిన పేషంట్‌ను మెడికల్‌ టీం పరీక్షించింది. చికిత్స చేయడం తమ ఆసుపత్రిలో కుదరదని, వెంటనే ‘మెంటల్‌ ఎసైలమ్‌’కు పంపించారు.
కుర్ర డాక్టర్‌ సంతోషంగా లేచి కూర్చుని, ధైర్యంగా విధులు నిర్వహించుకోసాగాడు.
*****
పెళ్ళంటూ చేసుకుంటే ప్రధాని నరేంద్రమోడీనే చేసుకుంటానని ఒక మహిళ నెల రోజులు ఢిల్లీ – జంతర్‌ మంతర్‌ వద్ద నిరాహారదీక్ష చేసిందంటే, మనకు ఆశ్చర్యం కలుగుతుంది. ప్రతిరోజూ ధర్నాలతో, నిరసనలతో దద్దరిల్లిపోయే ఢిల్లీ – జంతర్‌ మంతర్‌ వద్ద, రాజస్థాన్‌ – జైపూర్‌కు చెందిన జయంతి (45) అనే మహిళ – నిరాహార దీక్ష చేపట్టింది. అప్పుడు మీడియా అంతా ఆమె చుట్టూ తిరిగింది. తను ప్రధాని నరేంద్రమోడీని వివాహం చేసుకోవాలని అనుకుంటున్నట్టు – ఆమె మీడియాకు చెప్పింది. తనకు ఉన్న ఆస్థులన్నీ అమ్మి రెండు కోట్ల రూపాయల వరకట్నం కూడా ఇస్తానని అంది. తనకు 1989లో పెళ్ళయ్యిందనీ, అయితే తన భర్త తనను వదిలేసి ఎక్కడికో వెళ్ళిపోయాడనీ – 28ఏండ్లుగా ఎదురు చూస్తున్నా ఆయన తిరిగి రాలేదని ఆమె మీడియాకు తెలిపింది. వెంటనే ఒప్పుకోవాలని ఆ మహిళ, మీడియా ద్వారా మోడీజీకి విన్నవించుకుంది. జంతర్‌ మంతర్‌ నుండి గనుక తనను ఖాళీ చేయిస్తే… పరిణామాలు తీవ్రంగా ఉంటాయనీ… అప్పుడు తను నేరుగా ప్రధాని నివాసం ముందే ఆందోళన కొనసాగిస్తానని హెచ్చరించింది. ఇది కల్పితం కాదు. 2016-2017 కాలంలో యదార్థంగా జరిగిందే! జైపూర్‌ వుమెన్‌ ఆన్‌ హంగర్‌ స్టైక్‌ / పి.యం. మోడి మ్యారీమీ – వంటి శీర్షికలతో యుట్యూబ్‌ వీడియోలున్నాయి. తనకు పెళ్ళి అయ్యిందన్న నిజాన్ని మోడీతో చెప్పించడానికి ఈ విధంగా ఎవరో పథకం ప్రకారం నాటకం ఆడించి ఉంటారు. అబద్దాలు చెప్పే నోటితో నిజాలు పలికించడమంటే మాటలా?
******
”పాత మొబైల్‌ ఇచ్చేసి కొత్త మొబైల్‌ తీస్కోండి!” అన్న ప్రకటన చూసి ఓ అమాయక ప్రాణి ఎగిరి గంతేశాడు. మోడీ చెప్పిన ‘అచ్చేదిన్‌’ అంటే ఇదేనేమో అనుకుని, ఎప్పటినుండో వాడుతున్న తన పాత ఆండ్రాయిడ్‌ ఫోన్‌ జేబులోంచి తీసి చూసుకున్నాడు. ‘ఇది ఇచ్చేసి కొత్త ఫోన్‌ తెచ్చుకుందాం!’ అనుకుని ప్రకటన కింద ఉన్న అడ్రసు వెతుక్కుంటూ వెళ్ళాడు. అక్కడ అద్భుతమైన భవనమైతే ఉంది. కానీ, దుకాణమేదీ లేదు. ఆ భవనం ముందు ఇద్దరు మనుషులు కర్రలు పట్టుకుని ఉన్నారు. వాళ్ళేదో మాట్లాడుకుంటూ నవ్వుకుంటున్నారు. వాళ్ళని అడిగితే విషయం తెలుస్తుంది కదా అనుకుని వాళ్ళ దగ్గరికి వెళ్ళాడు. ఆ ప్రకటన గురించి అడిగాడు.
”అవును! ఆ ప్రకటన ఇచ్చింది మేమే! జై శ్రీరామ్‌” అన్నాడొకడు.
”తిరు! నీ పాత ఫోను మాకు ఇచ్చెళ్ళు, పక్కవీధిలో మాదే మొబైల్‌ షాపుంది. అక్కడ కొత్తది కొను” అని ఆర్డరు వేశాడు మరొకడు.
”నేను కొనుక్కోవడమేమిటీ? పాతది ఇస్తే కొత్తది ఇస్తామన్నారు కదా?” అన్నాడు అమాయక ప్రాణి.
”అలా అని ప్రకటనలో ఉందా.” అని మరొకడు గుడ్లురిమి చూశాడు. కర్రపైకెత్తాడు కూడా!
”నీలాగా బాగా చదువుకున్నోళ్ళకు విషయం అర్థం కాదు. పాతది ఇచ్చేసి కొత్త మొబైల్‌ తీస్కోండి” అని అన్నాం. అందులో తప్పులేదు. వెళ్ళి కొనుక్కోరాదా? ఎవరు వద్దన్నారూ?” అని దబాయించాడు ఒకడు.
”గప్‌ చిప్‌గా ఇచ్చేసి వెళ్ళు, లేదంటావా తలపగులుతుంది జాగ్రత్త!” అన్నాడు మరొకడు. దేశాన్ని నడుపుతున్న ఇద్దరు గుండాల్లాగానే ఉన్నారే వీళ్ళూ – అనుకుని, మరో మార్గం లేక పాత మొబైల్‌ వారికి ఇచ్చేసి, భయం భయంగా వెనుదిరిగాడు అమాయక ప్రాణి. ‘అమ్మబాబోరు డబుల్‌ ఇంజన్‌ అంటే ఇదా?’ అనుకున్న అమాయక ప్రాణికి జ్ఞానోదయమైంది.
******
హిట్లర్‌ కాలంలో జర్మనీ ఎంతో వెలిగిపోయింది. ఉదాహరణకు కొన్ని విషయాలు చూద్దాం! ఆయన విశ్వాసాలు చాలా బలమైనవి. ఒక మతమంటే, ఒక వర్గమంటే ఆయనకు గిట్టదు. వారిని శత్రువులుగా చూసేవాడు. హిట్లర్‌ను ఎవరైనా విమర్శిస్తే ఆయన అనుచరగణం తట్టుకునేది కాదు. ఆ కాలంలో ఉన్న మీడియా సంస్థలన్నీ విధిగా ఆయన పాటే పాడాల్సి వచ్చేది. ప్రత్యర్థుల్ని అన్ని రకాలుగా నిర్దాక్షిణ్యంగా తొక్కేసేవాడు. వాళ్ళని దేశద్రోహులని పిలిచేవాడు. దేశ ప్రజల సమస్యలన్నీ కేవలం తను మాత్రమే తీర్చగలనని చెప్పుకునేవాడు. ఆయన ప్రవేశపెట్టిన గొప్ప నినాదం ‘గుటే టాగే కొమ్మెన్‌’ – అంటే అచ్ఛేదిన్‌ – మంచిరొజులొస్తాయని ఆశ కల్పించేవాడు. రేడియోలో ప్రసంగించడానికి తెగ ఉత్సాహపడేవాడు. ప్రసంగించే ముందు ఫ్రెండ్స్‌ – బ్రదర్స్‌ అండ్‌ సిస్టర్స్‌ – అంటే మిత్రోఁ – భాయియో! అవుర్‌ బహెనోఁ – అని సంభోదించేవాడు. ఫొటోలు దిగడానికి హిట్లర్‌ భలేగా ముచ్చటపడేవాడు. అడ్డంగా ఉన్న ఇతర దేశాధినేతల్ని పక్కకు లాగి కెమెరాకు ఫోజులిచ్చేవాడు కాదు లెండి! అబద్దాల్ని పచ్చి నిజాలన్నట్టు నమ్మించే ప్రయత్నం నిరంతరం చేస్తుండేవాడు. తను మాట్లాడటమే కాని, ఎదుటి వాడు చెపుతున్నదేమిటో అస్సలు వినిపించుకునేవాడు కాదు.
గమనిక: ఇవన్నీ నియంత హిట్లర్‌కు సంబంధించిన విషయాలే. వీటితో ఎవరికైనా, మరెవరైనా గుర్తుకొస్తే, తప్పువారి విజ్ఞతదే, పరిజ్ఞానానిదే అవుతుంది! ఇది కేవలం హిట్లర్‌ వ్యక్తిత్వ చిత్రణే!
-వ్యాసకర్త: సుప్రసిద్ధ సాహితీవేత్త, జీవశాస్త్రవేత్త.
డాక్టర్‌ దేవరాజు మహారాజు
